2004 წლის ოქტომბერში, თბილისში მომხდარი დავით ოთხმეზურის მკვლელობაში გამართლებულის, ასლან ბეჟანიძის დედა მთავარ პროკურატურას და დაზარალებულ მხარეს სიცრუის ტირაჟირებაში ადანაშაულებს და აცხადებს, რომ მისი შვილის წინააღმდეგ პროკურატურას არანაირი მტკიცებულება არ გააჩნია.
რას უკავშირებს ოთხმეზურების მკვეთრ პოზიციას, რა მტკიცებულებები აქვს მისი შვილის წინააღმდეგ პროკურატურას და ჰყავდა თუ არა “გავლენიანი ნაცნობებები”, რომლებიც ასლან ბეჟანიძეს “მფარველობდნენ”, _ ამ საკითხებზე თამარ მუქერია “გურია ნიუსს” ესაუბრა.
_თამარ, რა მტკიცებულებები აქვს თქვენი შვილის წინააღმდეგ პროკურატურას და რამდენად სამართლიანია ოთხმეზურების პოზიცია?
_პროკურატურას არ გააჩნია არანაირი მტკიცებულება ჩემი შვილის წინააღმდეგ და საზოგადოება შეჰყავს შეცდომაში, აწვდის არასწორ ინფორმაციას. დავიწყოთ იქედან, რომ 2004 წელს, როდესაც მკვლელობის ფაქტი მოხდა, მე არ ვიცნობდი ჩემს მეუღლეს, რაზეც ახლა აცხადებს პროკურატურა, რომ თურმე გავლენიანი ნაცნობების შიშით, ზოგიერთ მოწმეს ჩვენება ვერ მიუცია. ჩემი მეუღლე, მირიან კვეზერელი პროკურატურიდან წამოვიდა 2009 წელს, 2004 წელს მას არცკი ვიცნობდი.
რაც შეეხება იმას, რასაც გოგი ოთხმეზური ამბობს, რომ თითქოს ამ მკვლელობის შემდეგ ბინა გავყიდე და გადავედი იქედან სხვაგან საცხოვრებლად, ესეც ტყუილია. ბინა კუტუზივის ქუჩაზე ისევ მაქვს. 2009 წლამდე იქ ვცხოვრობდი. მხოლოდ 2009 წელს გადმოვედი სხვაგან საცხოვრებლად.
დაზარალებული რომ დასწრებოდა 12 წლის შემდეგ გამოჩენილი, მრავალჯერ ნასამართლევი ცრუ მოწმეების დაკითხვებს, თვითონვე დარწმუნდებოდა, რომ მათ ტყუილში და პრეტენზია არა მოსამართლის, არამედ პროკურატურის მიმართ გაუჩნდებოდა. მიხვდებოდა, რომ ეს საქმე პროკურატურის მიერ არის შეთითხნილი.
დაზარალებული დაკითხვის დროს ამბობს, რომ მას არ უნახავს თვითმხილველი მოწმეები, ამ დროს კი ეს ცრუ მოწმეები აცხადებენ, რომ დილიდან საღამომდე ვიყავით ოთხმეზურებთანო. ერთ-ერთი მოწმე, ლევან ბოჭორიშვილი ამბობს, რომ ხედავდა როგორ უკლავდნენ საყვარელ ძმაკაცს და ადვოკატმა როცა ჰკითხა რატომ არ დაეხმარეო, პასუხი ასეთი იყო: შეყვარებულთან მეჩქარებოდაო.
_შესაძლებელია ეს პირები შემთხვევის ადგილზე არც ყოფილიყვნენ?
