„ბიძინა ივანიშვილს ქვეყნისთვის სასიკეთო საქმეების გაკეთების რესურსი ამოეწურა. „ქართულ ოცნებას“ ახალი სახე ვერ უშველის, რადგან ახალი ადამიანი ისეთ ძველ და მახინჯ სისტემაში ექცევა, რომელიც მას არარაობად აქცევს. როდესაც ადამიანი მცდარ გზაზეა დამდგარი, მას აღარც სისხლი შველის და აღარც რჩევა-დარიგება“, _ აღნიშნა „გურია ნიუსთან“ „შენების მოძრაობის“ ლიდერმა დავით უსუფაშვილმა.
მისივე თქმით, „მე და ბევრი სხვა ადამიანი სახელმწიფოებრივი მშენებლობის საკითხებში ძალიან სწორ ინიციატივებს ვაყენებდით, რომელთა გაზიარება მმართველ პარტიას არ სურდა“.
_ ბატონო დავით, „ქართულ ოცნებაში“ შექმნილი კრიზისული ვითარების ფონზე, თქვენ „პალიტრანიუსის“ გადაცემა „360 გრადუსში“ მმართველი პარტიის მისამართით განაცხადეთ, ციტირება _ „მზად ვარ გავიღო სისხლი, თუ გჭირდებათ სისხლის გადასხმა და რეზუსი თუ დაემთხვა“. პოლიტიკური გაყრის შემდეგ გსურთ, რომ ქვეყანაში და პარტიაში არსებული კრიზისის დაძლევის მიზნით, მმართველ პარტიას დაეხმაროთ?
_ ვუპასუხე გადაცემის წამყვანს, რომელიც ბრძანებდა, რომ მმართველ პარტიას ახალი სისხლი სჭირდებოდა. „ქართული ოცნება“ შვიდი წელია ხელისუფლებაშია და ამ დროის განმავლობაში რით ვერ მონახეს ისეთი სისხლი, რომელიც მათ სწორ გზაზე დააყენებდა. ვთქვი, რომ იმ შემთხვევაში, თუ ჩემი სისხლი უშველით, მზად ვარ, ჩემი სისხლი მივცე. ცხადია, ამ კონტექსტში ვგულისხმობ ჩემს გამოცდილებას, რჩევებსა და არგუმენტებს. მე და ბევრი სხვა ადამიანი სახელმწიფოებრივი მშენებლობის საკითხებში ძალიან სწორ ინიციატივებს ვაყენებდით, რომელთა გაზიარება მმართველ პარტიას არ სურდა. „ქართული ოცნება“ არავის აღარ უსმენს. მათ უკვე საკუთარი შესაძლებლობები ამოწურეს. ბიძინა ივანიშვილმა ქვეყნისთვის სასიკეთო საქმეების გაკეთების რესურსი ამოწურა. „ქართულ ოცნებას“ ახალი სახე ვერ უშველის, რადგან ახალი ადამიანი ისეთ ძველ და მახინჯ სისტემაში ექცევა, რომელიც მის შრომას არარაობად აქცევს. როდესაც ადამიანი მცდარ გზაზეა დამდგარი, მას აღარც სისხლი შველის და აღარც რჩევა-დარიგება.
_ როგორ ფიქრობთ, ბიძინა ივანიშვილი აცნობიერებს, რომ “აღმავალი და აღმშენებლური“ ქვეყნისგან, „ქართული ოცნების“ ხელისუფლებაში მოსვლიდან შვიდი წლისთავზე საქართველო ჯერ კიდევ ძალიან შორს არის?
_ ბიძინა ივანიშვილი ყველაზე კარგად აცნობიერებს და ქვეყანაში არსებული ვითარების გამოსწორების ნაცვლად, მეტ და მეტ შეცდომას უშვებს. „ქართულ ოცნებას“ წარუმატებლობის კასკადი დაადგა. მმართველი პარტია ერთადერთ წარმატებას არჩევნებში აღწევს და ისიც გაყალბების საშუალებით, რაც საპრეზიდენტო არჩევნებში კარგად გამოჩნდა. დღეს ყველა მიმართულებაში, მათ შორის, ეკონომიკაში და სოციალურ საკითხებში სერიოზული პრობლემებია. ისეთ მასშტაბურ კრიზისებთან გვაქვს საქმე, რომ მმართველი პარტია თავად აცნობიერებს რამხელა პრობლემის წინაშე დგას.
