ჩოხატაურის მუნიციპალიტეტის სოფელ ვანიდან ლანჩხუთის მუნიციპალიტეტთან დამაკავშირებელი უმოკლესი გზის მოწესრიგებას კარგა ხანია, ითხოვს სოფლის მოსახლეობა, დაპირებაც მიიღეს, რომ პრობლემას მოევლებოდა, თუმცა, ჯერჯერობით, დაპირების შესრულების მოლოდინის რეჟიმში უწევთ ცხოვრება.
არადა, ამ გზით ხშირად უწევთ სარგებლობა სოფელ ვანის მოსახლეობას, რადგან, როგორც თავად ამბობენ, ზოგს ლანჩხუთის ტერიტორიაზე საყანე ფართობები აქვს, ზოგიც სამება-ჯიხეთის მონასტერში ადის მოსალოცად.
„დაახლოებით, სამკილომეტრიანი გზაა, მეტი არა და ამაზე გვაქვს, კარგა ხანია საუბარი, რომ როგორმე მოწესრიგდეს. იმასაც კი არ ვითხოვთ, რომ ასფალტის საფარი დაიგოს, უბრალოდ, ისე მაინც მოაწესრიგონ, რომ წესიერად გავლა იყოს შესაძლებელი. აქ წესიერად ვერც ფეხით გაივლი და ვერც მანქანა-ტრაქტორით. არადა, ამ გზით ხშირად ვსარგებლობთ სოფლის მოსახლეობა. საყანე ფართობები გვაქვს ლანჩხუთის ტერიტორიაზე, სოფელ ქვიანში. ჯიხეთის მონასტერშიც ხშირად ავდივართ. არამარტო ჩვენთვის, ადგილობრივი მოსახლეობისთვის, ამ გზის მოწესრიგება, მნიშვნელოვანია ტურისტებისთვისაც. რუკაზე ნახულობენ, რომ ჩოხატაურიდან ლანჩხუთში გადასასვლელი უმოკლესი გზა აქ გადის, მოდიან და მერე ჩვენ, ადგილობრივებს გვიწევს წვალება, რომ როგორმე დავეხმაროთ ჩარჩენილი მანქანის გამოყვანაში.
წარმოიდგინეთ, ეს გზა რომ გაკეთდეს, ჩვენი სოფლის ცენტრიდან 15 წუთში სამტრედიაში ხარ, 20-კილომეტრიანი უღელტეხილის მოვლის გარეშე. ავტობანთანაც ხომ მარტივად მოხერხდება ამ გზით დაკავშირება?! მოკლედ, ბევრად კარგი და სასიკეთო საქმე იქნება თუ ვინმე ჩოხატაურის მუნიციპალიტეტიდან ყურად იღებს ჩვენს ამ თხოვნას და ზემონახსენები გზის პრობლემას გადაჭრის. სხვათა შორის, ამის თაობაზე მაჟორიტარი დეპუტატი ვასილ ჩიგოგიძეც ჩავაყენეთ საქმის კურსში ჯერ კიდევ საარჩევნო კამპანიის მიმდინარეობისას და მაშინ მისგან პირობა მივიღეთ, რომ დაგვეხმარებოდა საკითხის დადებითად გადაჭრაში და რომ სოფელ ვანიდან ლანჩხუთთან დამაკავშირებელი ეს უმოკლესი გზა გაკეთდებოდა. ვნახოთ, ჯერ კიდევ ველოდებით, როდის შესრულდება ჩვენთვის მოცემული პირობა“, _ ამბობენ სოფელ ვანის მაცხოვრებლები.
ამ გზაზე არსებულ რთული მდგომარეობის თაობაზე ფეისბუქზე წერს სოციალური ქსელის მომხმარებელი ქეთი ლაგვილავაც და მოუწოდებს მათ, ვისაც ხელეწიფებათ, „გაკეთდეს გზა სასწრაფოდ! სირცხვილია!“
„სულ რამდენჯერმე ვარ ნამყოფი ამ გზაზე სოფელ ვანიდან გადავსულვართ… რამდენიმე დღის წინ წავედით ნივით. ნივითაც კი ჭირს უკვე ამ გზაზე „მგზავრობა”, თუ შეიძლება ასე დავარქვათ, არადა, რა კარგი იქნებოდა და როგორი მნიშვნელოვანი ამ გზის გაკეთება, პირველ რიგში, იმ ადამიანებისთვის, ვისაც უჭირთ გადაადგილება და შორ გზაზე წასვლა… თუნდაც სამება-ჯიხეთის გზაზე მცხოვრებთათვის, ვისაც სახნავ-სათესი მიწები აქვთ. სოფელში მაცხოვრებელმა კიდევ უფრო მეტად იცის ამ გზის ფასი, ვიდრე მე, ვინც წელიწადში რამდენჯერმე ჩავდივარ. კარგი იქნება თუ ძალიან არ გაიწელება და დროულად მიექცევა, მართლაც რომ, ისტორიულ გზას ყურადღება. არ ჰყავს ყველას ნივა და ტრაქტორი… თუ ასე გაგრძელდა, არა მარტო ნივით და ტრაქტორით, არამედ ფეხითაც კი გაჭირდება მალე გავლა… გაკეთდეს გზა სასწრაფოდ! სირცხვილია!“ _ წერს ფეისბუქზე ქეთი ლაგვილავა.
