დღეს, საღამოს, ტელეკომპანია „პირველის“ ეთერში გავიდა მასალა, რომ ჩოხატაურის საგანმანათლებლო რესურსცენტრში, ჩოხატაურის მუნიციპალიტეტის საკრებულოს დეპუტატი მაია პაიჭაძე შეხვდა ჩოხატაურის საჯარო სკოლის დირექტორებს და დაავალა მათ, რომ ხვალ, არჩევნებზე “ქართული ოცნების“ სასარგებლოდ იმუშაონ.
“გურია ნიუსი“ დაუკავშირდა “ქართული ოცნების“ რაიონული ორგანიზაციის და საარჩევნო შტაბის უფროსს ირაკლი კუჭავას:
_ ეს ფაქტი ჩემთვის უცნობია. მაია პაიჭაძეს “ქართული ოცნების“ ჩოხატაურის საარჩევნო შტაბთან არანაირი კავშირი არ გააჩნია. უფრო მეტიც _ პარტიასთან შეხება, დიდი ხანია, არ აქვს.
მე არ ვიცი, რა ქმდებები ჩაიდინა ამ ქალბატონმა ან მოხდა თუ არა ეს ფაქტი ნამდვილად, მაგრამ, ბუნებრივია, ამაზე პასუხისმგებლობას “ქართული ოცნების“ ჩოხატაურის ორგანიზაცია არ და ვერ აიღებს.
_ ბატონო ირაკლი, მაია პაიჭაძე ხომ საკრებულოს დეპუტატია “ქართული ოცნების“ სიით?
_ მაია პაიჭაძე ადგილმონაცვლეობით შევიდა საკრებულოში, სულ ახლახან.
_ “ქართული ოცნების“ წევრი ხომ არის?
_ “ქართული ოცნების“ წევრი იყო, მაგრამ, იგი არ კონტაქტობს ჩვენთან და მასთან არც კომუნიკაცია არ არსებობს.
_ ანუ ეს შეხვედრა მისი ინიაციატივით მოხდა?
_ თუ ეს შეხვედრა ნამდვილად შედგა, ეს არის მისი თვითინიციატივა. მე, როგორც ჩოხატაურის მერი, სკოლის დირექტორებს, დიდი ხანია, არ შევხვედრივარ და თუ შევხვდებოდი, მხოლოდ სასწავლო პროცესთან, კოვიდთან დაკავშირებით ვისაუბრებოდი, _ გვითხრა ირაკლი კუჭავამ.
მისი თქმით, თუ ეს ფაქტი დადასტურდა, ამის შესახებ “ქართული ოცნების“ შტაბში არჩევნების შემდეგ იმსჯელებენ.
ჩოხატაურის საგანმანათლებლო რესურსცენტრის უფროს შორენა სიხარულიძე ჩვენთან საუბრის დროს ამბობს, მაია პაიჭაძეს შეხება არ ქონდა სკოლის დირექტორებთან:
“ვინ არის მაია პაიჭაძე, რომ რესურსცენტრში შეკრიბოს სკოლის დირექტორები?!“ _ გვითხრა შორენა სიხარულიძემ, თუმცა, ტელეკომპანია „პირველთან“ სკოლის დირექტორები ადასტურებენ, მათ მართლაც მიიღეს დირექტივები, რომ ხვალ „ქართული ოცნების“ სასარგებლოდ იმუშაონ.
ჩვენ ვცადეთ მაია პაიჭაძეს დავკავშირებოდით, თუმცა, ის ჩვენს სატელეფონო ზარებს არ პასუხობს.
ამ საკითხთან დაკავშირებით ოპოზიციურ პარტიებშიე ბრიფინგი ჩაინიშნა, რომელსაც “გურია ნიუსი“ რამდენიმე წუთში შემოგთავაზებთ.
