საქართველოს ყოფილი პრეზიდენტი, მიხეილ სააკაშვილი „ერთიანი ნაციონალური მოძრაობის“ წევრის, დავით კირკიტაძის დაპატიმრებას სოციალურ ქსელში ეხმაურება.
სააკაშვილის თქმით, კირკიტაძის დაპატიმრებით ბიძინა ივანიშვილი „ნაციონალური მოძრაობის“ განეიტრალებას და სხვების დაშინებას ცდილობს.
„დავით კირკიტაძის ციხეში ჩასმით ოლიგარქი ცდილობს ჩვენი მოძრაობის განეიტრალებას და სხვების დაშინებას… მაგრადაც ცდება… დაიმახსოვრეთ, კირკიტაძე იქნება სწორედ ერთ-ერთი მთავარი მესაფლავე ივანიშვილის რეჟიმის სულ მალე… ყოჩაღ, დათო! ვამაყობ შენი თანამებრძოლობით და ქედს ვიხრი შენი შეუპოვრობის წინაშე…“ _ წერს სააკაშვილი.
ცნობისთვის, დავით კირკიტაძეს ბრალად ედება 16 დეკემბერს, ახლადარჩეული პრეზიდენტის, სალომე ზურაბიშვილის ინაუგურაციის დღეს, ავტობუსში მყოფ პოლიციელზე თავდასხმა.
შეგახსენებთ, რომ „ნაციონალური მოძრაობა“ საპრეზიდენტო არჩევნების შედეგების გაპროტესტებას მხარდაჭერებთან ერთად თელავში, ერეკლე მეორეს სასახლეს მიმდებარე ტერიტორიაზე აპირებდა, სადაც ინაუგურაცია იმართებოდა.
თუმცა, მიმავალ კოლონას თელავამდე ჩასასვლელი გზა გადაკეტილი დახვდა, რასაც დაპირისპირება მოჰყვა.
