,,ვულოცავ გიორგის და ძალიან მალე მიმელოცოს ყველა იმ ადამიანისთვის და პოლიტპატიმრისთვის, ვისითაც სავსეა საქართველოს ციხეები. პირველ რიგში და უმთავრესად ნიკა მელიას ვგულისხმობ და ასევე ყველა იმას“, _ ამის შესახებ “მთავარი არხის” გენერალური დირექტორმა და დამფუძნებელმა ნიკა გვარამია გიორგი რურუას განთავისუფლებასთან დაკავშირებით განაცხადა.
მისი თქმით, საქართველო პოლიტიკური პატიმრებით და დევნილებით „დახუნძლულია“.
ასევე, მან აღნიშნა, რომ თუ მართლა გვინდა რომ ამ ქვეყანაში ცხოვრება გადავფურცლოთ და მართლა კრიზისები განიმუხტოს, უნდა გავათავისუფლოთ პოლიტპატიმრები.
„პირველ რიგში, უნდა ვთქვა, რომ ეს ერთი და სხვა მრავალი. ეს ქვეყანა დახუნძლულია პოლიტიკური პატიმრებით, პოლიტიკური დევნილებით… მუდმივად, ამ პერიოდის განმავლობაში, არ მტოვებდა იმის განცდა, რომ გიორგი მათ შორის, და პირველ რიგში, იმის გამო იყო ციხეში, რომ ჩვენს მიერ დაფუძნებული არხის ერთ-ერთი თანადამფუძნებელი იყო, ამიტომ ეს ძალიან დიდი სიმძიმე ჩვენ ყველას მოგვეხსნა. და რაც მთავარია, მოგვეხსნა ამ ძალიან დიდი სიხარულის ფორმით, რასაც მისი შეწყალება ერქვა. მე არ გავაკეთებ კომენტარს შექმნილ კონტექსტთან დაკავშირებით. ამ სასიხარულო წუთებში ამას არ გავაკეთებ ნამდვილად, იმიტომ რომ ბევრი რაღაცა მაშინ ცუდიც უნდა ვთქვა, მაგრამ რითიც დავიწყე იმით დავასრულებ – ვულოცავ გიორგის და ძალიან მალე მიმელოცოს ყველა იმ ადამიანისთვის და პოლიტპატიმრისთვის, ვისითაც სავსეა საქართველოს ციხეები. პირველ რიგში და უმთავრესად ნიკა მელიას ვგულისხმობ და ასევე ყველა იმას. ვისაც ჯერ კიდევ ელოდება ეს პატიმრობა და ასევე ყველა იმას, ვინც ქვეყანაში ვერ ჩამოდის, იმიტომ რომ ელოდება ეს პატიმრობა… ყველას, ყველას, ყველას. თუ მართლა გვინდა რომ ამ ქვეყანაში ცხოვრება გადავფურცლოთ და მართლა კრიზისები განიმუხტოს, უნდა მოხდეს სწორედ ეს. გიორგის ვულოცავ. ძალიან ბედნიერი ვარ და ყველაფერი კარგად იქნება, _ განაცხადა ნიკა გვარამიამ.
ცნობისთვის, გიორგი რურუას პატიმრობიდან გათავისუფლება მედიატორების მონაწილეობით ხელისუფლებასა და ოპოზიციას შორის მიღწეული შეთანხმების ერთ-ერთი ნაწილი იყო. დღეს ოპოზიციის ნაწილი, რომელმაც მედიატორის შარლ მიშელის დოკუმენტს ხელი მოაწერა, პარლამენტში დარეგისტრირდა. შესაბამისად, საქართველოს პრეზიდენტმა სალომე ზურაბიშვილმა გიორგი რურუას შეწყალების აქტს ხელი დღეს მოაწერა.
შეგახსენებთ, რომ “მთავარი არხის” ერთ-ერთი დამფუძნებელი და მეწილე გიორგი რურუა,2019 წლის 18 ნოემბერს დააკავეს. მას ბრალი სისხლის სამართლის კოდექსის 236-ე მუხლის მე-3 და მე-4 მუხლების მიხედვით წაუყენეს, რაც ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.
2020 წლის 30 ივლისს კი, თბილისის საქალაქო სასამართლომ რურუა წარდგენილ ბრალდებაში დამნაშავედ ცნო და სასჯელის სახით თავისუფლების აღკვეთა 4 წლის ვადით შეუფარდა.
