ორგანიზაცია „ახალგაზრდა ადვოკატები“ ბიზნესმენ რამაზ ახვლედიანის ლისის ტბის დათმობის საქმეზე, საქართველოს მთავარ პროკურატურაში მიმდინარე სამართალწარმოების ეტაპზე მნიშვნელოვანი მოწმის დაკითხვის შესახებ განცხადებას ავრცელებს.
კერძოდ, ორგანიზაციის ცნობით, საქართველოს სახალხო დამცველის აპარატის მხრიდან ორგანიზაციის მიმართ, საქმის მონიტორინგის ფარგლებში მოწოდებული წერილის თანახმად, საქართველოს მთავარ პროკურატურაში, მოწმის სახით დაიკითხა ნოტარიუსი ციური ბერიძე, თუმცა უცნობია, რა ჩვენება მისცა გამოძიებას დაკითხულმა მოწმემ.
„ახალგაზრდა ადვოკატების“ ხელმძღვანელმა, რამაზ ახვლედიანის ადვოკატმა, არჩილ კაიკაციშვილმა საქართველოს მთავარი პროკურატურის მიმართ 2017 წლის 13 თებერვლის გაგზავნილ წერილში, ბიზნესმენის მიმართ წართმეული ქონების გამოძიების პროცესში, დამატებითი პირების დაკითხვის მოთხოვნა დააყენა.
მათ შორის, მოითხოვა ნოტარიუსის დაკითხვის უზრუნველყოფაც.
„სწორედ აღნიშნული პიროვნებაა ის ნოტარიუსი, რომელთანაც 2006 წლის 4 ნომბერეს შესრულდა ბიზნესის წართმევის, სახელმწიფოს მიმართ დათმობის განცხადების ნების საწინააღდმეგოდ ნოტარიულად დამოწმება. თბილისში, ი. ჭავჭავაძის გამზირზე მდებარე სანოტარო ბიუროში რამაზ ახვლედიანი, მაშინდელი ფინანსური პოლიციიდან, ღამის საათებში, საკუთარი სამსახურეობრივი ავტომობილით, განსაკუთრებით მნიშვნელოვან საქმეთა სამმართველოს II განყოფილების მაშინდელი უფროსის გიორგი ხ.-ის თანხმებით მივიდა. სწორედ ციური ბერიძემ უთხრა რამაზ ახვლედიანს, რომ ის, იმ ღამით, უკვე „ქვეყნის მე-15 პატრიოტი იყო“ და განსაკუთრებით მნიშვნელოვან საქმეთა სამმართველოს II განყოფილების მაშინდელი უფროსს, გიორგი ხ-ს მიმართავდა, თუ „სად პოულობდა ამდენ პატრიოტს?!“, _ აცხადებენ ორგანიზაციაში
„ახალგაზრდა ადვოკატები“ მიესალმება საქართველოს მთავარი პროკურატურის მოქმედებებს, ლისის ტბის წართმევის საქმეზე დაიწყოს მთავარი მოწმეების დაკითხვის პროცესი.
„ნოტარიუსის დაკითხვა, მოცემულ საქმეზე, საკმარისი არ არის, ვინაიდან გამოძიების მიუკერძოებლობის პრინციპებიდან გამომდინარე, აუცილებელია მომჩივანი მხარის მიერ დასახელებული ყველა მოწმის დაკითხვა კანონის სრული დაცვით მოხდეს, მათ შორის პროკურატურამ დროის მოკლე ვადებში უნდა მივიდეს გადაწყვეტილებამდე, რომ საქმეზე დაიკითხოს რამაზ ახვლედიანის ბიზნეს-პარტნიორი, მამუკა ხაზარაძე.
