იუსტიციის სამინისტროში სტრასბურგის მოსამართლეობის კანდიდატების შერჩევის პროცესი გაიმართა. ერთ-ერთი კანდიდატი გვანცა ყუფარაძის საქმის მოსამართლე თამარ ალანიას იყო, რომელსაც კომისიის წევრებმა ყველაზე მეტი კითხა დაუსვეს.
სახალხო დამცველი უჩა ნანუაშვილი დაინტერესდა, ალანია ყუფარაძეს რომ შეხვდეს, რომლის მიმართაც გამამტყუნებელი გადაწყვეტილება გამოიტანა, რას ეტყოდა. ნანუაშვილს ალანიამ უპასუხა, რომ მას მიესალმება.
საზოგადოებრივი მაუწყებლის ინფორმაციით, ალანიას იუსტიციის მინისტრი თეა წულუკიანი გამოეხმაურა და აღნიშნა, რომ გვანცა ყუფარაძე იუსტიციის სამინისტროში მუშაობს. წულუკიანის საპასუხოდ, ალანიამ აღნიშნა, რომ მოსამართლეობის დროს გადაწყვეტილებებს საქმის საფუძველზე იღებდა და არა პირადი განწყობით. მისი თქმით, მას გადაწყვეტილების მიღების შემდეგ ბევრი ბრალდებული შეხვედრია.
ალანიას წულუკიანი გამოეხმაურა და განაცხადა, რომ ყუფარაძემ საქმე კი არა, ლამის სიცოცხლე წააგო.
„თქვენი გადაწყვეტილებით, ეს ადამიანი ციხეში მოხვდა და სრულწლოვანი იქ გახდა. ეს ახალგაზრდა ქალბატონი იუსტიციის სამინისტროს თანამშრომელია და მოსამართლეობასაპირებს. სახელმწიფო ისეთი საქმეების გამოსწორებას გეგმავს, რომელთაც ადამიანები დაანგრიეს და მით უმეტეს, გოგონა“, – აღნიშნა წულუკიანმა.
მინისტრს ალანია ისევ გამოეხმაურა და ყურადღება იმაზე გაამახვილა, რომ გვანცა ყუფარაძე პატიმრობის დროს სამარტოო საკანში არ იმყოფებოდა და სასჯელს სრულწლოვან ქალბატონებთან ერთად იხდიდა. მისი თქმით, ცოტა ხნის წინ მან საქმე გამოითხოვა და კვლევა დაიწყო, ხომ არ იყო დარღვევა, რომ ბრალდებული სრულწლოვან ქალბატონებთან ერთად იყო საკანში. ალანიას ცნობით, გაერო მიიჩნევს, რომ თუკი არასრულწლოვანი სამარტოო საკანში მოხვდება, დარღვევა ეს არ არის.
„თუ ვინმეს საქმის დეტალები დააინტერესებს, ეს საქმე არქივში ინახება“, – აღნიშნა ალანიამ.
„ამ საქმის მიმართ კითხვები არსებობს“, – აღნიშნა წულუკიანმა.
ალანიამ მინისტრის საპასუხოდ განაცხადა, რომ მას კითხვებზე პასუხის გაცემის უფლებას სამოსამართლეო ეთიკა არ აძლევს. ალანიას განცხადებით, როცა საქმე მასთან მივიდა, იფიქრა, გოგოს როგორ შეიძლებოდა ეს საქციელი ჩაედინა, მაგრამ შემდეგ ბრალდებულის ფსიქოტიპი ნახა. ალანიას თქმით, როცა გადაწყვეტილება იქნა მიღებული, იმასაც ამბობდნენ, რომ დაზარალებული კუბლაშვილის ნათესავი იყო.
ალანიას ამ რეპლიკას წულუკიანი გამოეხმაურა და მას მიმართა – „მესმის, რომ კუბლაშვილს მისტირით“.
წულუკიანმა ყურადღება იმაზეც გაამახვილა, რომ ყუფარაძის საქმე სტრასბურგშია და მან თავდაცვაზე უარი თქვა.
„მთავრობას ამის უფლება აქვს, მაგრამ სინდისთან ვერ მოვრიგდებით. სიტუაცია ისეთია, რომ მთავრობა ამ საქმეზე რაიმე პოზიციის დაფიქსირებაზე უარს ამბობს. სტრასბურგს ვუთხარით, გადაწყვეტილება თავად მიიღოს. სტრასბურგის გადაწყვეტილებას დაველოდოთ“, – დასძინა წულუკიანმა.
თამარ ალანიას ასევე კითხვით მიმართეს იმის თაობაზე, თუკი კვლავ მოხდება მთავრობისთვის წარსადგენ სიაში, მთავრობის წინაშე მის შესახებ მომხსენებელმა ისეთი რა უნდა თქვას, რაც მათ მის მხარდაჭერას აფიქრებინებთ.
მიუხედავად ამ დაძაბული საუბრისას, ალანია იმ კანდიდატებს შორის მოხვდა, რომელსაც სტრასბურგში წარადგენენ.
