ოზურგეთის მუნიციპალიტეტის სოფელ შემოქმედში მცხოვრები მარტოხელა პენსიონერი, შორენა სიმონიშვილი, უკვე მერამდენე წელია, საკუთარ კარმიდამოში ენერგოსისტემის წარმომადგენელთა მიერ გადაჭრილ, ძირზე მოჩეხილ ხეხილოვნებს დასტირის და ითხოვს, ყურადღება მიაქციონ.
_ რამდენიც გინდა, ეხვეწე, რომ ფრთხილად გადაჭრან და ნუ მოჩეხავენ ასე უმოწყალოდ. გვეჩქარება, კოლოვატსაათები იკარგება და სხვაგანაც სამუშაო გვაქვსო, გაიძახიან. ხის მოჭრა და სიჩქარე იქნება?!_ ამბობს ქალბატონი შორენა.
“გურია ნიუსი” აღნიშნულ პრობლემაზე სამი წლის წინაც წერდა. თუმცა, როგორც მაშინ, ახლაც ენერგო-პრო ჯორჯიას” მესვეურთა პასუხი კვლავ ოფიციალური და სიმონიშვილის სასარგებლოდ არაფრისმთქმელია. ისინი ამბობენ, რომ მაღალი ძაბვის ხაზების გასწვრივ, ათი მეტრის დაშორებით, არ უნდა არსებობდეს საფრთხის შემცველი წინაღობები, რაც ადამიანის თუ ცხოველის სიცოცხლის მოსპობას გამოიწვევს. ამავე დროს, შეაფერხებს ელექტროენერგიის მიწოდებას.
შორენა სიმონიშვილის ტირილით ნაამბობი კი ძნელად მოსასმენია ადამიანისთვის:
_ შემოვიდნენ ამჯერადაც და ასეთი ხეხილოვნები _ ბალი, ვაშლი, ხურმა, მსხალი და თხილის ხეები დაუნდობლად გამიჩეხეს. დანომრეს თითქმის ასწლოვანი ხეები, ბებია-ბაბუების დარგული. აქ მაღალი ძაბვის ხაზები კომუნისტების დროს გაყვანილია. არც მაშინ უკითხავს ვინმეს ეს ჩვენთვის. სახელმწიფოს ჭირდებაო, უთქვამთ და მორჩა. კი, ბატონო, ჭირდებოდეს, არც კანონს ვეწინააღმდეგები, არც _ სახელმწიფოს, მაგრამ რა ვქნა მარტოხელა პენსიონერმა? ამ გაჩეხილ ხეებს მარტო როგორ ვეპატრონო, მუშა უნდა დავიქირავო? საამისოდ კი ორი თვის პენსია არ მეყოფა. ტყუილად ვინ იმუშავებს? მუშახელიც შოვნაც ჭირს სოფელში. ასე წავიდა საქმე… ვენახი ნახე, როგორ აჩეხეს. მარტო შაჰ აბასი თუ შვებოდა ამას, ალბათ… ჩემი უფლება არ ირღვევა, კაცო? უფლებების დაცვაზე რომ ყვირის ყველა, ტელევიზორი ვერ ჩამირთავს… ვინაა პატრონი, გამაგებინეთ. ჩემს ეზოში დამაყენონ. თუ ჭრიან, ისე მოჭრან, აჩეხილისგან განსხვავდებოდეს და კომპენსაციას თუ არ მაძლევენ, ეს მაინც გაკაფონ და შეშა დამიყარონ. რა ვქნა, მითხარით? მე მეტი არ შემიძლია, თორემ მაგათი მათხოვარი არ ვარ, _ ტირის ქალბატონი შორენა და ამბობს, რომ უკვე არავის იმედი არ აქვს.
შორენა სიმონიშვილის საკარმიდამო ნაკვეთში, სადაც ძველისძველი გურული ოდა სახლი დგას და ხეხილოვნებიც აშკარად დიდი ხნის წინ დარგულია, საფუძველს მოკლებულია ზოგი ენერგომუშაკის აზრი, რომ აქ მაღალი ძაბვის ხაზების გაყვანის შემდეგ მოხდა ნაკვეთის საკუთრებაში მიზომვა. სადენები სახლიდან არც ისე შორ მანძილზეა გაჭიმული და იქვე არსებული ძველი სამშენებლო ადგილებიც, ეჭვგარეშეა, საუკუნოვანია.
ქალბატონი შორენა გვახსენებს სამი წლის წინანდელ ამბავს, როცა ხეხილოვნები მოუჭრეს და მერე მისი შეშად დამუშავებაც ვერ მოახერხა.
