“ქართულმა ოცნებამ” თვითმმართველობის არჩევნებისთვის, რომელიც შემოდგომაზე უნდა ჩატარდეს, მზადება დაიწყო. “გურია ნიუსის” მიერ მოპოვებული ინფორმაციით, პარტიის ცენტრალური ოფისიდან ადგილობრივ ოფისებს უკვე მოსთხოვეს კანდიდატთა სავარაუდო სიები. როგორც გვითხრეს, თითო მაჟორიტარულ უბანში, ადგილობრივ ორგანიზაციას სამ-სამი კანდიდატი უნდა წარედგინა და სწორედ ამის შემდეგ დაწყებულიყო მსჯელობა საბოლოო კანდიდატზე. თუმცა, ჩვენ მიერ მოპოვებულ სიაში, რომელიც პარტიის ცენტრალურ ოფისში ჩოხატაურიდან გადაიგზავნა, ზოგიერთ მაჟორიტარულ უბანში ერთი კანდიდატია _ “მეტი კადრი ვერ ინახას”, მიზეზით.
წარდგენილი სიის თანახმად, დაბა ჩოხატაურში ორი კანდიდატურა განიხილება _ დროებით უმუშევარი დავით ბერძენიშვილი და საკრებულოს ფრაქცია “ქართული ოცნების” თავმჯდომარე ზვიად მამალაძე;
ბუკისციხეში _ “ეროვნული ფორუმიდან” გარიცხული, ცოტა ხნის წინ პარტია “ქართულ ოცნებაში” გაწევრიანებული, მოქმედი დეპუტატი ქეთევან სიხარულიძე და პედაგოგი ლალი წულაია;
ამაღლებაში უკონკურენტოდ ჰყავთ წარდგენილი გამგებლის წარმომადგენლის თანაშემწე ზვიად წეროძე;
გოგოლესუბანში ორი კანდიდატია _ გამგებლის წარმომადგენელი დავით სიხარულიძე და ამჟამინდელი საკრებულოს დამოუკიდებელი დეპუტატი აკაკი ყაჭეიშვილი, რომელიც 2012 წელს “ნაციონალური მოძრაობის” აქტიური მხარდამჭერი იყო და უფრო მეტიც, გამგეობის შენობაში, სადაც იმ დროს ჟურნალისტებსაც კი არ უშვებდნენ, წინასაარჩევნო კამპანიის დროს, “ნაციონალური მოძრაობის” მაისურით დადიოდა და არც მედიის შეურაცხყოფაზე ამბობდა უარს.
ყაჭეიშვილი, რომელიც ჩოხატაურის საკრებულოში ფრაქცია “ერთობას” ხელმძღვანელობს, ამბობს, რომ ამის შესახებ მასთან არავის უსაუბრია:
_ არ ვიცი, რა სიაზე მესაუბრებით. ჯერ არაფერი გადამიწყვეტია, _ გვითხრა ყაჭეიშვილმა.
_ 2012 წელს “ნაციონალური მოძრაობის” აქტიური მხარდამჭერი იყავით, შემდეგ დამოუკიდებელი დეპუტატი გახდით. ახლა უკვე სიაში ვკითხულობთ თქვენს გვარს და საინტერესოა, რამ გამოიწვია ეს პორტირება?
_ მე სია არ მინახავს. ჩემთან ამაზე საუბარი არ ყოფილა.
_ აპირებთ “ქართულ ოცნებაში” გაერთიანებას?
_ ვნახოთ, ოქტომბრამდე დიდი დროა, _ აღნიშნა “გურია ნიუსთან” საუბრისას ყაჭეიშვილმა.
“ქართული ოცნების” სიაში საკრებულოს კიდევ ერთი ოპოზიციონერი დეპუტატი მოხვდა _ “რესპუბლიკელი” დავით ტყეშელიაძე, რომლის კონკურენტად გაერთიანებული წყალმომარაგების კომპანიის თანამშრომელი გოჩა მეფარიშვილია დასახელებული.
ტყეშელიაძე ამბობს, რომ “რესპუბლიკელებს” მალე დატოვებს:
_ ვინც პარტია შექმნა, იმათ დატოვეს და მე რაღა მინდა იქ?! მალე ვაპირებ წამოსვლას. “რესპუბლიკელებშიც” იმიტომ შევედი, რომ თავიდან ჩემი ადგილი არ აღმოჩნდა რატომღაც “ქართულ ოცნებაში”. ახლა ვაპირებ შევუერთდე, _ გვითხრა ტყეშელიაძემ.
