ვინ ითვლება კოვიდ-ინფიცირებულ პირად?
_ COVID19 ინფიცირებულად ითვლება ადამიანი, რომელსაც ინფექცია დაუდასტურდა ლაბორატორიაში ჩატარებული კვლევით.
რომელი სახის ტესტი გამოიყენება დიაგნოსტირებისთვის?
_ დაავადების მიმდინარეობის დადგენის მიზნით გამოიყენება ანტიგენის სწრაფი ტესტი ან პჯრ (PCR) ტესტი, რომელიც ადგენს ცხვირ-ხახის ნაცხში ვირუსის არსებობას.
რა არის ანტისხეულების ტესტი და აქვს თუ არა სადიაგნოსტიკო მნიშვნელობა?
_ COVID-19 IgM/IgG ანტისხეულების ტესტი არის სწრაფი ტესტი, რომელიც განსაზღვრავს სისხლში, შრატსა და პლაზმაში ვირუსის მიმართ ანტისხეულების არსებობას. უსიმპტომო პაციენტებში, ან დაავადების ადრეულ ეტაპზე აღნიშნული ტესტის გაკეთება არ არის მიზანშეწონილი, რამდენადაც ანტისხეულების გამოყოფა იწყება სიმპტომების დაწყებიდან მე-5 და მე-14 დღეს. მას არა აქვს სადიაგნოსტიკო მნიშვნელობა.
ვის უტარდება პჯრ (PCR) ტესტირება და ფასიანია თუ არა ის?
_ PCR-ტესტირება უტარდებათ სიმპტომიან პაციენტებს მაშინ, როცა ჩატარდა ანტიგენ-ტესტი, პასუხი არის უარყოფითი, თუმცა გრძელდება კოვიდისათვის დამახასიათებელი სიმპტომატიკა.
PCR ტესტის ჩატარების საჭიროებას განსაზღვრავს ოჯახის ექიმი, ექიმის მიმართვით (დანართი-1) PCR ტესტი არის უფასო.
ასევე, გეგმიური პჯრტესტირება უტარდებათ მაღალი რისკის მქონე ჯუფებს:
(სამედიცინო პერსონალი, ძალოვანი სტრუქტურები, სხვადასხვა ტიპის სახლების ბენეფიციარები, დიალიზზე მყოფი პირები, ორსულები, რელიგიის მსახურები და ა.შ.)
უსიმპტომო პირებში, ან პირებში, რომელთაც საკუთარი სურვილით სურთ თავიანთი კოვიდ-სტატუსის გადაკონტროლება, პჯრ-ტესტირება ფასიანია.
ვინ ითვლება მაღალი რისკის კონტაქტად?
_ მაღალი რისკის კონტაქტად ითვლება პირი, რომელსაც სიმპტომების გაჩენამდე ან ლაბორატორიულ დადასტურებამდე 48 საათის განმავლობაში:
ჰქონდა პირდაპირი შეხება COVID-19 ის დადასტურებულ შემთხვევასთან 1 მეტრზე ნაკლები დისტანციით 15 წუთზე მეტი დროით;
ჰქონდა ფიზიკური კონტაქტი COVID-19 ის დადასტურებულ შემთხვევასთან;
ჰქონდა დაუცველი უშუალო კონტაქტი COVID-19-ით ინფიცირებულის მიერ გამოყოფილ ბიოლოგიურ სითხესთან (მაგ: ხველის ან ცემინებისას);
ვინც იმყოფებოდა დახურულ სივრცეში COVID-19 ის დადასტურებულ შემთხვევასთან 15 წუთზე მეტი ხნის განმავლობაში, რეგულაციის წესების დარღვევით.
როგორ უნდა მოიქცეთ, თუ თქვენ არ გქონიათ შეხება კოვიდ–ინფიცირებულთან, მაგრამ გამოგივლინდათ COVID-19-ისთვის დამახასიათებელი სიმპტომები?
_ დაუკავშირდით თქვენს ოჯახის ექიმს. ჩაიტარეთ ტესტირება სიმპტომების გამოვლენიდან 2-3 დღის განმავლობაში. ხველება და ტემპერატურის მატება ახასიათებს სხვა ვირუსულ ინფექციებსაც. შესაძლებლობის ფარგლებში, შეეცადეთ რამდენიმე დღე გაატაროთ იზოლაციაში. როგორც წესი, სხვა ვირუსული ინფექციით გამოწვეული სიმპტომები, სტანდარტული მიმდინარეობისას 3-5 დღეში ქრება.
როგორ უნდა მოიქცეთ, თუ ინფიცირებულთან კონტაქტის შემდეგ გამოვლინდა სიმპტომატიკა?
_ გადადით იზოლაციაში, დაუკავშირდით პირად ოჯახის ექიმს, რომელიც დიაგნოზის დადასტურების მიზნით გადაგამისამართებთ ტესტირებაზე.
როგორ უნდა მოიქცეთ, თუ ტესტმა დადებითი პასუხი აჩვენა?
_ უპირველესად უნდა დარეკოთ და დარეგისტრირდეთ 112-ში. 112-2-ზე ან დარეგისტრირდეთ პორტალზე: https://er.moh.gov.ge/
112-ის მიერ, Covid-19 დადასტურებული შემთხვევები შემდგომი მონიტორინგისთვის გადაეცემა ოჯახის ექიმებს.
თუ გაქვთ საკუთარ სახლში სრულად იზოლირების შესაძლებლობა, დარჩით ბინაზე. დასაშვებია საერთო სველი წერტილის მოხმარება ჰიგიენის წესების დაცვით. პირობების არქონის შემთხვევაში, ინფორმაცია მიაწოდეთ 112-ს და მოხდება თქვენი გადაყვანა COVID-სასტუმროში.
თუ 48 საათის განმავლობაში არ დაგიკავშირდათ ოჯახის ექიმი შეგიძლიათ დარეკოთ ცენტრალური ონლაინ კლინიკის ცხელ ხაზზე – 1522, ხოლო კერძო დაზღვევის შემთხვევაში თქვენი სადაზღვევო კომპანიის ცხელ ხაზზე.
112-ში დარეგისტრირების შემდეგ, თქვენ უნდა დაგიკავშირდეთ ონლაინ-კლინიცისტი, რომელმაც ბინაზე უნდა მართოს თქვენი დაავადება. დღევანდელ რეალობაში თუ ამისი შესაძლებლობა არ შეიქმნა, მაშინ შეგიძლიათ დაუკავშირდეთ თქვენს ოჯახის ექიმს.
ამ პერიოდში:
_ არ გახვიდეთ გარეთ;
_ არ მიიღოთ სტუმრები;
ოჯახის წევრებთან ფიზიკური კონტაქტი იქონიეთ მხოლოდ აუცილებელი საჭიროების დროს , რაც შესაძლებელია მცირე დროით და ფიზიკური დისტანციის დაცვით, პირბადის აუცილებელი გამოყენებით კონტაქტში მყოფი ყველა პირის მიერ;
ოჯახის ექიმის/სამედიცინო დაწესებულების საკონტაქტო ინფორმაციის მისაღებად ეწვიეთ პორტალს: https://ambulatoria.moh.gov.ge/ ან დაუკავშირდით ცხელ ხაზს 15-05. თუ ხართ კერძო დაზღვევის მოსარგებლე, დაუკავშირდით სადაზღვევო კომპანიას.
გაითვალისწინეთ, რომ დროული ტესტირება, პანდემიის პირობებში გვეხმარება სწორ დიაგნოსტიკაში და
თავიდან აგვაცილებს დაავადების შემდგომ გავრცელებას!
