“ლელო” “ოცნებას” ამომრჩევლის მოსყიდვაში ადანაშაულებს, “ოცნება“ კი ამბობს, რომ „ლელო“ დამარცხებისთვისაა“ განწირული

პარტია “ლელოს” ერთ–ერთი ლიდერი ვატო სურგულაძე განცხადებას ავრცელებს და გურიის ადგილობრივ ხელისუფლებას ამომრჩევლის მოსყიდვაში ადანაშაულებს.

ვატო სურგულაძე: “ყველას კარგად გვახსოვს წლევანდელი ზამთარი. ძალიან დიდი თოვლი მოვიდა და ძალიან ბევრი სახლი დააზიანა, ზოგი _ დაინგრა, ზოგს _ სახურავი ჩაენგრა.

ჩვენ მაშინ გურიაში ვიყავით და დახმარება გავუწიეთ მოსახლეობას. რა დახმარება გაუწია მათ სახელმწიფომ ამ განმავლობაში?! მხოლოდ დაიწყეს სახურავების ყიდვა და დაზარალებულებისთვის თანხების მიცემა. რატომ ხდება ეს ყველაფერი აგვისტოს ბოლოს და სექტემბერში? მთელი ზაფხული დაზიანებულ სახლებში წყალი ჩადიოდა, ადამიანები ახლობლებთან გადავიდნენ საცხოვრებლად.

ნუთუ არ შეიძლებოდა, უფრო ადრე დახმარებოდნენ ადამიანებს და არა ახლა, წინასაარჩევნოდ? რეალურად შეეძლოთ უკვე მაისში დაემთავრებინათ გადახურვა, თანხების გაცემა… აქედან გამომდინარე ვამბობ, რომ ეს, რაც ეხლა ხდება გურიაში, არის ამომრჩევლის მოსყიდვა“, _ ამბობს ვატო სურგულაძე.

პარტია “ლელოს” ოზურგეთის რაიონული ოფისის ხელმძღვანელი, ლადო ქვილორია: “წლევანდელმა დიდთოვლობამ დააზიანა ბევრი საცხოვრებელი სახლის, სახურავები. მთავრობამ კი ხუთი თვის შემდეგ, წინასაარჩევნოდ დაიწყო მოსახლეობისთვის სახურავების მიწოდება, და თანხების ჩარიცხვა. ეს იმისთვის ხდება, რომ არჩევნებზე ხმები მიიღონ“.

“ქართული ოცნების” ოზურგეთის ორგანიზაციის თავმჯდომარე დავით დარჩია “გურია ნიუსთან” სატელეფონო საუბრის დროს ამბობს, რომ “ლელოს” წევრების ეს განცხადება პოპულიზმია:

“ყველამ კარგად იცის, დიდთოვლობამ რა პრობლემები შექმნა რეგიონში და მათ შორის, ოზურგეთში. ყველაფერს აკეთებს ხელისუფლება, რომ დაზარალებულ ოჯახებს გვერდით დაუდგეს და შესაბამისად, ეხმარება.

ძალიან კარგად იცის “ლელომ“, როგორ არიან ისინი განწირულები არჩევნებში დასამარცხებლად და ახლა ასეთი განცხადებებით არიან დაკავებულები. რა ვქნათ? არ დავეხმაროთ ადამიანებს?” _ კითხვას სვამს დარჩია.

“გურია ნიუსი” დაუკავშირდა ოზურგეთის მუნიციპალიტეტის მერიის პრესსამსახურს. ჩვენ დავინტერესდით, თუ რა ეტაპზეა დიდთოვლობის გამო დაზარალებული ოჯახების დახმარების პროცესი, თუმცა, პასუხი, ჯერჯერობით, ვერ მივიღეთ.

და ბოლოს, ოზურგეთის მუნიციპალიტეტის საკრებულოს ერთ-ერთ ბოლო  სხდომაზე,  2025 წლის კვარტლის ანგარიშის წარდგენის დროს გაირკვა, რომ ოზურგეთის მერიაში თებერვლის დიდთოვლობის შედეგად დაზარალებული მოქალაქეებისგან 4 047 განცხადება შევიდა.