მმართველ პარტიას გუთურის ოლქში, მოქმედი დეპუტატი ლაშა თოლორდავა უალტერნატივოდ ჰყავს წარდგენილი.
დაბლაციხეში ორი კანდიდატია _ გამგებლის წარმომადგენელი გიორგი ოსეფაიშვილი და საკრებულოს ფრაქცია “რესპუბლიკელების” თავმჯდომარე გოჩა ჯიქია.
ჩვენთან საუბრისას ჯიქია ამბობს, რომ, ჯერჯერობით, “რესპუბლიკელების” დატოვების გადაწყვეტილება არ მიუღია:
_ ჯერჯერობით, არ ვტოვებ, _ ამბობს ჯიქია.
_ სანამდე?
_ ფრაქციის თავმჯდომარე ვარ და როგორ დავტოვებ?
_ ხელფასს რომ იღებთ, იმიტომ არ ტოვებთ თუ სხვა მიზეზია?
_ ასე არაა პოლიტიკა _ ხელფასს ვიღებ, ამიტომ და იმიტომ… “რესპუბლიკური პარტია” მოქმედებს, მუშაობს, როგორც ფრაქცია და რა მოხდება შემდეგ, არ ვიცი. შევხედოთ.
_ “ოცნების” კანდიდატთა სავარაუდო სიაში თქვენ პარტიის წარმომადგენლად ხართ დასახელებული. იცოდით ამის შესახებ?
_ კი, ვიცი.
_ ანუ, თანახმა ხართ რომ “ქართული ოცნების” სახელით იყაროთ კენჭი?
_ ეს სავარაუდო სიაა. კანონმდებლობით, არჩევნებამდე 45 დღით ადრე უნდა მოხდეს კანდიდატების რეგისტრაცია. შესაბამისად, მანამდე დიდი დროა. მართალია, კანდიდატურა გადაცემულია, მაგრამ ჯერ დაზუსტებული არაა. თუ დავტოვებ “რესპუბლიკელებს” და გადავწყვეტ კენჭისყრას, რა თქმა უნდა, ეს იქნება “ქართული ოცნებიდან”. ალბათ, გახსოვთ, რომ “ქართული ოცნების” კოალიციის ხელმძღვანელი ვიყავი და ვმართავდი “ოცნებას”, როგორც კოალიციას. მაშინ პარტია “ქართული ოცნება” ფეხადგმულიც არ ყოფილა. ვნახოთ, ახლა რა იქნება, როგორ განვითარდება მოვლენები, გაძლიერდება თუ არა ჩვენი პარტია, რა შემოთავაზება იქნება. ჯერჯერობით, ეს სავარაუდო მოსაზრებაა და ნუ გავუსწრებთ მოვლენებს, _ აღნიშნა “გურია ნიუსთან” საუბრისას გოჩა ჯიქიამ.
“ქართულმა ოცნებამ” სოფელ დიდ ვანში კონკურენტის გარეშე მოქმედი დეპუტატი გიორგი რამიშვილი წარადგინა, რომელიც ასევე არ არის “ქართული ოცნების” წევრი და რომელმაც 2014 წლის არჩევნებში, როგორც დამოუკიდებელმა კანდიდატმა, კოალიციის კანდიდატი დაამარცხა.
ერკეთში ორი კანდიდატია _ ინდმეწარმე სერგო კობიძე და ექიმი ნატო ჩანტლაძე, რომელიც 2010-2012 წლის მოწვევის საკრებულოში “ნაციონალურ მოძრაობას” წარმოადგენდა და “ქართულ ოცნებას” 2012 წელს, საპარლამენტო არჩევნებიდან ზუსტად 12 დღეში შეუერთდა. თუმცა, 2012 წლის წინასაარჩევნო პერიოდში აქტიურად იყო ჩართული “ნაციონალური მოძრაობის” საარჩევნო კამპანიაში. უფრო მეტიც, ჩვენს არქივში ინახება კადრები, როცა იმდროინდელ გამგებელს ლელა იმედაშვილს, გამგეობის შენობაში ღამის 12 საათზე სტუმრობდა, შეხვედრიდან გამოსული კი გვიმტკიცებდა, რომ იმედაშვილს სოფლის პროექტებზე ესაუბრებოდა(?!).
თუმცა, ამ ყველაფერს მისთვის ხელი არ შეუშლია, რომ ხელისუფლების ცვლილებისთანავე “ქართული ოცნების” ნავში გადამჯდარიყო.