_თქვენ საერთოდ წარმოგიდგენიათ, რომ ერთიდაიგივე პროკურორს ამირან გულუაშვილს ერთიდაიგივე ცრუ მოწმეები სხვადასხვა მკვლელობაში ჰყავდეს მოწმედ? აქედან ერთ-ერთი მოწმეთა დაცვის პროგრამაშია, მეორეს კი ჩემი შვილის წინააღმდეგ ჩვენების მიცემის შემდეგ საპროცესოთი უშვებს გარეთ. კიდევ ერთი მოწმე კი, რომელსაც არც პასპორტი აქვს და არც რაიმე მაიდენტიფიცირებელი დოკუმენტი, პროკურატურამ ვითომ ვერ იპოვა და გამოაქვეყნა მისი ჩვენებაც. არც კი გვინახავს თვალით ეს მოწმე არსებობს თუ არა საერთოდ. არც აწყობს პროკურატურას რომ მოიყვანოს. ჩემი შვილი ნამდვილად არ არის მკვლელი, ცრუ მოწმეები კი რაც არ უნდა მოინდომოს მაინც ჩაიჭრება.
თქვენც იმყოფებოდით დაკითხვებზე სასამართლოში და მოისმინეთ, რომ ურთიერთგამომრიცხავი ჩვენებები მისცეს ამ მოწმეებმა. საქალაქო სასამართლოს ნამდვილად ღირსეულმა მოსამართლემ ღირსეული განაჩენი გამოიტანა. იმედი მაქვს იგივე გადაწყვეტილებას გამოიტანს სააპელაციო სასამართლოც.
ჩემი აზრით, პროკურატურა ნამდვილ დამნაშავეს ხელს აფარებს. როგორ შეიძლება, რომ 2004 წელს დაკითხული ადამიანებიდან არავინ არ ამბობდა, რომ ჩემმა შვილმა ვიღაც მოკლა. 12 წლის შემდეგ გამოჩნდნენ ცრუ მოწმეები და განაცხადეს რომ მკვლელი ასლანია იგულისხმება ასლან ბეჟანიძე, ავტ.). როგორ შეიძლება არცერთი მოწმე, რომელიც ხედავდა როგორ უკლავდნენ მეგობარს, მის დასახმარებლად არ მისულიყვნენ? ეს წარმოგიდგენიათ? პროკურატურა კი ამას ამტკიცებს. მერე რა მოხდა, პატარები იყვნენ და დაიბნენო.
_გიორგი ოთხმეზური ამბობს, რომ 2004 წლიდან 2014 წლამდე გარკვეული პირები, მათ შორის თქვენი მეუღლეც – მირიან კვეზერელი ხელს აფარებდნენ ნამდვილ დამნაშავეს. სად იმყოფებოდა თქვენი შვილი 2004 წლიდან 2014 წლამდე და მიეცით თუ არა პროკურატურას ჩვენება, რომ თქვენი შვილი იმყოფებოდა საზღვარგარეთ და თქვენ მისი ადგილსამყოფელის შესახებ არ იცოდით?
_კიდევ ერთხელ ვიმეორებ, რომ ჩემი მეუღლეს 2004 წელს არ ვიცნობდი. ის პროკურატურაში მუშაობდა 2009 წლამდე და მას შემდეგ უწყებაში არ უმუშავია. არცერთი დღე, არცერთი წუთი ჩემი შვილი არ დამალულა. მოძებნა თუ უნდოდათ, ეკითხათ მეზობლებთან. ჩემი შვილი იყო ყოველთვის ჩემთან, სადაც მე ვცხოვრობდი, კუტუზოვის ქუჩაზე. 2009 წელს დავქორწინდი და შვილების გაჩენის შემდეგ გადავედი სხვა ბინაში. მირიან კვეზერელი არანაირად არ აფარებდა ხელს ჩემს შვილს და ვერც დააფარებდა. საგამოძიებოს უფროსის მოადგილე იყო ჩემი მეუღლე და როგორ შეიძლებოდა 12 წელი ვინმესთვის ხელი დაეფარებინა? თავიდან პროკურატურა იმასაც აცხადებდა, რომ ასლანს საზღვარი ჰქონდა გადაკვეთილი და ამის დამადასტურებელ საბუთს მოიტანდა, მაგრამ სასამართლოში მოგვიანებით განაცხადეს, რომ მას საზღვარი არ გადაუკვეთავს.
