კორონავირუსთან დაკავშირებით ლანჩხუთის მუნიციპალიტეტის მერიაში პრესკონფერენცია გაიმართა, სადაც საუბრის ერთ-ერთი თემა სავაჭრო ობიექტებში არსებული სასურსათო მარაგი და პროდუქტებზე ფასები იყო.
მერის ალექსანდრე სარიშვილის თქმით, ლანჩხუთში, სავაჭრო ობიექტებში სასურსათო მარაგის ნაკლებობა არ ფიქსირდება და ფასების ზრდასთან დაკავშირებითაც ყოველდღიურ რეჟიმში მიმდინარეობს კონტროლი.
„ერთადერთი, შაქარზე გაიზარდა ფასი და ბურღულეულზე, დანარჩენ პროდუქტებზე კი ძველი ფასებია შენარჩუნებული“, _ თქვა მერმა.
სავაჭრო ობიეტებში საკვების პროდუქტების მარაგის სიმცირეს ლანჩხუთში არც რიგითი მოქალაქეები უჩივიან, თუმცა, მათი უკმაყოფილება, რომელსაც საჯაროდ აფიქსირებენ, სწორედ რომ შაქრის გაძვირებას უკავშირდება. თუ წინა დღეებში ლანჩხუთის მაღაზიებში ერთი კილოგრამი შაქრის ფასი, მაქსიმუმ, ერთი ლარი და 50 თეთრი იყო, ახალ მისი ფასი 1,80-დან ორ ლარამდე მერყეობს.
„რა აზრი აქვს ხალხი კორონათი მოკვდება თუ შიმშილით?! ისედაც გაჭირვებულ ადამიანს გასაჭირში რომ მაზოლზე დააჭერ ფეხს, სირცხვილზე მეტია.
ლანჩხუთი საკმაოდ პატარაა, ყველა ყველას იცნობს, გამოვძვრებით ამ გასაჭირიდან, თუმცა, ყველას ემახსოვრება, რომ გაჭირვების დროს ვიღაცამ თავის მაღაზიაში ხელოვნურად გაუძვირა პროდუქტი მეზობელს, ნათესავს, მეგობარს, ნაცნობს თუ უცნობს. კიდევ ნისიად რომ არ გაატანეს მას, ვისაც მანამდე ატანდნენ“, _ ამბობს პროდუქტზე ფასის გაზრდით უკმაყოფილო მოსახლეობა.
შაქარზე ფასის ზრდასთან დაკავშირებით საკუთარ ბრალეულობას ვერ ხედავენ თავად მაღაზიის მფლობელები.
„ჩვენ, მაღაზიის მეპატრონეებს, გვირჩევნია დაბალი ფასები, მაგრამ ბობოლა ხალხის საწყობები გვიძვირებენ საქონელს. „თევზი თავიდან ყარს“. ფაქტურას განახებთ, 12-ში რა ფასად შემოვიტანე საქონელი და 14-ში რა ღირდა, ეს ყველაფერი არ იცის ხალხმა. ერთი კილო შაქარი რომ გავყიდე, ერთ ტომარაზე სამი ლარი დამრჩა და დღესაც რომ ვყიდი, მოგება იგივე მაქვს.
მაღაზიას რას ერჩით, შემომტანი შეამოწმეთ. მაგრამ ეს ხომ საქართველოა, წვრილფეხობა უნდა დასაჯოთ, აბა, მსხვილფეხობას ხომ არ გაუბედავთ რამეს“, _ მოსახლეობის მხრიდან შაქარზე ფასის მატების გამო გამოთქმული უკმაყოფილების პასუხად სოციალურ ქსელში წერს ერთ-ერთი მაღაზიის მეპატრონე.
