სოფო ნინუა ჩოხატაურის მუნიციპალიტეტის სოფელ დაბლაციხეში ცხოვრობს. ახალგაზრდა ქალი ხუთ არასრულწლოვან შვილს მარტო ზრდის. ოჯახს მეოთხე თვეა სოციალური დახმარება შეჩერებული აქვს და როგორც სოფო ამბობს, შიმშილით სიკვდილს ახლობლების დახმარებით გადაურჩნენ:
_ სოციალური დახმარება მას შემდეგ გამიჩერეს, რაც ჩემი მეუღლე დააპატიმრეს. 4 თვეა 125 ლარს ვიღებთ მხოლოდ, რომელსაც ადგილობრივი მუნიციპალიტეტი, როგორც მრავალშვილიან დედას, ისე მიხდის. სხვა შემოსავალი ჩვენ არ გაქვს და ეს თვეები, ბავშვები პრაქტიკულად მშივრები მყავს, _ გვიყვება სოფო.
ის რომ სოფოს შვილებს შიათ საზოგადოებისთვის უცხო არ არის. მისი უფროსი, 8 წლის ვაჟის მონათხრობს ოჯახის გაუსაძლისი მდგომარეობის შესახებ სოციალურ ქსელში დიდი გამოხმაურება მოჰყვა.
მის შესახებ ვიდეორეპორტაჟი სპეციალურ ქსელში საქველმოქმედო ორგანიზაციამ „სიკეთის ქალაქი“ გამოაქვეყნა.
ამ ვიდეოში, რომელსაც ჩვენ არასრულწლოვნის იდენტიფიცირების გამო არ ვაქვეყნებთ, პატარა ბიჭი ყვება, როგორ ენატრება მას და მის ძმებს საჭმელი, ტანსაცმელი.
ის იმდენად მძიმე მოსასმენი იყო, რომ „გურია ნიუსმა“ დახმარებისთვის ჩოხატაურის მუნიციპალიტეტის მერიას მიმართა და რეაგირებაც იყო _ თვითმმართველობის ორგანომ ამ ოჯახისთვის 2000 ლარი უკვე გამოყო.
ოჯახს ჩოხატაურის ბაღების გაერთიანებაც დაეხმარა, რომლის ადმინისტრაციის თანამშრომლებმა სხვადასხვა სურსათ-სანოვაგესთან ერთად მათ რამდენიმე დღის საყოფი შეშაც მიუტანეს.
ის, რომ ოჯახი უკიდურეს გაჭირვებას განიცდის ადგილზე მისულები იოლად გაარკვევთ.
მათ არც ავეჯი აქვთ, არც მაცივარი, არც სარეცხი მანქანა და არც სხვა საჭირო საყოფაცხოვრებო ნივთები.
ერთადერთი ტელევიზორი სოფომ ნინუამ ლომბარდში დატოვა:
_ ჩოხატაურში არიან ადამიანები, რომლებიც ნივთებს იბარებენ. ე.წ. ლომბარდია, თუმცა, იგი ოფიციალურად არ არის რეგისტრირებული.
საკმაოდ დიდი პროცენტები აქვთ, მაგრამ სხვა გზა არ მქონდა და ერთადერთი ტელევიზორი 150 ლარად ჩავაბარე, რომ ბავშვებისთვის პური მეყიდა. 150 ლარზე, ერთ დღეში 1 ლარი და 50 თეთრი უნდა გადავიხადო, _ აღნიშნავს ჩვენი რესპოდენტი.
მისივე მონათხრობით ირკვევა, რომ სოციალური მომსახურების სააგენტო პატარების ბედით სოციალურ ქსელში გამოქვეყნებული ვიდეოს შემდეგ დაინტერესდა. თუმცა, როგორც გაირკვა, ინტერესი ამ დაწესებულებაში სხვაგვარად ესმით.
გუშინ, სოციალური მომსახურების ჩოხატაურის განყოფილებაში დაბარებულ სოფო ნინუას ბევრი შეურაცხყოფის ატანა მოუწია.
