გურიის რეგიონში, 9 სხვადასხვა საგზაო მონაკვეთზე, მსოფლიო ბანკის დაფინანსებით, ჯამურად, დაახლოებით, 63 კმ-მდე გზის რეაბილიტაცია ჩატარდება. ამის შესახებ ინფორმაცია საავტომობილო გზების დეპარტამენტმა გაავრცელა. აღმოჩნდა, რომ გასახორციელებელი პროექტის ნუსხაში არაა ლანჩხუთის მუნიციპალიტეტის არც ერთი საგზაო მონაკვეთი, რაც ადგილობრივთა გულისწყრომის მიზეზი გახდა.
როგორც ზემოთ ნახსენებმა უწყებამ გაავრცელა ინფორმაცია, გზების რეაბილიტაციის პროექტზე ხელშეკრულება უკვე გაფორმდა. ხელშეკრულებაზე ხელი საქართველოს საავტომობილო გზების დეპარტამენტის თავმჯდომარის მოადგილემ სალომე წურწუმიამ და საერთაშორისო ტენდერში გამარჯვებული კომპანიის “China Road and Bridge Corporation”-ის წარმომადგენელმა Wang Fuhua-მ მოაწერეს.
საავტომობილო გზების დეპარტამენტის განმარტებით, პროექტი 7 ლოტად გახორციელდება.
“რეაბილიტაცია ჩაუტარდება შემდეგ საგზაო მონაკვეთებს: ჩოხატაური-ბახმაროს გზის 24.5 კმ-იან მონაკვეთს, ჩოხატაური-ზომლეთის გზის 10.3 კმ-იან მონაკვეთს, ოზურგეთი-ნატანები-ურეკის გზის 2.8 კმ-იან მონაკვეთს და საჯავახო-ჩოხატაური-ოზურგეთი-ქობულეთის გზის 25.6 კმ-იან მონაკვეთს.
პროექტის ფარგლებში, აღნიშნულ საგზაო მონაკვეთებზე დაგეგმილია: გზის საფუძვლის განახლება და გაუმჯობესება, ახალი ხელოვნური ნაგებობების (წყალგამტარი მილები, საყრდენი კედლები და სხვა) მოწყობა, ახალი ასფალტ-ბეტონის საფარის მოწყობა, მოძრაობის უსაფრთხოების გაუმჯობესება, საგზაო ნიშნების მოწყობა და გზის სავალი ნაწილის მონიშვნა და შემოფარგვლა.
აღნიშნული სამუშაოები, სრულად მოაწესრიგებს სარეაბილიტაციო მონაკვეთებზე საგზაო ინფრასტრუქტურას, რაც უსაფრთხო და კომფორტულ გადაადგილებას უზრუნველყოფს. შემცირდება მგზავრობის დრო და ხარჯები.
სამუშაოები ეტაპობრივად, 18 თვის განმავლობაში დასრულდება. პროექტის ჯამური ღირებულება 58.5 მლნ. ლარს შეადგენს”, _ აღნიშნულია ინფორმაციაში.
სწორედ ამ ინფორმაციამ გააჩინა ლანჩხუთელთა დიდ ნაწილში კითხვა _ არის თუ არა ლანჩხუთი გურია?!
“ლანჩხუთი სარჩევშიც არაა ნახსენები! დაფინანსება ლობისტებზეა დამოკიდებული ეტყობა და აჰა. ავტობანი არავინ ახსენოს აქ! ზემოთ ჩამოთვლილი არც ერთი არაა საერთაშორისო მნიშვნელობის გზა! ლანჩხუთი დაავიწყდათ თუ გურია არაა?” _ ასეთი გამოხმაურება მოჰყვა ლანჩხუთელთა მხრიდან ზემოთ ნახსენები ინფორმაციის გავრცელებას.
როგორც მოსახლეობა ამბობს, ჰქონდათ მოლოდინი, რომ ლანჩხუთი-ბახმაროს უმოკლესი გზის რეაბილიტაცია, სოფელ აკეთის მიმართულებით, მოკლე პერიოდში მოხდებოდა.
“როგორც ჩანს, ლანჩხუთი საერთოდ არაა გურიის რუკაზე აღნიშნული, მით უმეტეს, სოფელი აკეთი. ამდენი წელია, გვპირდებიან ამ გზის გაკეთებას, მარა, სამწუხაროდ, დაპირებების მეტი არაფერი გვესმის. ადგილობრივი ხელისუფლებისგან გვქონდა ინფორმაცია, რომ რახან ადგილობრივი სახსრები ვერ გაწვდებოდა და ვერ მოხერხდებოდა ამ პრობლემის მოგვარება, გზების დეპარტამენტი გაახორციელებდა სამუშაოებს, თუმცა, ნურას უკაცრავად, საერთოდ არ ვართ სათვალავში”, _ ამბობენ ლანჩხუთელები.
როგორც მოსახლეობის გულისწყრომის პასუხად ხელისუფლების წარმომადგენლები განმარტავენ, ქვეყნის მასშტაბით, ყველა გზის მოწესრიგება განიხილება, ოღონდ ეტაპობრივად და გამონაკლისი არც ზემოთ ნახსენები აკეთის გზაა.
ლანჩხუთის მუნიციპალიტეტის მერიის ინფრასტრუქტურის სამსახურის უფროსის ლევან ჩხაიძის თქმით, საავტომობილო გზების დეპარტამენტის პროგრამით ლანჩხუთში გზის რეაბილიტაცია გახორციელდა ნიგოითისა და ლესის მონაკვეთებზე:
“ლანჩხუთში უკვე გახორციელდა, ნიგოითის მონაკვეთი ახლა მთავრდება. საავტომობილო გზების დეპარტამენტმა პირველ ეტაპზე ნიგოითსა და ლესის მონაკვეთები გააკეთა და ჩემი ინფორმაციით სამუშაოების მეორე ეტაპი მოიცავს სწორედ ოზურგეთსა და ჩოხატაურს. რაც შეეხება აკეთის გზას, მისი რეაბილიტაცია სხვა პროგრამით უნდა მოხდეს, თუმცა, კონკრეტული ვადების თქმა მიჭირს”, _ გვითხრა ჩხაიძემ.
