ბახმაროს ჰაერის უნიკალური სამკურნალო თვისებები პირველად ზაფხულის საძოვრებზე ამოსულმა მწყემსებმა აღმოაჩინეს, როცა ტუბერკულოზით დაავადებული ერთ–ერთი მათგანი აქაურმა ჰაერმა სასწაულებრივად სწრაფად და საბოლოოდ გამოაჯანმრთელა.
1895 წელს ბახმაროში ქართველი ეთნოგრაფი თედო სახოკია იმყოფებოდა და მისი აღწერით, იმ დროს ბახმაროში სულ რამდენიმე სახლი თუ იდგა.
დღეს უნიკალური კურორტზე სახლების რაოდენობა 3 000-ს აღემატება. უმეტესობა ახალაშენებული და ფეშენებლურია.
სახლების უკანონოდ აშენებისა და მიწების უკანონოდ მიტაცების პრობლემა ბახმაროში უკვე წლებია დგას და ამის შესახებ “გურია ნიუსი” წლებია წერს. ერთ–ერთი გახმაურებული სკანდალი ჯერ კიდევ 2010 წელს იყო, როდესაც ზაფხულში გარემოს დაცვის ინსპექციამ პატრულირებისას აღმოაჩინა, რომ მის საკონტროლო ტერიტორიაზე, ტყეში, სახლები იყო აშენებული. ჯერ კიდევ იმ პერიოდში პროკურატურისა და კონსტიტუციური უსაფრთხოების დეპარტამენტის მიერ ამოღებული დოკუმენტაციიდან გაირკვა, რომ ამ საქმის ერთ–ერთი კვანძი ჩოხატაურის მუნიციპალიტეტის ხელმძღვანელ ორგანოებში იმალებოდა…
ამ ხმაურიანი საქმიდან რამდენიმე წლის შემდეგ დაბა ბახმაროს ადმინისტრაცია და ჩოხატაურის მუნიციპალიტეტის მერიის ზედამხედველობის სამსახური ისე გაეხვა სკანდალში _ საქართველოს პროკურატურამ დაბა ბახმაროში, სახელმწიფოს კუთვნილი მიწების თაღლითურად დაუფლების კიდევ 3 ფაქტი გამოავლინა და 5 პირს, მათ შორის 1 საჯარო მოხელეს ბრალდება წარუდგინა.
როგორც პროკურატურის მიერ 2022 წლის 9 სექტემბერს გავრცელებულ განცხადებაში ვკითხულობთ:
“აჭარის ავტონომიური რესპუბლიკის პროკურატურის მიერ ჩატარებული გამოძიებით დადგინდა, რომ 2018 წელს, ბრალდებულები საცხოვრებელი სახლის ყალბი ტექნიკური პასპორტის გამოყენებით და ჩოხატაურის მუნიციპალიტეტის მერიის ზედამხედველობის სამსახურის სპეციალისტის მიერ არაჯეროვნად შედგენილი დათვალიერების ოქმის საფუძველზე, თაღლითურად დაეუფლნენ ჩოხატაურის მუნიციპალიტეტში, დაბა ბახმაროში მდებარე 95 000 ლარის ღირებულების სამ მიწის ნაკვეთს. შედეგად, სახელმწიფოს დიდი ოდენობით ქონებრივი ზიანი მიადგა.
ოთხ პირს ბრალდება საქართველოს სისხლის სამართლის კოდექსის 180-ე მუხლის მე-2 ნაწილის “ა” და მე-3 ნაწილის “ბ” ქვეპუნქტებით (წინასწარი შეთანხმებით ჯგუფის მიერ დიდი ოდენობით ჩადენილი თაღლითობა) და 362-ე მუხლის მე-2 ნაწილის “ბ” ქვეპუნქტით (ყალბი დოკუმენტის შეძენა–გამოყენება, რამაც მნიშვნელოვანი ზიანი გამოიწვია) წარედგინათ, რაც სასჯელის ზომად 6-დან 9 წლამდე თავისუფლების აღკვეთას ითვალისწინებს.
საჯარო მოხელეს ბრალდება საქართველოს სისხლის სამართლის კოდექსის 342-ე მუხლის პირველი ნაწილით (სამსახურებრივი გულგრილობა) წარედგინა, რაც სასჯელის ზომად 3 წლამდე თავისუფლების აღკვეთას ითვალისწინებს.
პროკურატურა ბრალდებულებისთვის აღკვეთის ღონისძიების შეფარდების თაობაზე შუამდგომლობით სასამართლოს კანონით დადგენილ ვადაში მიმართავს.