რაც შეეხება დანარჩენ კანდიდატებს _ “ოცნებამ” ზემოსურებში მოქმედი დეპუტატი ოთარ სოროზანიშვილი კონკურენტის გარეშე წარადგინა; ზემოხეთში დროებით უმუშევარი კახა გიორგაძე და მოქმედი დეპუტატი ერეკლე უღრელიძე არიან წარდგენილები. უღრელიძე ამჟამად “თავისუფალი დემოკრატების” რიგებში ირიცხება. ჩვენთან საუბრისას ამბობს, რომ პარტია საჯარო განცხადებით დატოვა:
_ საჯარო განცხადება გავაკეთე და წამოვედი, თუმცა, ოფიციალურად, წერილობით არ მიმიმართავს პარტიისთვის. თუ საჭიროა, ამასაც გავაკეთებ. ამჟამად კი დამოუკიდებელი დეპუტატი ვარ. რაც შეეხება სამომავლო გეგმებს, არ ვიცი, რა იქნება და ახლა არც იმის თქმა შემიძლია, გავხდები თუ არა “ქართული ოცნების” წევრი, _ გვითხრა უღრელიძემ.
მისივე თქმით, აღნიშნული სიის შესახებ საქმის კურსშია:
_ ვიცი ამ სიის შესახებ, ჩემთან გაიარეს ეს საკითხი, თუმცა, საბოლოო არ არის და შესაბამისად, დრო კიდევ გვაქვს, _ თქვა უღრელიძემ.
“ქართულმა ოცნებამ” ზომლეთში უკონკურენტოდ დაასახელა სკოლის დირექტორი რევაზ ვადაჭკორია, რომელიც 2014 წლის არჩევნებზე დამოუკიდებელ კანდიდატთან დამარცხდა.
ზოტში მოქმედი დეპუტატის უშანგი ართმელაძის და პედაგოგ ნანა ირემაძის კანდიდატურები განიხილება; კოხნარში _ დეპუტატ დავით ვაჩეიშვილის და დროებით უმუშევარ გიორგი მაღულარიას; ნაბეღლავში კონკურენტის გარეშეა წარდგენილი დეპუტატი ბაკურ შარაშიძე; საჭამიასერში დეპუტატ ალეკო კვინტრაძის და გამგებლის წარმომადგენლის ელზა ზაქარეიშვილს კანდიდატურებს განიხილავენ; ფარცხმაში უკონკურენტოდაა შოთა ცინცაძე, რომელიც “ნაციონალების” დროს სოფლის რწმუნებულად მუშაობდა; ბუკნარში _ დავით გუდავაძე; შუა ამაღლებაში საკრებულოს თავმჯდომარის მოადგილის ვლადიმერ სიხარულიძის კონკურენტად გამგებლის წარმომადგენელი ბელა შათირიშვილია დასახელებული; ჯვარცხმაში კონკურენტის გარეშეა ამირან ბასილია, რომელიც “ქართული ოცნების” ხელისუფლებაში მოსვლამდე ჩოხატაურის საკრებულოში “ნაციონალურ მოძრაობას” წარმოადგენდა.
ხევში გამგებლის წარმომადგენელ ზვიად ვაჩეიშვილთან ერთად, ასევე, განიხილება ფრაქცია “ქართული ოცნების” თავმჯდომარე ზვიად მამალაძე, რომლის კანდიდატურა დაბა ჩოხატაურშიცაა დასახელებული.
ხიდისთავში “ოცნება” არჩევნის გაკეთებას ეცდება დამოუკიდებელ დეპუტატ კობა კალანდაძეს და ინდმეწარმე ზურაბ მათითაიშვილს შორის. აღსანიშნავია, რომ კალანდაძემ 2014 წელს, როგორც დამოუკიდებელმა კანდიდატმა, კოალიციის კანდიდატს მოუგო.
“ქართული ოცნების” ჩოხატაურის ორგანიზაციის ხელმძღვანელი ირაკლი კუჭავა ამბობს, რომ მისთვის ეს სია უცნობია. მისივე თქმით, პარტია ცოცხალი ორგანიზმია, სამუშაო პროცესი მუდმივად მიმდინარეობს, თუმცა, ამ ეტაპზე მისი მხრიდან სიები არ შედგენილა.
თუმცა, სია რომ შედგა და კანდიდატებთან კონსულტაციების გაიარეს, ამას ჩვენი რესპონდენტები არ მალავენ. “ქართული ოცნების” ცენტრალურ ოფისში არც ის დაგვიმალეს, რომ აღნიშნული სია მათი მოთხოვნით შედგა და რომ კანდიდატურების განხილვები ამ კვირაში აქტიურად დაიწყება.