როგორც „გურია ნიუსთან“ საუბარში სოფელ ვანში მცხოვრები თემურ ხუხუნაიშვილი ამბობს, გზა, რომლის მოწესრიგებასაც სოფლის მოსახლეობა ითხოვს, ერთნაირად მნიშვნელოვანია, როგორც ადგილობრივი მოსახლეობისთვის, ისე ტურიზმის განვითარების მხრივაც და აქ სარეაბილიტაციო სამუშაოების განხორციელება სტრატეგიულად მნიშვნლოვანია.
„ამ გზით მარტო სოფელ ვანის მოსახლეობა არ სარგებლობს, შვიდი სოფელია მასზე დამოკიდებული, რადგან ეს უმოკლესი გზაა, რომელიც ჩოხატაურიდან ლანჩხუთში გადადის და თან მთისა და ზღვის კურორტებს ერთმანეთთან აკავშირებს. ამის გამო ხშირად ბახმაროდან ზღვის კურორტებისკენ მიმავალი ტურისტები ცდილობენ, ამ გზით ისარგებლონ. რა ქნან, რუკაზე, როგორც უმოკლესი გზა, ისეა აღნიშნული?! სინამდვილეში კი გაუვალი ადგილია და მერე იქ ჩარჩენილებისთვის ადგილობრივებს უწევთ შველა.
ადგილზე გვყავდა კიდეც ამოყვანილი სპეციალისტები, ზუსტად ოთხკილომეტრიანი მონაკვეთია მოსაწესრიგებელი. პროექტის დაახლოებითი ღირებულებაც გავთვალეთ და იმედი გვაქვს, ყველა, ვისაც ევალება თუ ძალა შესწევს ამ პრობლემის მოსაგვარებლად, გვერდში დაგვიდგება. ისიც გასათვალისწინებელია, რომ რაიმე გაუთვალისწინებელი შემთხვევისას, ჩოხატაური-საჯავახოს დამაკავშირებელი გზის ალტერნატიული ვარიანტიცაა და ყველა მხრივ სასიკეთოა მისი გაკეთება“, _ ამბობს თემურ ხუხუნაიშვილი.
„გურია ნიუსი“ სოფელ ვანის მოსახლეობის მხრიდან გაჟღერებულ პრობლემასთან დაკავშირებით სოფლის წარმომადგენელს ჩოხატაურის საკრებულოში გივი თავაძეს დაუკავშირდა.
როგორც სოფლის დეპუტატმა გვითხრა, პრობლემის თაობაზე ინფორმირებულია და მის მოსაგვარებლად საუბარი მომდინარეობს.
„კარგად ნაცნობია ეს საკითხი ჩემთვისაც. ამის თაობაზე ადგილობრივებმა წინასაარჩევნო კამპანიისას საქმის კურსში ჩააყენეს მაშინდელი დეპუტატობის კანდიდატი მმართველი გუნდიდან ვასილ ჩიგოგიძეც. მაშინ მოსახლეობამ მიიღო დახმარების პირობა პრობლემის მოსაგვარებლად. ჯერჯერობით, კონკრეტულად ვერ გეტყვით, როდისთვისაა დაგეგმილი ამ კუთხით გარკვეული ინფრასტრუქტურული სამუშაოები განხორციელდეს, თუმცა, აქტიურად მიმდინარეობს ამაზე მსჯელობა და საუბრები“, _ გვითხრა გივი თავაძემ.
სოფელ ვანის მოსახლეობისთვის საარჩევნოდ გაცემული პირობა გურიის მაჟორიტარ დეპუტატს საქართველოს პარლამენტში ვასილ ჩიგოგიძესაც შევახსენეთ, რომელმაც გვითხრა, რომ საკითხი განხილვის სტადიაშია.