არანაირი სამხილი არ აქვთ ჩემი შვილის წინააღმდეგ, არ არის ჩატარებული დნმ-ის ექსპერტიზა, არ აქვთ გენეტიკური ექსპერტიზის პასუხი, არ არის არსად სისხლის კვალი არ არის ნაპოვნი მკვლელობის იარაღი, არსად არ ფიქსირდება, რომ ჩემი შვილი იქ იმყოფებოდა, ასე ნებისმიერ ადამიანზე შეუძლიათ თქვან რომ წლების წინ მკვლელობა ჩაიდინა, მოიყვანონ ცრუ მოწმეები და ათქმევინონ, რომ დაინახეს მკვლელობის ფაქტი.
_2004 წელს მოპოვებულ მტკიცებულებებში თქვენი შვილის სახელი და გვარი არსად არ ფიგურირებს?
_სახელი და გვარი ვინ დააფიქსირა პირველად არ ვიცი. ძებნა რომ არ იყო ჩემს შვილზე გამოცხადებული, არანაირი ჩვენება რომ არ იყო მის წინააღმდეგ მიცემული, ეს ზუსტად ვიცი, არც მომჩივანი არსებობდა 2016 წლამდე. ეს არის პროკურატურის შეთითხნილი. როგორც ჩანს, ნამდვილ მკვლელს ხელს აფარებდნენ და ჩემი შვილის გასვრა უნდოდათ. იმიტომ რომ იყო ქობულეთელი, ხშირად არ ცხოვრობდა თბილისში და იყო ადამიანი, რომელსაც თავისი თავის დაცვა არ შეეძლო. უპატრონო ეგონათ…
_სხვა რაიმე ინტერესს თქვენი შვილის მიმართ გამორიცხავთ?
_არ ვიცი სხვა რა ინტერესი შეიძლებოდა ყოფილიყო. ჩემი ოჯახის არცერთ წევრს არასდროს არ მოუღია მონაწილეობა პოლიტიკაში, რაზეც ახლა გოგი ოთხმეზური საუბრობს.
_რა ვითარებაში მოხდა თქვენი შვილის დაკავება?
_2016 წლის 25 მარტს, კახეთში მივდიოდით და სადარბაზოდან როგორც კი გამოვედით მოვიდნენ პოლიციელები და გვკითხეს იყო თუ არა ჩემი თანმხლები პირი ასლან ბეჟანიძე. დადასტურების შემდეგ გვითხრეს, რომ გაუგებრობა იყო რაღაც მომხდარი და განყოფილებაში უნდა გადაეყვანათ. ამის შემდეგ ჩხრეკა ჩატარდა სახლში, სადაც იმ დროს, როცა მკვლელობა მოხდა, არც კი ვცხოვრობდით.
_ანუ თქვენ ამბობთ, რომ ამ საქმესთან დაკავშირებით თქვენი ოჯახი 12 წლის შემდეგ გაიჩხრიკა?
_დიახ, 2016 წელს ჩატარდა ჩხრეკა, მკვლელობა კი 2004 წელს იყო მომხდარი, რასთანაც არანაირი კავშირი არ გვაქვს.
_რაც შეეხება თქვენი შვილისთვის ჩატარებულ ექსპერტიზას, რომლის შესახებაც დასკვნა სასამართლოზე წარადგინეს და აღნიშნეს, რომ მას 9-12 წლის ბავშვის გონებრივი შესაძლებლობა აქვს. ამ ექსპერტიზის შედეგს ეჭვქვეშ აყენებს დაზარალებული მხარე. ექსპერტიზა თქვენი მოთხოვნით ჩატარდა?
_არა, რა თქმა უნდა. პროკურატურამ გადაიყვანა სამხარაულის ექსპერტიზის ეროვნულ ბიუროში და მათმა ექსპერტმა დადო ეგ დასკვნა.
_2004 წელს, როდესაც მკვლელობის ფაქტი მოხდა, იმყოფებოდა თუ არა თქვენი შვილი თბილისში?