_“ქართულ ოცნებას“ პარტიის მუშაობით უკმაყოფილო დეპუტატები ტოვებენ და როგორც ჩანს, გუნდში ურჩი დეპუტატების რაოდენობა უფრო და უფრო გაიზრდება. თქვენ რას უკავშირებთ მმართველი პარტიიდან დეპუტატების გადინების პროცესს?
_ სხვადასხვა მიზეზი არსებობს. ზოგი დეპუტატი თვლის, რომ “ქართულ ოცნებასთან“ ერთად წარმატებას ვერ მიაღწევს და ალტერნატიულ გზას ეძებს. ზოგს მიაჩნია, რომ მათ პარტია აღარ დაიყენებს გვერდით და გაგდებას სჯობს, თავად წავიდნენ. ფაქტია, „ქართულ ოცნებაში“ შემავალ თითქმის ყველა დეპუტატს გარკვეული საფრთხის განცდა აქვს. წამსვლელი წავიდა და ვინც პარტიაში დარჩა, ვაი მათ დარჩენას, ყველას ცხვირ-პირი ჩამოსტირის. დარჩენილებს განცდა არ აქვთ, რომ თავიანთ საქმეს კარგად ვერ აკეთებენ. ეს დემორალიზება სახელისუფლებო სისტემაში კი სრულიად აშკარაა.
_ ჩვენთან ინტერვიუში „ქართული ოცნების“ ყოფილმა დეპუტატმა ეკა ბესელიამ განაცხადა, ციტირება _ „ჩემი ამოცანა ბიძინა ივანიშვილთან დაპირისპირება არ არის“. როგორ ფიქრობთ, რატომ ვერ ბედავს ბესელია პარლამენტის თავმჯდომარისა და მისი თანამოაზრეების გაკრიტიკების ნაცვლად, სასამართლო სისტემასთან დაკავშირებით, ბიძინა ივანიშვილს საჯაროდ დაუპირისპირდეს?
_ ეკა ბესელიას ტაქტიკა ასეთია და ჩემგან ძალიან შორს არის მოსაზრება იმის შესახებ, რომ „ქართული ოცნების“ ყოფილი დეპუტატი ბიძინა ივანიშვილის პროექტია. საკითხის ისე დაყენება, თითქოს რაღაც შეთქმულებასთან გვაქვს საქმე, აბსურდულია.
_ გუშინ პროკურატურამ „თიბისი ბანკის“ დამფუძნებლების საქმე საზოგადოებას კიდევ ერთხელ შეახსენა. იქიდან გამომდინარე, რომ საგამოძიებო უწყებას ახალი არაფერი უთქვამს პაატა ღაღაძის სახელითა და გვარით დაინტერესების გარდა, რას ემსახურებოდა აღნიშნული განცხადება?
_ საკმაოდ აბსურდულ სიტუაციასთან გვაქვს საქმე. ეროვნულმა ბანკმა, რომლისგანაც საჯარო განმარტებებს მოველოდით, ჩათვალა, რომ „თიბისი ბანკის“ შესახებ ლაპარაკი არ შეუძლია. პროკურატურა, რომელიც სესხების გაცემაზე და საფინანსო წესების დარღვევაზე სასაუბროდ ეროვნულ ბანკთან შედარებით, ბუნებრივია, ნაკლებად კომპეტენტურია, აღნიშნულ საკითხზე გვესაუბრა. ასე რომ, აბსურდთან გვაქვს საქმე. პროკურატურის განცხადება კიდევ ერთი ნიშანია იმისა, რომ „თიბისი ბანკის“ დამფუძნებლების წინააღმდეგ დაწყებული სამართლებრივი დავა პოლიტიკურად მოტივირებულია. საქმე გვაქვს ისეთ პოლიტიკურ ფსკერთან, რომელშიც პროკურატურა და ეროვნული ბანკი ერთობლივად არის ჩართული, ბიძინა ივანიშვილი კი ამ ინსტიტუტების ნგრევით არის დაკავებული.
_მიუხედავად იმისა, რომ ანაკლიის პორტის მშენებლობაში სახელმწიფო თავად არის ჩართული, როგორ ფიქრობთ, ბიძინა ივანიშვილს პორტის მშენებლობისთვის ხელის შეშლა ან სულ მცირე, ამ საქმეში „თიბისის“ დამფუძნებლების ჩამოშორება სურს?
_ამ დრომდე ბევრმა ფაქტმა მოიყარა თავი და უკეთესად გამოჩნდა, რომ ამ საქმეში ივანიშვილს საკუთარი კერძო ინტერესები გააჩნია. რადგან გიორგი მარგველაშვილი პოლიტიკაში აღარ არის, ბიძინა ივანიშვილი ვიღაცას ხომ უნდა ებრძოლოს.