აღსანიშნავია, რომ საქართველოს პროკურატურა აქტიურად აგრძელებს გამოძიებას როგორც დაბა ბახმაროში, ასევე დაბა გომისმთაში ანალოგიური დანაშაულის ჩამდენი პირების გამოვლენის და მხილების მიზნით. დაბა ბახმაროში და დაბა გომისმთაში სახელმწიფოს კუთვნილი მიწების თაღლითურად დაუფლების ფაქტებზე სისხლის სამართლებრივი დევნა უკვე დაწყებულია 35 პირის მიმართ და სახელმწიფოს დაახლოებით მილიონი ლარის ღირებულების უძრავი ქონება უკვე დაუბრუნდა“.
ბახმაროში სახელმწიფო კუთვნილი მიწების თაღლითურად დაუფლების ფაქტებზე განჩინება ბათუმის სასამართლომ 10 სექტემბერს მიიღო.
“გურია ნიუსს” ბათუმის სასამართლოს პრესსამსახურში განუცხადეს, რომ 5-ვე პირს გირაო შეეფარდა.
“ი. ე. _ 3 000 ლარი, ხ. კ. _ 5 000 ლარი, დ. ჟ. _ 2 000 ლარი, კ. მ. –_3 000 ლარი, ა. ლ. _ 2 000 ლარი. აქვე დავაზუსტებთ, რომ პროკურატურის მოთხოვნაც გირაოს შეფარდება იყო 5-ვე პირის მიმართ“, _ გვითხრეს ბათუმის სასამართლოში.
ჩვენ ვცადეთ, გავსაუბრებოდით დ. ჟ–ს, თუმცა, მან ჩვენს სატელეფონო ზარს არ უპასუხა.
აღნიშნულ საკითხთან დაკავშირებით სასაუბროდ ჩოხატაურის მუნიციპალიტეტის ყოფილ მერს და საკრებულოს ამჟამინდელ თავმჯდომარეს ირაკლი კუჭავას დავუკავშირდით. თუმცა, კუჭავამ გვითხრა, რომ აღნიშნულ საქმეზე კომენტარს ვერ გააკეთებს.
_ ბატონო ირაკლი, თქვენ იმ პერიოდში მუნიციპალიტეტის მერი იყავით. პროკურატურის განცხადებაში ნათქვამია, მერიის ზედამხედველობის სამსახურის სუსტ და დარღვევით მუშაობაზე, თქვენ თუ გქონდათ ინფორმაცია ამის შესახებ ?
_ არა, რა ინფორმაცია. ეს ისეთივე თემაა, იდენტობის შემოწმება, როგორიც არის ნებისმიერ სოფელში. მაშინ ბახმაროში წარმომადგენელი არ არსებობდა, ბახმაროს დაბის სტატუსი არ ჰქონდა და საქმის შესწავლა დაევალა ზედამხედველობის დეპარტამენტის ერთ–ერთ თანამშრომელს. მას ედავებიან მოწმეების გამოკითხვას _ ორის ნაცვლად ერთი რატომ გამოიკითხა და ა. შ.
რასაც ედავებიან, არ არის დაკავშირებული უკანონო მიწებთან. უკანონო მიწებს რაც შეეხება, ასეთი 900-ზე მეტი შენობა არის დაფიქსირებული და იმიტომ იწოდება უკანონოდ, რომ მაშინდელმა მერიამ და ზედამხედველობის სამსახურმა ეს დააფიქსირა. უბრალოდ, ჩვენ არ გვეყო იმის რესურსი, რომ დემონტაჟი მოგვეხდინა, თორემ ჯარიმები დაწერილია. მაგასთან დაკავშირებით მე ვერანაირ კომენტარს ვერ გავაკეთებ. პროცესი მიდის სასამართლოში და დადგება შედეგი, _ ამბობს კუჭავა.
ბახმაროსა თუ გომისმთაზე უკანონო მშენებლობების შესახებ ყოველთვის აქტიურად საუბრობდა ოპოზიციაც. მას შემდეგ რაც ცნობილი გახდა დაბა ბახმაროზე მიწების თაღლითურად დაუფლების ფაქტების შესახებ, ჩვენ ჩოხატაურის საკრებულოს წევრს “ნაციონალური მოძრაობიდან” მამია ბარამიძეს დავუკავშირდით:
_ ყოველთვის ვამბობდით, რომ მანდ შეუიარაღებელი თვალითაც კი ჩანდა, რომ სახლებმა იმატა ბახმაროში. გვქონდა გონივრული ეჭვი, რომ სახლების გარკვეული რაოდენობა იყო უკანონოდ აშენებული. ჩვენ, როგორც ოპოზიციური ძალა, ყოველთვის ობიექტურად ვაკრიტიკებდით ამ ფაქტს, მმართველი პარტიის წევრები კი ყოველთვის გვიმტკიცებდნენ, რომ ეს ასე არ არის.
