მანქანები, რომლებიც ლატვიაში ალკოჰოლის ზემოქმედების ქვეშ მყოფ მძღოლებს ჩამოერთმევათ, უკრაინულ არმიას უფასოდ გადაეცემა. აღნიშნული საკანონმდებლო ცვლილება 16 თებერვალს ლატვიის სეიმმა საბოლოო მოსმენით მიიღო.
როგორც ლატვიის პარლამენტის წარმომადგენლები ამბობენ, ახალი ცვლილებები მიზნად ისახავს უკრაინელი საზოგადოების მხარდაჭერას.
„ჩვენ შეგვიძლია ალკოჰოლის ზემოქმედების ქვეშ მყოფი მძღოლებისთვის ჩამორთმეული მანქანების რეალიზაცია მოვახდინოთ მათი გაყიდვით ან ნაწილებად დაშლით, ჩვენ ვხედავთ, რომ არსებულ ვითარებაში ისინი უფრო სასარგებლო იქნებოდა უკრაინელი ერის მხარდასაჭერად”, – განაცხადა თავდაცვისა და შინაგან საქმეთა კომისიის თავმჯდომარემ, დეპუტატმა რეიმონდ ბერგმანისმა.
მისივე ინფორმაციით, ლატვიის მთავრობა ყველა შემთხვევას ინდივიდუალურად განიხილავს. მანქანები კი გადაეცემათ იმ ორგანიზაციებს, რომლებიც უკრაინის მთავრობასთან თანამშრომლობენ და დახმარების თხოვნებს იღებენ.
ცნობისთვის, 2022 წლის ოქტომბერში ლატვიის სეიმმა დაამტკიცა კანონი ნასვამ მდგომარეობაში მართვის კრიმინალიზაციის შესახებ. ამის შემდეგ, კოალიციამ მიაღწია შეთანხმებას, რომ ნასვამი მძღოლებისგან ჩამორთმეული მანქანები შეიძლება გადაეცეს უკრაინის არმიის საჭიროებებს.
მანქანის ჩამორთმევა მოხდება იმ შემთხვევაში, თუ ორგანიზმში ალკოჰოლის კონცენტრაცია აღემატება 1,5 პრომილს, ასევე მძღოლი, რომელიც ნარკოტიკული თრობის ქვეშ იმყოფება ან თუ უარს განაცხადებს ტესტირებაზე.
ჩამორთმეული მანქანები ლატვიის სახელმწიფო სააგენტოს ავტოსადგომებზე ინახებოდა, რის შემდეგაც მათი აუქციონზე გაყიდვა ხდებოდა.
მანამდე ასევე გავრცელდა ინფორმაცია, რომ ლატვია უკრაინას გადასცემს Stinger საჰაერო თავდაცვის სისტემებს, ვერტმფრენებს, ტყვიამფრქვევებსა და დრონებს.
ავტორი
