საქართველოს კომუნიკაციების ეროვნული კომისიის წევრების ანაზღაურებამ გასულ წელს, ჯამში 1 მილიონ ლარზე მეტი იყო.
საჯარო სამსახურის ბიუროს ვებ-გვერდზე გამოქვეყნებული ქონებრივი დეკლარაციებიდან ირკვევა, რომ კახა ბექაურმა (კომისიის თავმჯდომარე), მერაბ ქათამაძემ, გიორგი ფრუიძემ და ელისო ასანიძემ ჯამში 936 875 ლარი აიღეს.
კერძოდ, კახა ბექაურის ქონებრივი დეკლარაციდან, რომელიც მან 2017 წლის 1 მაისს შეავსო, აღნიშნულია, რომ გასულ წელს, კომუნიკაციების ეროვნული კომისიიდან, წევრობისთვის, 2016 წლის 1 იანვრიდან ამავე წლის 31 დეკემბრამდე ჯამში 233988,00 ლარის შემოსავალი მიიღო.
კომუნიკაციების ეროვნული კომისიის წევრმა ელისო ასანიძემ ქონებრივი დეკლარაცია 2017 წლის 29 მაისს შეავსო და მისი შემოსავალი გასულ წელს 234911,50 ლარი იყო.
კიდევ ერთ წევრს, გიორგი ფრუიძეს ქონებრივი დეკლარაცია 2017 წლის 30 მაისს აქვს შევსებული, რომლის მიხედვითაც, გასული წლის განმავლობაში მისმა შემოსავალმა 233988,00 ლარი შეადგინა.
2017 წლის 24 აპრილს აქვს შევსებული ქონებრივი დეკლარაცია კომისიის კიდევ ერთ წევრს, მერაბ ქათამაძეს, თუმცა, მასში შემოსავლების შესახებ მითითებული არაფერია.
„გურია ნიუსი“ დაინტერესდა, რატომ არ წერია მერაბ ქათამაძის დეკლარაციაში კომისიიდან მიღებული შემოსავლების შესახებ და საჯარო სამსახურის ბიუროს წერილით მიმართა, სადაც ვითხოვდით მოეწოდებინათ ქათამაძის ფინანსური შემოსავლების შესახებ ინფორმაცია და განემარტათ მიზეზები რის გამო არ წერია მის დეკლარაციაში გასული წლის შემოსავლების შესახებ ინფორმაცია.
როგორც საჯარო სამსახურის ბიუროდან „გურია ნიუსისთვის“ გამოგზავნილ წერილშია აღნიშნული, მერაბ ქათამაძეს დეკლარაციის შევსების დროს შეცდომა აქვს დაშვებული და შემოსავლების შესახებ ინფორმაცია დახურული აქვს. თუმცა, ჩვენთვის მოწოდებული დოკუმენტიდან ირკვევა, რომ მისი შემოსავალი 233 988 ლარია.
რაც შეეხება კომისიის კიდევ ერთ წევრს, ვახტანგ აბაშიძეს, მას 2016 წლის დეკლარაციის შევსება 2017 წლის ივნისის ბოლოს უწევს. ხოლო 2015 წელს მისი შემოსავალი 255 425.00 ლარი იყო.
