ჩოხატაურის მუნიციპალიტეტში, ერთი ხელშეკრულების ფარგლებში, Design-Build მეთოდით, 50 ბავშვზე გათვლილი ოთხი საბავშვო ბაღის მშენებლობისათვის არსებული საპროექტო დოკუმენტაციის კორექტირების (საჭიროებისამებრ) და მის საფუძველზე სამშენებლო სამუშაოების შესრულების სახელმწიფო შესყიდვის შესახებ გამოცხადებული ტენდერი შეწყდა.
“სატენდერო კომისიის წევრებმა განიხილეს 2025 წლის 31 მარტს, ერთი ხელშეკრულების ფარგლებში, Design-Build მეთოდით, ჩოხატაურის მუნიციპალიტეტში, 50 ბავშვზე გათვლილი ოთხი საბავშვო ბაღის მშენებლობისათვის არსებული საპროექტო დოკუმენტაციის კორექტირების (საჭიროებისამებრ) და მის საფუძველზე სამშენებლო სამუშაოების შესრულების სახელმწიფო შესყიდვის მიზნით გამოცხადებული NAT250006487 ელექტრონული ტენდერის შეწყვეტის საკითხი.
სატენდერო კომისიის წევრებმა აღნიშნეს: ვინაიდან, საჭიროა წინამდებარე NAT250006487 ელექტრონული ტენდერის სატენდერო პირობებით გათვალისწინებული ტექნიკური დავალებით განსაზღვრული პირობების გადასინჯვა, მიზანშეწონილია შეწყდეს ხსენებული ელექტრონული ტენდერი.
სატენდერო კომისიის წევრებმა დაადგინეს: 1. სახელმწიფო შესყიდვების სააგენტოს თავმჯდომარის 2017 წლის 14 ივნისის N12 ბრძანებით დამტკიცებული „ელექტრონული ტენდერის ჩატარების წესი“-ს მე-12 მუხლის მე-2 და მე-4 პუნქტების საფუძველზე შეწყდეს 2025 წლის 31 მარტს გამოცხადებული NAT250006487 ელექტრონული ტენდერი”,_ წერია გავრცელებულ ინფორმაციაში.
თუ რატომ შეწყდა ელექტრონული ტენდერი “გურია ნიუსმა” ამ კითხვით მუნიციპალური განვითარების ფონდს წერილობით მიმართა და დეტალურ ინფორმაციას პასუხის მიღებისთანავე შემოგთავაზებთ.
ცნობისთვის,ჩოხატაურის მუნიციპალიტეტის 8 სოფელში 2023 წელს დაანონსებული ასაშენებელი საბავშვო ბაღიდან ჯერ აშენებული არც ერთი არ არის. კომპანიას, რომელთანაც ხელშეკრულება მუნიციპალური განვითარების ფონდმა 2023 წლის 10 მაისს გააფორმა და სოფელ გუთურში, გოგოლესუბანში, ზომლეთსა და შუა ამაღლებაში 50 ბავშვზე გათვლილი საბავშვო ბაღის პროექტირება/მშენებლობა უნდა გაეხორციელებინა, ხელშეკრულება მიმდინარე წლის თებერვალში ცალმხრივად შეუწყვიტეს.
ახალ ტენდერში კი გამარჯვებულ პრეტენდენტს “შპს მოდერნ ბილდინგ კომპანი” წარმოადგენდა, თუმცა ამ დროისთვის შესყიდვა შეწყვეტილია.
ავტორი
