გვსურს, შემოგთავაზოთ ნიგვზიანი მწვანე პომიდვრის კერძი, რომელსაც ხან პომიდვრის საცივს, ხანაც ჩვეულებრივად, მკვახე პომიდვრის მჟავეს უწოდებენ.
ხუთი კილოგრამი მკვახე პომიდორი დავჭრათ მოზრდილ ნაჭრებად (თუ პატარა ზომის არის ნაყოფი, არ დავჭრათ _ აქა-იქ დავჩხვლიტოთ), დავაყაროთ ცოტა მარილი. დავდგათ. როცა წყალი გაუვა, გადავწუროთ. შემდეგ კიდევ ერთხელ ან საწური აპარატი დავიხმაროთ ფრთხილად, ან ცხრილზე დავყაროთ და დავადოთ რაიმე მძიმე საგანი. დავდგათ. კარგად დაიწრიტოს.
შემდეგ ზეთში მოვშუშოთ ნახევარი კილოგრამი ხახვი. დავნაყოთ თითო სუფრის კოვზი უცხო სუნელი და ხმელი ქინძი, ათი კბილი ნიორი, მარილი გემოვნებით. ამ საკმაზს შევურიოთ ერთი სუფრის კოვზი დაფქული ზაფრანი, ორი ჩაის ჭიქა გატარებული (ან დანაყული) თხილი ან ნიგოზი. შემდეგ ეს საკმაზი კარგად შევურიოთ პომიდორს და ჩავყაროთ ქვაბში, რომელშიც მოშუშული ხახვი გვაქვს. ავურიოთ და ჩავუშვათ ქილებში (უმჯობესია ერთკილოგრამიანებში). ვუყოთ თითო აბი ასპირინი, ჩავუტაროთ სტერილიზაცია 15 წუთით და მოვხუფოთ.
ანალოგიურად მზადდება ბადრიჯნის ნიგვზიანი შეჭამანდი. ოღონდ ბადრიჯანი უნდა გავთალოთ, დავჭრათ კუბიკებად, ცოტა მარილი მოვაყაროთ და კარგად დავწუროთ. შემდეგ იგივე მეთოდით მოვამზადოთ და შევინახოთ.
