“გურია ნიუსის” მიერ ექსკლუზიურად მოპოვებული ინფორმაციის თანახმად, “ქართული ოცნების” ჩოხატაურის პარტიული სიის მეათე ნომერს მაია პაიჭაძეს პარტიიდან რიცხავენ.
ჩვენი წყაროს ინფორმაციით, აღნიშნული გადაწყვეტილება ჩოხატაურისა და ლანჩხუთის მაჟორიტარმა დეპუტატმა ნინო წილოსანმა და გურიის გუბერნატორმა მერაბ ჭანუყვაძემ, გუშინ, დეპუტატობის კანდიდატებთან გამართულ შეხვედრაზე გააჟღერეს.
შეხვედრაზე, რომელსაც თავად პაიჭაძე არ ესწრებოდა, ის ღია წერილი განიხილეს, რომელიც ამ უკანასკნელმა, რამდენიმე დღის წინ, სოციალურ ქსელში გამოაქვეყნა და პარტიის ადგილობრივი ორგანიზაციის ხელმძღვანელს, ჩოხატაურის მერობის კანდიდატს ირაკლი კუჭავას უნიათობასა და კანონდარღვევებში დასდო ბრალი.
როგორც გვითხრეს, შეხვედრაზე მერაბ ჭანუყვაძემ და ნინო წილოსანმა დეპუტატებს აცნობეს, რომ პაიჭაძის გარიცხვის საკითხს ცენტრალურ ოფისში ამ კვირაში განიხილავენ.
გარიცხვის შესახებ ინფორმაციას ნინო წილოსანი არ ადასტურებს, თუმცა, ამბობს, რომ პაიჭაძის საკითხზე იმსჯელეს:
_ მაია პაიჭაძის საკითხი განხილული იყო შეხვედრაზე, მიმდინარე საარჩევნო კამპანიის საკითხებთან ერთად, _ გვითხრა წილოსანმა.
კითხვაზე, როგორია მისი არგუმენტი და რატომ უნდა გაირიცხოს პაიჭაძე პარტიიდან, დეპუტატი ასე გვპასუხობს: „ჩემთვის მიუღებელია უკმაყოფილება და ბრძოლა სიაში ადგილმდებარეობის გამო“.
„გურია ნიუსი“ შეეცადა, შეხვედრაზე მყოფი სხვა პირების პოზიციებიც გაეგო. პარტიის რაიონული ორგანიზაციის თავმჯდომარემ, ჩოხატაურის მერობის კანდიდატმა ირაკლი კუჭავამ კომენტარზე უარი გვითხრა; დუმილი არჩია საარჩევნო შტაბის უფროსმა, პარტიული სიის პირველმა ნომერმა, საკრებულოს თავმჯდომარემ ზაალ მამალაძემ; სატელეფონო ზარებს არ უპასუხა გურიის გუბერნატორმა მერაბ ჭანუყვაძემ.
კომენტარებზე უარი დეპუტატობის კანდიდატებმაც თქვეს:
_ ამ თემაზე არანაირ კომენტარს არ გავაკეთებ, _ აღნიშნა ჩვენთან საუბრისას „ოცნების“ დეპუტატობის კანდიდატმა სოფელ გუთურში ლაშა თოლორდავამ.
_თქვენი დიდი პატივისცემის მიუხედავად, კომენტარს არ გავაკეთებ. ვფიქრობ, ასე სჯობს, _ თქვა ხიდისთავის დეპუტატობის კანდიდატმა კობა კალანდაძემ.
მიუხედავად იმისა, რომ პაიჭაძის გამოქვეყნებულ წერილზე, გუშინდელ შეხვედრაზე დიდხანს მსჯელობდნენ, ზოგიერთმა დეპუტატმა გვითხრა, რომ აღნიშნული წაკითხული არ ჰქონდა.
