ამ წუთებში ხმაური და დაპირისპირებაა კურორტ ბახმაროში. თვითმხილველების ცნობით, ერთმანეთს ჩოხატაურის მუნიციპალიტეტის ხელმძღვანელობა და ეკონომიკის სამინისტროს ქვემდებარე, სახელმწიფო ქონების ეროვნული სააგენტოს თანამშრომლები დაუპირისპირდნენ. მათივე თქმით, სააგენტოს წარმომადგენლები მუნიციპალიტეტს ჯარიმას უწერენ:
_ საკმაოდ ხმამაღალი საუბარია ამ წუთებში. სააგენტოს წარმომადგენლები, რომლებიც ფოთიდან არიან, ჯარიმას წერენ იმის გამო, რომ მუნიციპალიტეტს სანატორიუმთან პარკი აქვს გაკეთებული. სახელმწიფოს მიწაა და არ გქონდათ ამის გაკეთების უფლება, რატომ შემოღობეთო, _ გვითხრეს ადგილზე მყოფმა დამსვენებლებმა.
მათივე ინფორმაციით, სააგენტოს წარმომადგენელი კურორტის და მუნიციპალიტეტის წარმომადგენლებს მაღალი ჯარიმის გამოწერით ემუქრება.
სააგენტოს წარმომადგენელი ბორის ბუბუტეიშვილი ჩვენთან საუბრისას ამბობს, რომ არასწორი ინფორმაცია მოგვაწოდეს:
_ სახელმწიფოს საკუთრებაში არსებულ მიწის ნაკვეთზე არის სარგებლობა. ამ წუთებში ირკვევა, რეალურად ვინ სარგებლობს ამით. არავის ვაჯარიმებთ. საიდან მოგივიდათ ეს ინფორმაცია? _ აღნიშნა ბუბიტეიშვილმა.
_ ბატონო ბორის, პარკი 2010 წელს ბიუჯეტის ფულით გაკეთდა, ღობეა შემოვლებული და ესაა პრობელმა?
_ გაირკვევა ყველაფერი და მერე, მაგის მიხედვით გაგცემთ პასუხს. ყველაფერი დამუშავების პროცესშია, _ აღნიშნა ჩვენთან საუბრისას ბუბუტეიშვილმა, რომელიც საუბრის დასასრულს ჩხუბზეც კი გადავიდა და საკითხის დაზუსტება ჩვენგან მოითხოვა.
“გურია ნიუსი” დეტალების დაზუსტებას ეკონომიკის სამინისტროში შეეცადა. სამინისტროს პრესსამსახურის თქმით, სიტუაციაში გაერკვევიან და ვრცელ ინფორმაციას მოგვიანებით მოგვაწვდიან.
პ.ს. აღსანიშნავია, რომ ეკონომიკის სამინისტრო ბახმაროში რამდენიმე შენობასაც ფლობს, რომელიც ამ დრომდე გამოუყენებელია. უფრო მეტიც, 2012 წელს გაკეთებული ამფითეატრი, რომელიც, ასევე, სამინისტროს ბალანსზეა, მოუვლელობისგან იშლება.
