ბოლო სამ თვეში ორი ახალი თანამდებობა მისთვის შეიქმნა; მანამდე, სახელმწიფო უსაფრთხოების სამსახურის უფროსის პოსტზე სწრაფად გაეზარდა წოდებები; სუსში თანამდებობის დატოვების შემდეგ, უკვე გენერალი მდინარაძე, კვლავ „ქართული ოცნების“ პოლიტიკის ერთ-ერთი მთავარი სპიკერი გახდა.
18 მაისს, როდესაც სამართალდამცავი ორგანოების კოორდინაციის საკითხებში სახელმწიფო მინისტრი იყო, მამუკა მდინარაძემ პირველმა განაცხადა შსს-ს სისტემაში “სიძულვილის ენის წინააღმდეგ ბრძოლის სამმართველოს” შექმნის შესახებ. 28 ივლისს სამმართველოს მუშაობას შეშფოთებით გამოეხმაურა აშშ, რომელთანაც “ქართულ ოცნებას” ურთიერთობების სუფთა ფურცლიდან დაწყება სურს.
- უსაფრთხოების გენერალ-მაიორი მამუკა მდინარაძე სექტემბრის პირველ კვირამდე რეგიონული განვითარების მინისტრად იმუშავებს, ვიდრე ეს სამინისტრო გაუქმდება;
- შემდეგ მისი ტიტული კვლავ შეიცვლება და გახდება სახელმწიფო მინისტრი რეგიონული პოლიტიკის საკითხებში.
29 ივლისს, წარდგენისას, “ქართული ოცნების” მთავრობის პრემიერ-მინისტრმა ირაკლი კობახიძემ თქვა, რომ მდინარაძის ბოლო თანამდებობა – სამართალდამცავი ორგანოების კოორდინაციის საკითხებში სახელმწიფო მინისტრი – ამიერიდან საჭირო საერთოდ აღარ იქნება, რადგან მდინარაძემ ეფექტიანი კოორდინირების სისტემა უკვე ჩამოაყალიბა. მას არ აუხსნია, რატომ გახდა საკადრო გადაწყვეტილება აუცილებელი საპარლამენტო პროცედურებამდე (სამინისტროს გაუქმება და სახელმწიფო მინისტრის პოსტის შექმნა) და რას ცვლის მდინარაძის ნაჩქარევი გადაყვანა ახალ, დროებით თანამდებობაზე?
მამუკა მდინარაძე ახალ თანამდებობაზე დაინიშნა – ის რეგიონული პოლიტიკის საკითხებში სახელმწიფო მინისტრი იქნება
დააწინაურეს თუ დააქვეითეს? – ეს არის მთავარი შეკითხვა, რომელიც ძალოვანი ბლოკიდან მამუკა მდინარაძის რეგიონების მიმართულებით გადაყვანას მოჰყვა.
“სადისკუსიო არაფერია” – ეუბნება რადიო თავისუფლებას “ქართული ოცნების” კოალიციის ყოფილი წევრი, ყოფილი პარლამენტარი დავით ზურაბიშვილი.
“ძალოვანი სტრუქტურებიდან რომ გაგიშვებენ, ეს არ უნდა იყოს მისთვის [მამუკა მდინარაძისთვის] კარგი ნიშანი. ბიძინა ივანიშვილის მთავარი დასაყრდენი ამ ქვეყანაში შსს, პროკურატურა, უშიშროება და სასამართლო სისტემაა – კიდევ ცალკე… აშკარად ხდება მდინარაძის ჩამოცილება ძალაუფლების ოლიმპიდან”, – დავით ზურაბიშვილი დარწმუნებულია, რომ გადაწყვეტილება ბიძინა ივანიშვილის მიღებულია; რატომ და რისთვის – შესაძლოა ამ ეტაპზე არც არავინ არ იცოდეს, თუმცა შესაძლოა სულაც “ფარულ ჩანაწერში მოუსმინა რაღაცას და იმაზე გაბრაზდა”.
