ცნობილი ქართველი რეჟისორი ლევან კოღუაშვილი გურიაში იმყოფება და ერთ კვირაში მის ახალ ფილმზე „გურია“-ზე გადაღებებს დაიწყებს.
ლევან კოღუაშვილი „გურია ნიუსთან“ საუბრის დროს ამბობს, რომ ფილმში, თბილისიდან მოწვეულ მსახიობებთან ერთად ოზურგეთის თეატრის მსახიობებიც მიიღებენ მონაწილეობას.
„მოქმედება 90-იან წლებში გურიაში ხდება. სადაც სიყვარულის და მეგობრობის ისტორია იქნება ნაჩვენები, რომელიც იმ პერიოდის გურულ ყოფას გადმოსცემს. ბევრი ამბავი არის დაფუძნებული რეალურ ფაქტზე. თავიდან ინსპირაციის წყარო იყო გიორგი კეკელიძის „გურული დღიურები“. პირველად, რომ წავიკითხე ეს წიგნი მომეწონა: ეპოქა, დრო და გაჩნდა სურვილი ამ თემაზე ფილმი გადაღებულიყო.
შემდეგ ჩამოვედით გურიაში მე და გიორგი კეკელიძე, რაღაც მასალები ავაგროვეთ და შემდეგ დავწერეთ სცენარი. ვეცდებით მოვყვეთ ადამიანური ისტორია, სადაც ნაჩვენები იქნება გურული ხასიათი და უნარი…“ – გვითხრა ლევან კოღუაშვილმა.
ფილმს სამი სცენარისტი ჰყავს: ბორის ფრუმინი, ლევან კოღუაშვილი და გიორგი კეკელიძე.
ფილმის გადაღება გერთ კვირაში იწყება და ფილმის პრემიერა მომავალ წელს შედგება.
ფილმის ერთ-ერთმა სცენარისტმა, გიორგი კეკელიძემ სოციალურ ქსელში უკვე გაავრცელა ინფორმაცია.
„ჩემი და ლევან კოღუაშვილის სცენარის – “გურია”. რეჟისორი ლევან კოღუაშვილი – მორიგი წარმატება: დღეს უდიდესი ნორვეგიული კინო-ფონდის კონკურსის გამარჯვებული გავხდით. შესაბამისად, ფილმი უკვე ექვსი ქვეყნის (საქართველო, შვეიცარია, ნორვეგია,თურქეთი, ბულგარეთი, ლუქსემბურგი) კო-პროდუქციია, ასევე ერთი მსხვილი კერძო ჰოლანდიური ფონდის და რაც მთავარია ,,ევრიმაჟის” (ევროკავშირის კინო-ფონდი) კონკურსის გამარჯვებული და კანის ფესტივალის ინდუსტრიულ სექციაში შერჩეული. სცენარი #გურულიდღიურები ს მოტივებს დაეფუძნა და შემდეგ უკვე დამოუკიდებლად განვავითარეთ,“ – წერს გიორგი კეკელიძე.
მთავარ როლებში იქნებიან: ნათია ნიკოლაიშვილი, კახა ჭოლაძე, ვამეხ ჯანგიძე.
ავტორი