„ახალგაზრდა ადვოკატების“ შეფასებით, პროკურატურის მთავარი ამოცანაა, სწორი სამართლებრივი კვალიფიკაცია მისცეს 2006 წლის 4 ნოემბერს, რამაზ ახვლედიანის ფინანსურ პოლიციაში დაბარების ფაქტს, სადაც ბიზნესმენს დააწერინეს განცხადება ლისის ტბის სახელმწიფოს სასარგებლოდ დათმობის თაობაზე. საქმის მასალებიდან დასტურდება, რომ რამაზ ახლედიანი იძლებული გახდა, თბილისის მაშინდელი მერიისა და მთავრობის სახელზე დაეწერა განცხადება და ეღიარებინა, რომ 1999 წლის საიჯარო ხელშეკრულებით, ასევე პრეზიდენტის 2006 წლის 14 ივლისის განკარგულებით ნაკისრი ვალდებულებები ვერ შეასრულა და მოითხოვა საიჯარო ხელშეკრულების გაუქმება, რომლის მიხედვითაც, მას გადაეცა ლისის ტბის მიმდებარე ტერიტორიაზე განლაგებული შენობა – ნაგებობები და რომელიც ბიზნესმენს უკვე გამოსყიდული ჰქონდა. წერილში, ნების საწინააღმდეგოდ, რამაზ ახვლედიანმა უარი განაცხადა პრეზიდენტის განკარგულებით გადაცემულ 63,5 ჰა არასოსაფოლო–სამეურნეო დანიშნულების მიწის ნაკვეთის საკუთრებაში მიღების უფლებაზეც და ეკონომიკის სამინისტროსგან უკვე გამოსყიდულ შენობა–ნაგებობებზეც. ამ განცხადებიდან მე-6 დღეს, 2006 წლის 10 ნოემბერს, მიხეილ სააკაშვილმა გამოსცა ახალი განკარგულება და 1999 წელს რამაზ ახვლედიანის მიერ შეძენილი და 2006 წელს პრეზიდენტის განკარგულებითვე გადაცემული ქონება, ჩამოერთვა“, _ აცხადებს არჩილ კაიკაციშვილი.
მისივე თქმით, საქმის ფაქტობრივი და სამართლებრივი გარემოებებიდან გამომდინარე, გამოძიება უნდა დაჩქარდეს და რამაზ ახვლედიანი დაზარალებულად იქნეს ცნობილი.
„იმავდროულად, დადგეს კონკრეტული თანამდებობის პირთა სამართლებრივი პასუხისმგებლობის საკითხი, რომლებმაც მოახდინეს რამაზ ახვლედიანის იძულება ქონების დათმობის მიზნით. იქედან გამომდინარე, რომ მხარის მაღალი იურიდიული ინტერესია, საქმეზე ეფექტური საგამოძიებო მოქმედებების განხორციელება და გამოძიებისთვის საქმეზე ყოველმხრივი მტკიცების მიწოდება, მოცემულ ეტაპზე, საჭიროდ მიგვაჩნია, საქმეზე მოწმის სახით დაიკითხოს იმ პირთა წერე, რომლებსაც უშუალო შემხებლობა ჰქონდათ ქონების დათმობის პროცესთან და დაადასტურებენ რამაზ ახვლედიანის მიმართ განხორციელებულ უკანონო მოქმედებებსა და იძულებას, რაც გამოძიებას საშუალებას მისცემს აღადგინოს მოქალაქის დარღვეული უფლებები და დაიცვას მისი ჭეშმარიტი ინტერესები“, _ აღნიშნავს ორგანიზაცია ახალგაზრდა ადვოკატები“.
ლისის ტბის წართმევის საქმეზე გამოძიება საქართველოს მთავარი პროკურატურის სამართალწარმოების პროცესში ჩადენილი დანაშაულის გამოძიების დეპარტამენტში მიმდინარეობს. საქმეზე მონიტორინგს ახორციელებს საქართველოს სახალხო დამცველის აპარატიც.
„გურია ნიუსი“ კი აღნიშნულ საქმეზე რამდენიმე თვეა ჟურნალისტურ გამოძიებას აწარმოებს.
ჩვენს მიერ მოპოვებული და გამოქვეყნებული მასალებიდან ირკვევა, რომ ბიზნესმენ რამაზ ახვლედიანს, რომლის საკუთრებაშიც ლისის ტბის მიმდებარედ რამდენიმე ჰექტარი ტერიტორია იყო, უკანონოდ დაათმობინეს ქონება, რომელიც მოგვიანებით მისი ბიზნესპარტნიორის, მამუკა ხაზარაძის საკუთრებაში აღმოჩნდა.
არაერთგზის მცდელობის მიუხედავად, მამუკა ხაზარაძე საქმესთან დაკავშირებით გაჩენილ კითხვებს არ პასუხობს. ბიზნესმენი რამაზ ახვლედიანი კი, სამართლიანობის აღდგენას და წლებია უშედეგოდ ელის.
ამავე თემაზე:
როგორ აღმოჩნდა ყოფილი მფლობელისთვის წართმეული ლისის ტბა მამუკა ხაზარაძის საკუთრებაში
შუაღამისას „საკუთარი ნებით დათმობილი” ქონება, ანუ როგორ დაკარგა ბიზნესმენმა „ლისის ტბა“ – ნაწილი I
უპასუხო კითხვები ლისის ტბის საქმეში
მაღალჩინოსნები და ბიზნესმენები დასაკითხ პირთა სიაში _ რა ეტაპზეა ლისის ტბის საქმის გამოძიება