_ წამოდით და ნახეთ. აგერ ყრია, როგორ დალპა, ხედავთ? მუშა ვერ მოვიყვანე, რომ დამეხერხა. პენსიით წამლები ვიყიდო, პური თუ შაქარი? კი დალპა ამხელა მორები. მე მჩაგრავენ, მიჯაბნიებენ. ასე გაჩეხვა და დაყრა რომელ კანონში უწერიათ? რატომ ვერ გაიგო ამ ხალხმა, რომ მარტოხელა ვარ? თუმცა, კი გაიგეს და სწორედ ამიტომ მერევიან, თორემ ასე უგულოდ არ მომექცეოდნენ, _ ნერვიულობს და ტირის ქალბატონი, რომელსაც სრული საფუძველი აქვს იმისთვის, რომ საკუთარი უფლებების დაცვა მოითხოვოს.
მან გადაწყვიტა, აღნიშნულ ადგილზე საბოლოოდ მოჭრას და აიღოს ხეხილოვანი და წიწვოვან-ფოთლოვანი მცენარეები. სანაცვლოდ კი ბოსტანი შემოსაზღვროს. ამბობს, რომ ასეთი ნაბიჯით, საბოლოოდ მოგვარდება პრობლემა და მის ეზოში, როგორც თავად ამბობს: “შაჰ აბასივით არ ითარეშებენ”. თუმცა, ამბობს იმასაც, რომ მარტო არ შეუძლია ამის გაკეთება. საამისოდ არც ფიზიკური ღონე გააჩნია და არც ეკონომიკური საშუალება აქვს, რომ დაქირავებული პირები დაიხმაროს.
“გურია ნიუსი” “ენერგო-პრო ჯორჯიას” ოზურგეთის სერვისცენტრის მენეჯერს, გია ნაკაიძეს დაუკავშირდა. გვითხრა, რომ შორენა სიმონიშვილის პრობლემა მისთვის ცნობილია.
_ მაღალი ძაბვის ხაზები გადის მის საკარმიდამო ნაკვეთში, რაც ჯერ კიდევ კომუნისტების მმართველობის დროს არის გაჭიმული. ეს მემკვიდრეობად გადმოეცა ჩვენს კომპანიას, თორემ ახლა, როცა ასეთი სამუშაოები სრულდება, შეთანხმების გარეშე არავის ეზოში შევდივართ ან გატანილია საკუთრების გარეთ. სადაც ადრიდანვე არის, ბუნებრივია, რომ არ მოხდეს უბედური შემთხვევა და ამავე დროს ტყუილად არ დაიკარგოს ელექტროენერგია, პერიოდულად ტარდება ათი მეტრის სიახლოვეს ხეების ტოტების გამოხშირვა. ეს არის წესი და კანონი, რასაც ვერავინ აუვლის გვერდს. ასეთი პროცესის ჩატარების გამო, არაა გათვალისწინებული არც კომპენსაცია. ვთქვათ და, მაღალი ძაბვის ხაზებში, მაღალი ხეების ტოტები გაეჩხირა, რაც აუცილებლად უბედურ შემთხვევას გამოიწვევს, ვის დასჯიან? იყო ფაქტები, რომ პირუტყვი დაიღუპა… რა ვქნათ ასეთ დროს? პასუხისმგებლობა მთლიანად ჩვენ დაგვეკისრება. ამიტომ, სხვა გზა არ არის _ უნდა გაიკაფოს. რამდენად სწორად მოხდა ეს, არის თუ არა ზედმეტად დაზიანებული ამ ქალბატონის კარმიდამოში მრავალწლოვანი ხეები, ადგილზე გავეცნობი. ახლა ოზურგეთში არ ვიმყოფები, _ გვითხრა გია ნაკაიძემ.
იგი, ასევე, შეგვპირდა, რომ მოჭრილი ხეების გაკაფვასა და სასეშედ დალაგებაში თუ შეძლებენ სიმონიშვილის ფიზიკურ დახმარებას, დათვალიერების შემდეგ გვეტყვის.
“გურია ნიუსი”, ასევე, ესაუბრა ოზურგეთის მუნიციპალიტეტის მერის მოადგილეს, ირაკლი სირაძეს. მან აღგვითქვა, რომ გაეცნობა მარტოხელა პენსიონერი ქალბატონის მდგომარეობას და შესაძლებლობის ფარგლებში დაეხმარებიან.
_ მაქსიმალურად ვეცდები, ადგილზე მისვლით გავეცნო ამ ქალბატონის მდგომარეობას და დავეხმაროთ. ზოგადად კი, სადენების გასწვრივ ხეების გადაკაფვა ჩემს საკუთრებაში არსებულ კარმიდამოშიც მოხდა. მაქსიმალურად ვეცდებით, დავეხმაროთ ამ მარტოხელა ქალბატონს, _ გვითხრა ირაკლი სირაძემ.