_ მართლა არ წამიკითხავს. ძალიან დატვირთული ვარ, ვერ მოვიცალე მაგისთვის. კარგად გავეცნობი და მერე გეტყვით ჩემს მოსაზრებას, _ გვითხრა ქვენობანი-ბუკნარი-ბასილეთის თემის მაჟორიტარობის კანდიდატმა დავით გუდავაძემ.
იგივე პასუხი მივიღეთ გორაბერეჟოულის დეპუტატობის კანდიდატის დავით ტყეშელიაძისგან.
ხევის მაჟორიტარი დეპუტატობის კანდიდატი ზვიად მამალაძე, რომელიც საკრებულოში ფრაქცია “ქართულ ოცნებას” ხელმძღვანელობს, ამბობს, რომ პაიჭაძის საქციელი მიუღებელია:
_ ვფიქრობ, რომ მისი საქციელი გაუმართლებელია. არ შეიძლება პარტიის და ფრაქციის წევრი, ათეულში მყოფი ადამიანი ისე იქცეოდეს, როგორც ის იქცევა. რაც შეეხება გარიცხვას _ ეს პარტიის გადასაწყვეტია, _ გვითხრა მამალაძემ.
განსხვავებული პოზიცია დააფიქსირა ჯვარცხმის თემის კანდიდატმა _ კოკა მდინარაძე მიიჩნევს, რომ წერილის გამოქვეყნება არასწორი იყო, თუმცა, ფიქრობს, რომ ამის გამო პაიჭაძე პარტიიდან არ უნდა გაირიცხოს.
ანალოგიურად ფიქრობს „ოცნების“ პარტიული სიის მესამე ნომერი მანანა მინდაძე:
_ ვფიქრობ, რომ გარიცხვა მეტისმეტია, _ გვითხრა მინდაძემ.
სიის მეორე ნომერი, პარტიის რაიონული ორგანიზაციის აღმასრულებელი მდივანი ბექა გამდლიშვილი ამბობს, რომ ეს პარტიის გადასაწყვეტია:
_ მე არ ვყოფილვარ შეხვედრაზე და დეტალებზე ვერაფერს გეტყვით. რაც შეეხება წერილის გამო გარიცხვა-არგარიცხვის საკითხს, ეს პარტიამ უნდა გადაწყვიტოს, _ აღნიშნა გამდლიშვილმა.
სიის მეშვიდე ნომერი მაია გიორგაძე, რომელიც „კონსერვატორების“ წევრია, ამბობს, რომ პაიჭაძის საკითხი მხოლოდ „ქართულმა ოცნებამ“ უნდა გადაწყვიტოს:
_ რაც შეეხება წერილს, ვფიქრობ, რომ არასწორი იყო მისი გამოქვეყნება, _ ამბობს გიორგაძე.
მართალია, რომ სხვა კანდიდატებმა საჯარო კომენტარზე უარი თქვეს, თუმცა, პირად საუბრებში აღნიშნეს, რომ პაიჭაძის საქციელი გუნდის და „ქართული ოცნების“ წინააღმდეგ იყო მიმართული.
ამ დრომდე ჩვენ სატელეფონო ზარებს არ პასუხობს მაია პაიჭაძე, რომელსაც, როგორც ჩვენთვის არის ცნობილი, მეათე ნომრის „საკომპენსაციოდ“ ჩოხატაურის მუნიციპალიტეტის გამგეობაში თანამდებობაც დაპირდნენ, თუმცა ამ დაპირების დეტალებზე არც ერთი მხარე კომენტარს არ აკეთებს.
ამავე ტემაზე: “ისეთივე უნიათო სია წარმოადგინე, როგორი გამგებლობაც შეძელი” _ სიის მეათე ნომრის ღია წერილი
“ოცნების” სიის მეათე ნომერს პარტიიდან რიცხავენ _ “გუნდის წინააღმდეგ წავიდა” (ექსკლუზივი)
“ოცნების” სიიდან “ამოვარდნილი” და განაწყენებული დეპუტატობის კანდიდატები გუბერნატორთან
