რუსეთის ფედერაციის პრეზიდენტი, ვლადიმირ პუტინი თურქემენეთში ვიზიტის დროს მედიასთან საუბრის ფარგლებში დაემუქრა ფინეთსა და შვედეთს, რომლებიც, სავარაუდოდ, მალე NATO-ს წევრები გახდებიან.
ვლადიმერ პუტინი აღნიშნა, რომ მათ არ აქვთ ისეთი პრობლემები შვედეთთან და ფინეთთან, როგორიც უკრაინასთან. რადგან მათთან მოსკოვს ტერიტორიული დავები არ აქვს.
მისივე განცხადებით, ამ ქვეყნებში ნატო-ს სამხედრო ინფრასტრუქტურის განთავსების შემთხვევაში, მოსკოვი იძულებული გახდება, სარკისებურად იმოქმედოს.
“რაც შეეხება შვედეთსა და ფინეთს, ჩვენ არ გვაქვს ისეთი პრობლემები შვედეთთან და ფინეთთან, რაც, სამწუხაროდ, გვაქვს უკრაინასთან. არ გვაქვს ტერიტორიული საკითხები, დავები, არ გვაქვს არაფერი, ჩვენ არაფერი გვაქვს სანერვიულო ფინეთის ან შვედეთის ნატოში გაწევრიანების თვალსაზრისით. უნდათ [გაწევრიანება]? კი ბატონო.
ნათლად უნდა გვესმოდეს – მანამდე არანაირი საფრთხე არ ყოფილა, სამხედრო კონტიგენტისა და ინფრასტრუქტურის განლაგების შემთხვევაში ჩვენ მოგვიწევს სარკისებურად რეაგირება და იგივე საფრთხეების შექმნა იმ ტერიტორიებისთვის, საიდანაც ისინი გვემუქრებიან”, – თქვა პუტინმა.
პუტინმა თქვა, რომ რუსეთისთვის ფინეთისა და შვედეთის ნატო-ში გაწევრიანება სულაც არაა იგივე, რაც ალიანსში უკრაინის გაწევრიანება და რომ ეს “სულ სხვა რამაა”.
პუტინის თქმით, თუ ფინეთი და შვედეთი NATO-ს კონტინგენტებსა და სამხედრო ინფრასტრუქტურას საკუთარ ტერიტორიაზე განათავსებს, რუსეთი იძულებული იქნება “სარკისებურად” უპასუხოს და საპასუხო საფრთხე შექმნას.
“თუმცა მათ ნათლად და ცხადად უნდა შეიგნონ, რომ ადრე მათთვის არანაირი საფრთხე არ არსებობდა, ახლა, იქ სამხედრო კონტინგენტებისა და ინფრასტრუქტურის განთავსების შემთხვევაში, ჩვენ იძულებული ვიქნებით სარკისებურად ვუპასუხოთ და შევქმნათ ისეთივე საფრთხე იმ ტერიტორიის მიმართ, საიდანაც საფრთხეს გვიქმნიან ჩვენ. ეს ხომ ელემენტარულია. მათ რა, ეს არ ესმით? ყველაფერი კარგად გვქონდა, მაგრამ ახლა გარკვეული დაძაბულობა იქნება, ეს ცხადია, ამის გარეშე შეუძლებელია, ვიმეორებ – თუ ჩვენ საფრთხეს შეგვქმნიან”. – აღნიშნა პუტინმა.
კითხვაზე, შეიცვალა თუ არა “სპეცოპერაციის მიზნები”, ანუ უკრაინაში ომის მიზნები, პუტინმა უპასუხა, რომ არაფერი შეცვლილა – “მე ვუთხარი 24-ის დილას, პირდაპირ საჯაროდ მთელ ქვეყანას, მთელ მსოფლიოს. არაფერი მაქვს დასამატებელი, არაფერი შეცვლილა”.
რუსეთის პრეზიდენტმა კიდევ ერთხელ გაიმეორა რიტორიკა, რომ დასავლეთი და ნატო უკრაინას და უკრაინელ ხალხს იყენებს საკუთარი მიზნების განსამტკიცებლად.
მას შემდეგ რაც საუბარი დაიწყო ფინეთისა და შვედეთის NATO-ში გაწევრიანებაზე, რუსეთი ბალტიის რეგიონში ბირთვული იარაღის განთავსებით იმუქრება. მუქარა ამის შესახებ უკვე რამდენჯერმე გააჟღერა რუსეთის უშიშროების საბჭოს თავმჯდომარის მოადგილემ და ექსპრეზიდენტმა, დმიტრი მედვედევმა.
ავტორი
