დღეს, ოზურგეთის მუნუციპალიტეტის საკრებულოს რიგგარეშე სხდომაზე, ოზურგეთს მუნიციპალიტეტის მერიის სამსახურების, 2020 წელს გაწეული მუშაობის მოსმენა დაიწყო.
ადმინისტრაციული სამსახურის უფროსმა, გიორგი ინწკირველმა 2020 წელს გაწეული საქმიანობის შემაჯამებელი ანგარიში წარმოადგინა.
გამოსვლისას, მან ქალბატონებს გაზაფხული მიულოცა და გასული წლის უმნიშვნელოვანეს გამოწვევად პანდემია დაასახელა, რასაც , მისივე თქმით, ოზურგეთს მუნიციპალიტეტის მერია და საკრებულო ორგანიზებულად გაუმკლავდა.
_გასული წლის 21 თებერვლიდან ჩვენ თავდადებით ვიბრძვით პანდემიის წინააღმდეგ. მაშინვე შეიქმნა 13 კაციანი ჯგუფი, ამოქმედდა ცხელი ხაზი. სულ ცოტა, დღეში 250 ზარი შემოდიოდა, ხან -100 და ჩვენ უპასუხოდ არასდროს დაგვიტოვებია მოქალაქეები. მიზანი, ძირითადად, მოსახლეობის ინფორმირებულობა იყო. ამ ექსტრემალურ პირობებში, ჩვენი სამსახურის ოთხივე განყოფილების ხელმძღვანელებმა, წარმომადგენლებმა, ასევე დაცვის სამსახურის თანამშრომლებმა მაქსიმალური მობილიზებულობა გამოავლინეს, _ თქვა მან და მოიშველია სტატისტიკა, რომ საზოგადოებასთან ურთერთობის და ასევე სხვა განყოფილებების მიერ, 12500 კორესპონდენციის , 3700-ზე მეტი მოქალაქის განცხადების გატარება, 8334 აქტის შედგენა მოხდა.
გოგი ინწკირველმა ისაუბრა ასევე ახალი ელექტრონული სერვისის შექმნაზე, რაც მნიშვნელოვანი სიახლეა და ადამიანს დაეხმარება დროის და თანხის დაზოგვაში.
_პანდემიის დროს, მერიის თანამშრომელთა მიერ, დახმარების სახით 14 ათასი ლარი შეგროვდა მოქალაქეთა დასახმარებლად. აქ გამოვლინდა თანადგომის საუკეთესო მაგალითი, რაც ზოგადად ქართველ ხალხს ახასიათებს _ თქვა ინწკირველმა და საუბარი განაგრძო მრჩეველთა საბჭოს მუშაობის შეფასებაზე.
_მრჩეველთა საბჭოს რვა სხდომა ჩატარდა. მათი რჩევები, რეკომენდაციის სახით, არის მიღებული და აკინძული. წლის დასაწყისში, ახლა, ძალიან კარგად ჩატარდა კრებები სოფლის მხარდამჭერი პროგრამის ფარგლებში. ჯამურად, სხვადასხვა სოფლების მცხოვრებლებმა 211 საკითხი წამოაყენეს, რომელთაგან 115 გახდა პრიორიტეტი. მოხდება უკლებლივ ყველა პროექტის დაფინანსება და განსაზღვრულ დროში გახორცილელება,_ განაცხადა მან.
გოგი ინწკირველმა უმნიშვნელოვანეს საქმედ მიიჩნია, მერიის მიერ , სოფელ ნატანებში ჭაბურღილის გაკეთება, სადაც წყლის ამოსვლა მოხდა და 80 ოჯახს ამიერიდან პრობლემა მოეხსნება.
ნატანების დეპუტატმა ოზურგეთის საკრეულოში, თამაზ ტუღუშმა მადლობა მოუხადა ინწკირველს, თუმცა შენიშვნისთვის სიტყვა ითხოვა:
_ვიცი, რომ შედეგი დადგა, წყალი არის, ჭაბურღილი დაიდგმება, მაგრამ ახლა სახლებშიც უნდა მივიდეს, ხალხთან, თორემ ისე რა მნიშვლელობა აქვს, წყალი მიწის ქვეშ იქნება თუ მიწის ზემოთ? _ ჩვეული უმორიც მოიშველია ტუღუშმა, რასაც სიცილი მოჰყვა.
_გასაგებია, ახლა საჭიროა დაქსელვა და წყლის ოჯახებში მიყვანა. ესეც გაკეთდება, _ უპასუხა ინწკირველმა.
საკრებულოს წევრმა, მარიკა ჩხიკვიშვილმა დასვა კითხვა, ელექტრონული სერვისის შექმნის ირგვლივ.
_ეს არის ძალიან კარგი, თუმცა ხომ არ მოხდება მერის წარმოადგენელთა გადამზადება, რაც მათ მუშაობას გაუადვილებს? -ჰკითხა მან ინწკირველს.
ადმინისტრაციული სამსახურის უფროსი დაეთანხმა, რომ კითხვა ლოგიკურია და ჩაინიშნა. ანგარიშის წარდგენის დასასრულს, მან შეაჯამა მერიის და საკრებულოს ერთობლივი მუშაობაც, განვლილ საანგარიშო პერიოდში:
_ხალხთან ურთიერთობა, მათთან ხშირად მისვლა არის უმთავრესი საქმე. ამას კარგად აკეთებს საკრებულო, დეპუტატები. ყველამ ასე უნდა იმოქმედოს. სოფლის კრებებზე იყო შემთხვევები, როცა მერს ჰქონდა თავისი თვალსაზრისი ამა თუ იმ საკითხზე. თუმცა, როგორც ხალხმა ისურვა, ისე გადაწყდა. ზოგჯერ ისმოდა კითხვებიც, მერი რომ დადის კრებებზე, ხალხს ხომ არ მოერიდება პრობლემებზე საუბარიო. თუმცა, პირიქით იყო. ხალხი თავისუფლად საუბრობდა და როგორც სურდათ, ისე გადაწყვიტეს, სად რომელი პროექტი გახორციელდეს. ჩვენ ამ დროის მანძილზე დეპუტატებთან, საკრებულოს აპარატთან გვქონდა საქმიანი და სოლიდარული დამოკიდებულება. საარჩევნო წელია. ახლოვდება ადგილობრივი თვითმმართველობის არჩევნები და წარმატებას გისურვებთ, ვისაც მასში მონაწილეობის სურვილი გექნებათ _ განუცხადა საკრებულოს წევრებს გოგი ინწკირველმა და საკუთარი თვალსაზრისი გამოხატა, რომ საქმის კეთებისას ასეთი კოლეგიალობის შემთხვევაში, კვლავ ექნება დაკავებულ თანამდებოაზე მუშაობის სურვილი.
