გვერდი “ქალთა ფეხბურთი” რუბრიკაში “გაიცანი დამწყები ფეხბურთელი” ნუცი შუკვანს გვაცნობს.
ნუცი შუკვანი 12 წლისაა და, როგორც თვითონ გვიყვება ფეხბურთის სიყვარული პატარა ასაკიდან აქვს.
„ჩემი პირველი ნაბიჯები არ მახსოვს, მაგრამ მახსოვს ის, რომ ყველა თამაში მხოლოდ ბურთთან ასოცირდებოდა და მხოლოდ ასე შემეძლო გართობა, 3 წლის ასაკშიც კი ბურთს ვაგორავებდი და მაშინ, როცა ჩემი თანატოლი გოგონები ყოველთვის თოჯინებით ერთობოდნენ, მე ეზოში რომელიმე ბიჭს კარში ვურტყამდი ბურთს და გოლს რომ გავუტანდი, ყველაზე ბედნიერი ვიყავი…
სკოლაში რომ შევედი, ჩემს მშობლებს ვუთხარი, რომ ფეხბურთზე მინდოდა სიარული. ჩემი სურვილი პირველ ჯერზე სერიოზულად არავინ აღიქვა, ეგონათ ასაკთან ერთად ეს სურვილიც გადაივლიდა, თუმცა ბოლოს სერიოზულად დარწმუნდნენ ჩემს ნამდვილ ინტერესებში და ფეხბურთზე შემიყვანეს, სადაც გოგონებს ავარჯიშებდნენ.
მიუხედავად იმისა, რომ უკვე დავდიოდი ფეხბურთზე, ჩემი უბნის სტადიონზე სერიოზულად არავინ ეკიდებოდა ჩემს უნარებს და ბიჭები არ მაძლევდნენ უფლებას, მათთან ერთად მეთამაშა. ეს ყოველთვის იწვევდა ჩემში პროტესტის გრძნობას, ვერც მათთან ვთამაშობდი და ვერც ჩემს თანატოლ გოგონებთან, რომლებსაც ბურთი საერთოდ არ აინტერესებდათ.
ნელ-ნელა სიტუაცია შეიცვალა და ჩემი უბნელი ბიჭები მიხვდნენ, რომ ცუდად არ ვთამაშობდი, სიზუსტისთვის ვიტყვი, რომ ბევრსაც ვჯობდი თამაშში. ამასობაში ყველას მოსწონდა ჩემი ჩაწოდებული პასები, გადაცემები, გუნდური თამაშის პრინციპი… ახლა, როცა ბიჭებს ფეხბურთის თამაში სურთ, პირველს მე შემომძახებენ და მიხმობენ სათამაშოდ…
რაც შეეხება ჩემს გუნდს, ძალიან მაგარი გოგონები გვყავს გუნდში და უმაგრესი მწრთვნელი, რომელმაც ზუსტად იცის ჩვენი ფასი და ყველაფერს აკეთებს იმისთვის, რომ სწორად განვვითარდეთ და კარგ ფეხბურთელებად ჩამოვყალიბდეთ. დავდივარ გლდანის აკადემიაში და ვთამაშობ 15-წლამდე გოგონათა გუნდში. ყველა მათგანი ძალიან მიყვარს, ძალიან ვგულშემატკივრობ და ზუსტად ვიცი, მათ შეუძლიათ მთავარი სტერეოტიპი დაამსხვრიონ – ქალს ფეხბურთის თამაში ისევე კარგად შეუძლია, როგორც მამაკაცს. ჩვენ ერთმანეთს ზურგს ვუმაგრებთ, ჩვენი მწრვთნელი კი ჩვენთვის დიდი სტიმულის მომცემია, რომელსაც ისევე სჯერა ჩვენი, როგორც ჩვენს მშობლებს.
მე ნუცი შუკვანი ვარ, 12 წლის და ყველაფერს გავაკეთებ იმისთვის, რომ ფეხბურთში ჩემი მიღწევებით ყველას დავუმტკიცო – როცა რაღაც ძალიან გიყვარს, ყველაფერი მარტივად შესაძლებელია.“
