ახალი წელი გოზინაყის გარეშე წარმოუდგენელია. თუმცა, გოზინაყი ზოგჯერ ხარისხიანი არ გამოდის. ამიტომ, მომზადების წესები ზედმიწევნით უნდა დავიცვათ.
საჭირო მასალა: ერთი კილოგრამი ნიგოზი (ან თხილი). 400 გრამი ნატურალური თაფლი, ნახევარი ჩაის ჭიქა შაქარი.
ნიგოზი მოვხალოთ. ოდნავ შეწითლდეს. გავაცალოთ სიფრიფანა კანი. დავჭრათ პატარა მოგრძო ნაწილებად, როგორც შევძლებთ.
ცალკე ავიღოთ თუჯის ქვაბი ან სხვა სქელძირიანი ჭურჭელი. ჩავასხათ თაფლი და მბჟუტავ ცეცხლზე ვურიოთ, ადუღებიდან ერთი საათით მაინც, ქაფი სანამ არ “დაჯდება” (ზოგი აშორებს ქაფს. თუმცა, თუ არ მოვაშორებთ, ზიანს არ მიაყენებს).
თაფლის წვეთი როცა წყალში უსწრაფესად ჩაიძირება, ამის შემდეგ ჩავყაროთ ნიგოზი. დავიწყოთ სწრაფი მორევა და თან, ნელ-ნელა შაქარი მოვაპნიოთ. ვურიოთ ათი წუთის განმავლობაში და სასწრაფოდ გადავიტანოთ წინასწარ გამზადებულ სველ ფიცარზე. მაშინვე გავაბრტყელოთ ოდნავ სველი ხელით ან ბრტყელი, სველი კოვზით ან ნებისმიერი მოხერხებული ბრტყელტუჩა სამზარეულო ნივთით. ასევე მალე დავჭრათ რომბისებურად. ეს ფორმა ყველაზე ძალიან უხდება გოზინაყს.
თუ შაქრის დამატება არ გსურთ, თქვენი ნებაა. ისეც კარგი იქნება. ცოტა რაოდენობის შაქარი არომატს არ ცვლის, გოზინაყი კი გაცილებით მსხვრევადი და კრატუნა იქნება.
ზოგადად, რბილი გოზინაყი დაბალი ხარისხისაა. ამიტომ ეცადეთ, ზუსტად დაიცვათ მითითებული წესი. ზედმეტი თაფლი არ გამოიყენოთ _ ფიცარზე გაიდღაბნება და ნახელავს გაგიფუჭებთ.
