“ამ მკვლელობას ცუდი ამბავი მოჰყვება. ჩვენ რადგან გურულები არ ვართ და აჭარლები ვართ, ამიტომ გადაგვეკიდნენ? ამიტომ გვასახლებდნენ? აჭარაში ნაკლები გურულები არიან? ჩვენც ასე მოვიქცეთ? ეს შუღლია, მეტი არაფერი! არ დავთმბობთ! ფეხზე დადგება მთელი აჭარა!“_ განუცხადეს “გურია ნიუსს“ დღეს, ოზურგეთის მუნიციპალიტეტის სოფელ გურიანთაში მოკლული ახალგაზრდა მამაკაცის ოჯახის წევრებმა და ახლობლებმა.
28 წლის წლის ირაკლი ტარიელაძე, წუხელ, გვიან ღამით საკუთარი სახლში, ჭიშკართან მოკლეს.
ოჯახის წევრებს აღნიშნულ ფაქტთან დაკავშირებით საკუთარი ვერსიები აქვთ, რომელიც, როგორც თავად ამბობენ, პოლიციასაც უთხრეს, თუმცა, მათივე თქმით, პოლიცია დამნაშავეებს უკვე რამდენიმე წელია, ხელს აფარებს და მფარველობს.
როგორც მოკლული ირაკლი ტარიელაძის ოჯახის ახლობლები “გურია ნიუსთან“ საუბრობენ, ირაკლისა და ამავე სოფელში მცხოვრებ ს.მ-ს მიწებთან დაკავშირებით დაპირისპირება და თვეების განმავლობაში დავა ჰქონდათ. რის გამოც, ერთხელ ინციდენტიც მოხდა _ დაიჭრა, როგორც ერთი მხარე, ისე _ მეორე.
პროცესებში ჩართული იყვნენ, ე.წ. “ძველი ბიჭები“ დ.კ. და ა.კ. აქედან ერთ-ერთს ს.მ-სთან საერთო ბიზნესი აქვს. “გურია ნიუსი“ ამასთან დაკავშირებით ერთხელ უკვე წერდა.
_ აუქციონი ჩატარდა გურიანთაში ტყესთან დაკავშირებით, სადაც გაიმარჯვა ირაკლი ტარიელაძემ. მან შეიძინა ტყის ფართობები, ამიტომ დაუპირისპირდა მას გურიანთაში მცხოვრები ს.მ. გ.ს. და მისი მეგობრები, ძმები ა.კ.და დ.კ. _ ამბობენ გარდაცვლილის ოჯახის ახლობლები, რომლებიც, ასევე, დასძენენ, რომ მათ მიერ დასახელებულ პირებს არაერთხელ ჰქონიათ მსგავს საქმეებში მიღებული მონაწილეობა, თუმცა, პოლიციას ისინი არცერთ ფაქტთან დაკავშირებით არ დაუკავებიათ.
გარდაცვლილი ირაკლი ტარიელაძე რამდენიმე თვის წინ აღნიშნულმა პირებმა საკუთარი სახლის მიმდებარე ტერიტორიაზე სცემეს, მას სახლზე ფანჯრებიც ჩაუმსხვრიეს. იმის გამო, რომ მან მიწის ნაკვეთები არ დათმო აღნიშნული პირების სასარგებლოდ, გარდაცვლილის დის ინფორმაციით, მას მოკვლით არაერთხელ დაემუქრნენ:
_ავიწროებდენ, ბოლოს კი ჩაუსაფრდნენ და მოკლეს. ვითხოვთ, სამუდამო პატიმრობა მიესაჯოთ ამ ოთხ ადამიანს. ასახლდით აქედანო, ამას ჰყავს უამრავი მოწმე, როგორ ემუქრებოდნენ. დამითმე ეს ტყე, თორემ მოკლავთაო. ფაქტია, მოკლეს, სახლთან ეზოში, ჭიშკართან. ჩვენ ასეც ვიცით, რომ პოლიცია მფარველობს და იცავს დამნაშავეებს. არავინ დაუკავებიათ. როცა დანით დაჭრეს ირაკლი, პასუხი არავინ აგო. მთელი ოზურგეთი მაგათ ჰყავდათ დაპყრობილი. გვითვლიდნენ მიწები დაგვითმეთო, _ამბობს გარდაცვლილის და ირინა ტარიელაძე.
“გურია ნიუსი“ შეეცადა აღნიშნული პირების ოჯახის წევრების კომენტარები მოეპოვებინა, თუმცა, არცერთმა მათგანმა არც ჩვენს სატელეფონო ზარს და სმს-ს შეტყობინებას არ უპასუხა.
მფარველობს თუ არა პოლიცია აღნიშნულ პირებს, დაკავებულია თუ არა გარდაცვლილის ოჯახის წევრების მიერ დასახელებული სავარაუდო დამნაშავეები, შსს პრესსამსახურში გვპასუხობენ, რომ მიმდინარეობს საგამოძიებო მოქმედებები სსკ-ის 108-ე მუხლით და დანაშაული, სავარაუდოდ, სანადირო თოფითაა ცადენილი.
“გურია ნიუსი“ აღნიშნულ თემასთან დაკავშირებით კვლავ მოგაწვდით ინფორმაციებს.