პროცესები, რაც ახლა მიდის, არის დამადასტურებელი იმის, რომ ჩვენ ვიყავით და ვართ მართლები. თუმცა, ეს ნაწილობრივ შერჩევითი კანონის აღსრულება მგონია. ჩვენ, “ნაციონალური მოძრაობა” ვფიქრობთ, რომ უფრო დიდ უკანონობასთან გვაქვს საქმე. ჩვენ წლებია ვმუშაობთ ამ საკითხზე და გვაქვს გონივრული ეჭვი და გარკვეული ინფორმაციები, თუ რა ხდება ბახმაროში. ახლა ვაკვირდებით, როგორ წავა პროცესი.
_ ბატონო მამია, ვერ გვეტყვით, რა ინფორმაციას ფლობთ?
_ ჯერ დავაკვირდეთ, იქნება თუ არა პროკურატურის გამოძიება ძირეული, ამომწურავი და ობიექტური, რისიც “ნაციონალურ მოძრაობას” არ გვჯერა.
_ თქვენ ყოველთვის ამბობდით, რომ ბახმაროში უკანონო მშენებლობები მიმდინარეობდა, ხდებოდა მიწების უკანონო მითვისება… გქონდათ ინფორმაცია, რომ ამ საქმეში მერიის ზედამხედველობის სამსახური შეიძლებოდა ყოფილიყო ჩართული?
_ მოდით, გავმიჯნოთ, რა ხდება. ერთია მიწა, მეორე _ მშენებლობა. ერთია, რომ ვიღაცამ მიიტაცა მიწა და მასზე ააშენა სახლი, ისეთი რომელიც თავიდან ბოლომდე უკანონოა. მეორე პროცესია, რომ ვიღაცამ იყიდა ძველი სახლი, რომლის ადგილას გაჩნდა სულ სხვა ტიპის უკანონო ნაგებობა. ჩვენი ინფორმაციით, ძალიან დიდ გათვლებზეა აგებული ორივე პროცესი.
რაც შეეხება თქვენს კითხვას, სტრუქტურულად ზედამხედველობის სამსახური არის უშუალოდ ადგილზე პროცესების გამკონტროლებელი. ის არის გამგეობის სტრუქტურაში შემავალი სამსახური.
მაგ კითხვაზე კითხვითვე გიპასუხებთ _ კი, ბატონო, ზედამხედველობის სამსახური დამნაშავეა, რომ გამორჩა რაღაც ფაქტი, მაგრამ ამ სამსახურის უბრალო ჩინოვნიკმა თავისი ნებით არ დაინახა რაღაც მშენებლობა? შეიძლება, ზედამხედველობის სამსახურმა დაინახა, მაგრამ ამის მერე იწყება ყველაფერი _ და მისმა ზემდგომმა არ გააკეთა არაფერი უკანონობის აღმოსაფხვრელად.
კიდევ ერთხელ გავიმეორებ _ როდესაც ვამბობდით, რომ ბახმაროში არის პრობლემები, მმართველი გუნდის წევრები მეუბნებოდნენ, რომ პრობლემა არ არის. ახლა პროკურატურამ თქვა, რომ ბახმაროში ხდება უკანონობა და ვიღაცის მიმართ დაიწყო სამართლებრივი დევნა.
ჩვენ ახლა ვართ დაკვირვების პროცესში ახლა, თუ რამდენად ღრმა და საფუძვლიანი იქნება გამოძიება, შემდეგ კი გავაკეთებთ კომენტარს.
კიდევ საინტერესო ამბავს გეტყვით _ ჩოხატაურის მუნიციპალიტეტის საკრებულოში არის კომისია, რომლის წევრიც მე ვარ. ამ კომისიას უნდა შეესწავლა ბახმაროს დღევანდელი მდგომარეობა, დაგვედო განვითარების პროგრამა და ეს პროგრამა უნდა ყოფილიყო სახელმძღვანელო მერიისთვის. თუმცა, მაგრამ კომისია ჯერ არ შეკრებილა. თუ რატომ არ შეკრებილა, ეს მეც მაინტერესებს, _ გვითხრა მამია ბარამიძემ.
