ფაქტია, რომ თითქმის ყოველ გაწვიმებაზე ლანჩხუთის მუნიციპალიტეტის სუფსის ადმინისტრაციული ერთეულის მოსახლეობას პრობლემები ექმნება. ასე იყო გასულ კვირასაც _ უხვმა ნალექმა, აქაურ მოსახლეობას ეზოები, შენობები და საყანე ფართობები დაუტბორა. ზოგიერთმა მათგანმა დახმარების თხოვნით “გურია ნიუსს” მომართა, ადგილზე მისვლა და მათი პრობლემების გასაჯაროება ითხოვა.
“მოდით, ნახეთ რა დღეში ვართ _ წაგვიღო წყალმა. ეზოები წყლითაა სავსე, თუ კიდე იწვიმა, სახლებშიც შემოგვივა წყალი. სანიაღვრე არხებია მოუწესრიგებელი და იმიტომაც ვართ ამ დღეში. ერთი წამოწვიმდა და ვიხრჩობით წყალში, უფრო დიდი წვიმისას ხომ წარმოიდგენთ, რა დღეში ვართ. სუფსა კრიზისულ მდგომარეობაშია, შესწავლა უნდა ამ მდგომარეობას. სკვერების მოწყობის ნაცვლად ჯობს თანხა იმაზე დახარჯონ, რაც მოსახლეობას წაადგება”, _ ამბობდა დაზარალებული მოსახლეობა, რომელთა აზრით, საწრეტი არხების გაწმენდას უნდა მიექცეს მეტი ყურადღება.
“შეუძლებელია აქ ცხოვრება. იქით ცემენტის ქარხნის მტვერი გვახრჩობს და აქეთ _ წყალი. სანიაღვრე არხები წლებია, გაუწმენდავია და ამის გამო ვიტბორებით, წყალი სახლებში შემოგვდის, მაგრამ პატრონი არავინაა. მე ან ნებისმიერი ჩვენგანი საკუთარი ხარჯებით შეძლებს ამ პრობლემის მოგვარებას?! ხომ არ ვითხოვ, მოდით და ჩემს ეზოში გამიწმინდეთ არხი,-მეთქი?! წყალი ქუჩიდან სახლში მივარდება და ხომ უნდა იზრუნოს ვინმემ ამის მოგვარებაზე, რაღაც საშველი ხომ უნდა გამოჩნდეს?! როდემდე შეიძლება ასე გაგრძელდეს?! ელემენტარული ყურადღების ღირსები მაინც არ ვართ?! უბრალოდ, ამბავი მაინც იკითხონ, სხვა თუ არაფერი.
ეზოში რამე რომ დათესო და მოიყვანო, ამაზე უკვე ლაპარაკიც აღარაა _ გადახედეთ, ჭაობის მცენარეებია ამოსული. არადა, ადრე ყანას ვთესავდით და სიმინდს ტონობით ვიწევდით. ჩვენი ხელისუფლება ყვავილების დარგვაზეა გადასული, ქალაქის ცენტრშიც გამალებული სამუშაოები მიდის. ცოტა პერიფერიებშიც გამოიხედონ _ აქაც ვცხოვრობთ ადამიანები. სრული კატასტროფა იყო, ქუჩაში წყალი მდინარესავით მიედინებოდა”, _ თქვა “გურია ნიუსთან” საუბრისას მაია ბლაგიძემ, რომელიც ერთ-ერთია ვისაც სანიაღვრე არხის გაუმართაობის გამო წვიმის დროს წყალი ეზოში უვარდება და ეზო-კარს უტბორავს.
დაზარალებულთა შორისაა სუფსაში ე. წ. უნაგირას უბანში მცხოვრები კლარა კუტუბიძეც, რომელსაც წყალი ეზოში შეუვარდა და ზიანი მიაყენა:
“2014 წლის შემდეგ არ გაწმენდილა ეს არხი, იმის შემდეგ ამოვიდა ხეები. თებერვალში მე პირადად შევიტანე მერიაში განცხადება, ყველას ხელმოწერა იყო ზედ, ვისაც ეს პრობლემა აწუხებს. ვთხოვეთ, რომ კოლექტორი გაეკეთებინათ, სულ 200 მეტრია. ხელისუფლებას ამის შესაძლებლობა არა აქვს, ამ მდგომარეობაში რომ არ ვიყოთ ადამიანები?! შემოდგომიდან ნალექი რომ მოიმატებს, მაშინ რა უნდა ვქნათ?! გაგვაგებინონ, რა გვეშველება. პატრონი ჰყავს ამ ქვეყანას?! თბილ კაბინეტებში ჯდომა კაია, მარა ნახონ, ჩვენ რა დღეში ვართ _ ტალახი შემოგვდის სახლებში. ეზოში ხეხილი გახმა, მარტო ჩემთან კი არა, ყველგან, ვისაც ჩემსავით ეზო ეტბორება. აღარ ვიცი, რა გზას დავადგე.
