“გურია ნიუსის” მიერ ექსკლუზიურად მოპოვებული ინფორმაციის თანახმად, ადგილობრივი თვითმმართველობის არჩევნებამდე 22 დღით ადრე, “ქართული ოცნების” ჩოხატაურის პროპორციული სიის მეათე ნომერს მაია პაიჭაძეს პარტიიდან რიცხავენ. ჩვენი წყაროს ინფორმაციით, აღნიშნული გადაწყვეტილება ჩოხატაურისა და ლანჩხუთის მაჟორიტარმა დეპუტატმა ნინო წილოსანმა და გურიის გუბერნატორმა მერაბ ჭანუყვაძემ, გუშინ, დეპუტატობის კანდიდატებთან გამართულ შეხვედრაზე გააჟღერეს.
შეხვედრაზე, რომელსაც თავად პაიჭაძე არ ესწრებოდა, ის ღია წერილი განიხილეს, რომელიც ამ უკანასკნელმა, რამდენიმე დღის წინ, სოციალურ ქსელში გამოაქვეყნა და პარტიის ადგილობრივი ორგანიზაციის ხელმძღვანელს, ჩოხატაურის მერობის კანდიდატს ირაკლი კუჭავას უნიათობასა და კანონდარღვევაში დასდო ბრალი.
ამავე წერილში პაიჭაძე აღნიშნავს, რომ ის მეათე ნომრად განწესებას არ იმსახურებდა:
“მერობის ასეთ კანდიდატს, რომელიც მოცემული პარტიული სიით აპირებს მომდევნო ოთხი წელი მართოს მუნიციპალიტეტი, ნამდვილად არ იმსახურებს ჩოხატაურის საზოგადოება, რომელსაც მაღალი პოლიტიკური კულტურა აქვს და მე ვუთანაგრძნობ იმ პოლიტიკოსებს, რომლებმაც ირაკლი კუჭავას მერობის კანდიდატად დასახელებით მნიშვნელოვნად აზარალეს “ქართული ოცნება”, _ წერს პაიჭაძე.
ამ წერილში პაიჭაძის ბრალდებების ადრესატი მხოლოდ ირაკლი კუჭავაა, თუმცა, ჩვენთვის ცნობილია, რომ მისი სიაში ჩასმის წინააღმდეგი ჩოხატაურში ბევრი ადამიანი იყო _ მათ შორის მისი კოლეგებიც, რომლებმაც პარტიის ცენტრალურ ოფისს თავიანთი არგუმენტები არაერთხელ გააცნეს.
ამ თემაზე ღიად საუბარი დღეს არავის უნდა. “ქართული ოცნების” ჩოხატაურის ორგანიზაციაში მხოლოდ იმას ამბობენ, რომ პაიჭაძე გუნდის წინააღმდეგ წავიდა და პარტიაში ყოფნას არ იმსახურებს, თუმცა, კონკრეტიკაზე საუბარს თავს არიდებენ.
ჩვენ შევეცადეთ კომენტარები გუშინდელი შეხვედრის შესახებაც მოგვეპოვებინა, თუმცა უშედეგოდ. არც ნინო წილოსანმა და არც მერაბ ჭანუყვაძემ ჩვენ სატელეფონო ზარებს არ უპასუხეს.
ირაკლი კუჭავამ კი გვითხრა, რომ ამ თემაზე კომენტარს არ გააკეთებს.
კომენტარზე უარი გვითხრა “ოცნების” ჩოხატაურის საარჩევნო შტაბის ხელმძღვანელმა, საკრებულოს თავმჯდომარემ ზაალ მამალაძემ, რომელიც შეხვედრას ესწრებოდა.
რამდენიმე მცდელობის მიუხედავად, ჩვენი სატელეფონო ზარები უპასუხოდ დატოვა მაია პაიჭაძემაც, რომლის პარტიიდან გარიცხვა, ჩვენი წყაროს ინფორმაციით ამ კვირაში უნდა მოხდეს.
ამავე თემაზე: “ისეთივე უნიათო სია წარმოადგინე, როგორი გამგებლობაც შეძელი” _ სიის მეათე ნომრის ღია წერილი
“ოცნების” სიიდან “ამოვარდნილი” და განაწყენებული დეპუტატობის კანდიდატები გუბერნატორთან