როგორც თავად მოგვიყვა, მას მრავალშვილიანობის გამო დასცინეს და ბავშვების ჩამორთმევითაც დაემუქრნენ.
ჩვენი რესპოდენტის მონაყოლი იმდენად მძიმე და დაუჯერებელი იყო, რომ ვთხოვეთ, სააგენტოში გამოგვყოლოდა, რაზეც დაგვთანხმდა.
იქ მისულებს კი სოციალური მომსახურების სააგენტოს თანამშრომლებმა მისი მონათხრობი პრაქტიკულად დაადასტურეს:
_ ხუთ ვაჟკაცს ვუზრდი ქვეყანას და იმის გამო, რომ ჩემმა შვილმა გაჭირვებაზე ილაპარაკა სასაცილოდ ამიგდეთ. თქვით, რომ მრავალშვილიან დედებს სარი უნდა გათხა…ოთ; რომ მათ არც ყანის დათესვა იციან და არც ლობიოს მოყვანა. სასაცილოდ ამიგდეთ. ჩემი შვილის ვიდეო ჩართეთ და იცინოდით, _ გუშინდელი საუბარი ჩვენი თანდასწრებით შეახსენა ნინუამ სააგენტოს თანამშრომლებს.
_ რაზე ვიცინოდით თქვენთან არ შევათანხმებთ. არც უშუალოდ თქვენთვის გვითქვამს. სხვა ბენეფიციარებიც იყო აქ, შემოდგომაა და ვსაუბრობდით, _ განმარტება გააკეთა სოციალური მომსახურების სააგენტოს თანამშრომელმა ნათია თავბერიძემ.
სააგენტოს ჩოხატაურის განყოფილების უფროსი ზურაბ კალანდაძე უფრო შორს წავიდა და აღნიშნა, რომ ნინუა შეურაცხადია.
_ მისი გჯერათ და ჩვენი არა, _ არ ცხრებოდა სააგენტოს თანამშრომელი ნათია თავბერიძე, რომელმაც რამდენჯერმე დაადასტურა, რომ მრავალშვილიანი დედების შესახებ სოციალური მომსახურების სააგენტოში არაკორექტული და შეურაცხმყოფელი საუბრები იყო.
აღსანიშნავია, რომ სოციალური მომსახურების სააგენტოს აგენტმა, ნესტან თოლორდავამ ვერ გვიპასუხა კითხვაზე თუ რატომ არ დაინტერესდა 4 თვის განმავლობაში არასრულწლოვნების ბედით.
სააგენტოში მისულმა სოფო ნინუამ აღნიშნა, რომ თოლორდავა მათი ოჯახის მდგომარეობით მაშინ დაინტერესდა, როცა მეოთხე შვილი შეეძინა:
_ არ მოვსულვარ და არ დამიწყია აქ მათხოვრობა. ერთხელ დავრეკე და ვიკითხე, დახმარება რომ შემიჩერეს რა უნდა მექნება ბავშვებისთვის, მაგრამ პასუხიც არ გამცეს. არავისთვის არაფერი დამივალდებულებია. თავად დამირეკეს გუშინ და მოვედი. ვიფიქრე, რომ დახმარება სურდათ. თუმცა, დახმარების მაგიერ შეურაცხყოფა მივიღე.
არ მინდა ბევრი რამ ვთქვა და მაიძულებენ. ამ დრომდე ხმა არ ამომიღია და არც ის მითქვამს როგორ მთხოვა ქალბატონმა ნესტანმა, თუ ვინმე დაინტერესდებოდა, მეთქვა, რომ ოჯახში დადიოდა. არადა, სულ სამჯერ იყო მოსული, _ აღნიშნა ნინუამ, რაზეც თოლორდავამ თავდაპირველად თქვა, რომ მას არ აქვს ვალდებულება ყოველთვის იაროს, თუმცა, მოგვიანებით აღნიშნა, რომ სანამ ბავშვი ერთი წლის გახდება, თვეში ერთხელ გადამოწმების ვალდებულება აქვს.