_ზუსტად ეს დღე ნამდვილად არ მახსოვს და არც გამიგია მკვლელობის შესახებ. ოთხმეზურების ოჯახსაც არ ვიცნობდი. ეს ამბავი მოგვიანებით ტელევიზიით გავიგე. შესაძლოა ჩემი შვილი არც იყო თბილისში, პერიოდულად ჩამოდიოდა აქ, ძირითადად ცხოვრობდა აჭარაში, ქობულეთში ბებიასთან და ბაბუასთან. ამაზე ხომ უნდა მოეკვლია პროკურატურას, ამოეღო სატელეფონო ანძების ჩანაწერები, მით უმეტეს, რომ რასაც თვითონ აცხადებენ, მკვლელობა ტელეფონზე დარეკვის გამო მოხდა. ჩვენ ვითხოვდით ამას, რომ ამოეღოთ ეს ჩანაწერები, მაგრამ არ გააკეთა პროკურატურამ. რასაც ამბობენ ეს ვერსია გაუქარწყლდებოდათ.
_რა მოლოდინი გაქვთ სააპელაციო სასამართლოსგან?
_ჩემი შვილის წინააღმდეგ არანაირი მტკიცებულება არ აქვთ, ამიტომ დარწმუნებული ვარ, ძალაში დარჩება საქალაქო სასამართლოს გადაწყვეტილება. ეს რომ ასე არ მოხდეს, დაქცეულა ეს ქვეყანა. ყველა ადამიანს, ვისზეც მოუნდებათ საქმეს შეკერავენ, მოიყვანენ რამდენიმე ცრუ მოწმეს და მიაცემინებენ ჩვენებას. ოთხმეზურის მამა კიდევ იმას ამბობს, რომ ვიღაცამ დაურეკა და უთხრა, რომ თითქოს მისი შვილი ასლან ბეჟანიძემ მოკლა. ვინ არის ის ვიღაც? მკვლელობის საქმე შეიძლება ასე ჭორის დონეზე იყოს?! თვითმხილველი მოწმეები კიდევ 12 წლის განმავლობაში იმ ოჯახს საერთოდ არ უნახავს, ცრუ მოწმეები კი იმას ამბობენ, რომ თითქოს სულ ოთხმეზურების ოჯახში იყვნენ.
_გოგი ოთხმეზურმა „გურია ნიუსთვის“ მიცემულ ინტერვიუში განაცხადა, რომ ვიცოდი მკვლელი ასლან ბეჟანიძე იყო და ვეძებდი კიდევ 2004-2005 წლებში, თუმცა , გადამალული ჰყავდათო. იყო თუ აა თქვენთან მოსული ამ საკითხზე ოთხმეზურების მხრიდან?
_არასოდეს, არავინ მოსულა. არადა, ერთ უბანში ვცხოვრობდით, მოსულიყვნენ, ეკითხათ და მიხვედებოდნენ რომ ჩემი შვილი დამნაშავე არ არის.
ამავე თემაზე:
„დამნაშავეს მფარველობდნენ“ – ვის ადანაშაულებს ოთხმეზურის მამა მკვლელობის გამოძიების გაჭიანურებაში
ექსკლუზივი – არაერთგზის ნასამართლევი „ოქროს მოწმეები“, რომლებიც ძველ დანაშაულებს ხსნიან
12 წლის წინ მომხდარი გახმაურებული მკვლელობის დღემდე გაუხმაურებელი დეტალები
მკვლელობაში ბრალდებული სასამართლო დარბაზიდან გაათავისუფლეს (ფოტორეპორტაჟი)
რა არგუმენტებით დაასაბუთა მოსამართლემ მკვლელობაში ბრალდებულის უდანაშაულობა
ექსკლუზივი – 12 წლის წინ მომხდარი გახმაურებული მკვლელობის გაუხმაურებელი დეტალები
ექსკლუზივი – რატომ შეუცვალეს საპატიმრო დაწესებულება განსაკუთრებით მძიმე დანაშაულებში მსჯავრდებულს
რას აცხადებს მოკლული დავით ოთხმეზურის მამა და ვის დასჯას ითხოვს ის
პროკურატურის „ოქროს მოწმეები“, რომლებიც ძველ დანაშაულებს ხსნიან – ნაწილი II