ბატონებო, ეს არაა, რომ წვიმა მოვიდა და ეზოში წყალი დადგა _ ეს არის მთიდან წამოსული ღვარცოფი, რომელსაც მერე გაუწმენდავი არხები ვერ ატარებს და ჩვენ გვივარდება ეზოებსა და სახლებში. მისცენ ამ წყალს და ღვარცოფს გზა, წალეკილია ყველაფერი, აღარც ბოსტანია და აღარც ბაღი. არჩევნების წინ მოვიყვანე ადგილობრივი ხელისუფლების წარმომადგენლები და ვაჩვენე, რა დღეშიც ვიყავით. ახლა სოფლის რწმუნებული მოვიდა, მარა რად გინდა _ მოვლენ, წავლენ. იკითხავენ, რა ზარალი მოგადგაო. ზარალი არ არის ეს ყველაფერი?!” _ თქვა კლარა კუტუბიძემ “გურია ნიუსთან” საუბარში.
სუფსის მაჟორიტარმა ია მოქიამ ფეისბუქში საკუთარი და მერის წარმომადგენლის ტელეფონის ნომრები გამოაქვეყნა და დაწერა, სუფსის ადმინისტრაციულ ერთეულში, ვისაც წვიმის გამო რთული მდგომარეობა გაქვთ, დაგვიკავშირდითო. ლანჩხუთის საკრებულოს ჩინოსანი მიიჩნევს, რომ სუფსაში სადრენაჟე სისტემა მისახედია და სოციალურ ქსელში წერს, რომ ამ პრობლემის მოგვარება პრიორიტეტული იქნება.
სუფსაში, სოფელ ხიდმაღალაში ძლიერი წვიმისგან შეწუხებული მოსახლეობის ნაწილი ქუჩაშიც კი გამოვიდა ადგილზე ადგილობრივ მაღალჩინოსანთა მისვლის მოთხოვნით.
“ენით აღუწერელი რამ ხდებოდა აქ დილით _ წყალმა ეზოები მთლიანად დაგვიტბორა. ფაქტობრივად, ბოსტანი აღარ გვაქვს, წყლით იყო ყველაფერი დაფარული. ნალექი დიდხანს რომ გაგრძელებულიყო, არ ვიცი, რა გვეშველებოდა. წლებია, ასე ვართ. ორშაბათს მერიაშიც ვიყავით მისულები. შევხვდით მერს, საკრებულოშიც მივედით. უმრავლესობის ზოგიერთი წევრი აქეთ გამოგვეჭიმა, რას ქვია ხმას იღებთო. ახლა წადით და რამდენიმე საათში ჩვენც მოვალთ, ადგილზე ვნახავთ ყველაფერსო. ველოდეთ დათქმულ დროს, მარა მერე დაგვირეკეს, ორ დღეში მოვალთო.
აჰა, ეს ორი დღე გავიდა და წესით, დღეს უნდა მისულიყვნენ, მაგრამ არავინ ჩანს, არადა, წაგვიღო წყალმა. მოვიდნენ კი არა, ამბავიც არავის უკითხავს. მთელი ქუჩის მოსახლეობა აქ ვართ შეკრებილი და მოვიდნენ, ნახონ, რა დღეში ვართ”, _ ამბობდნენ შეკრებილები. მოსახლეობის პრობლემის გასაცნობად ადგილზე საკრებულოს ოპოზიციონერი წევრები იმყოფებოდნენ “ლელოსა” და გიორგი გახარიას პარტიიდან.
მოგვიანებით ადგილზე მერის წარმომადგენელი სუფსის ადმინისტრაციულ ერთეულში დავით გუმბარიძეც მივიდა. მუნიციპალიტეტის ხელმძღვანელობამ კი მოუცლელობა მოიმიზეზა და შეკრებილ მოსახლეობას შემოუთვალა, რომ მათთან შეხვედრას მომდევნო დღეს გამართავდა.
როგორც “გურია ნიუსმა” გაარკვია, დათქმულ “მომდევნო დღეს” ხიდმაღალას მოსახლეობასთან შესახვედრად მუნიციპალიტეტის მერი და საკრებულოს მაღალჩინოსნები იმყოფებოდნენ. ადგილზე გაეცნენ სანიაღვრე არხებთან დაკავშირებულ პრობლემას და სათანადო ყურადღება აღუთქვეს აქაურებს.
ავტორი
