ოზურგეთის ბიუჯეტი, 2025 წლის განსაზღვრულ მაჩვენებელთან შედარებით 109,1%-ით გაიზარდა _ იგი 43 400,0 ათასი ლარის ნაცვლად, 90 766,5 ათასი ლარი იქნება _ ეს იყო მთავარი საკითხი ოზურგეთის მუნიციპალიტეტის საკრებულოს სხდომის დღის წესრიგში, რომელიც საკრებულოს წევრებს, 30 ივლისს, საკრებულოს მორიგ სხდომაზე, საკრებულოს თავმჯდომარემ, დავით დარჩიამ გააცნო.
“ოზურგეთის მუნიციპალიტეტის 2025 წლის ბიუჯეტის დამტკიცების შესახებ” _ ოზურგეთის მუნიციპალიტეტის საკრებულოს 2024 წლის 25 დეკემბრის N16 დადგენილებაში ცვლილების შეტანის თაობაზე,” _ საფინანსო-საბიუჯეტო სამსახურის უფროსმა პავლე ჭყონიამ ისაუბრა:
_ 2025 წლის დამტკიცებულ ბიუჯეტში შედის ცვლილება. სულ შემოსავლების და გადასახდელების ნაწილში ბიუჯეტი იზრდება 46 314 892,16 ლარით. მათ შორის, ოზურგეთის საბიუჯეტო სახსრების ნაშთმა, 2025 წლის 1 იანვრის მდგომარეობით 8 მილიონ 673 80 ლარი შეადგინა. ხოლო საკუთარი ნაშთი 4 მილიონ 503 063 ლარი იყო. მიზნობრივი ტრანსფერის ნაშთი კი, 58 816,07 ლარია, _ თქვა პავლე ჭყონიამ და დეტალურად, ჩამოთვალა ბიუჯეტის ზრდის ნაწილში, შემოსავლების კუთხით არსებული ფინანსები. მათ შორის, საქართველოს მთავრობის მიერ, სოფლის მხარდაჭერის პროგრამის და განსაკუთრებით, სტიქიით მიყენებული ზარალის სალიკვიდაციოდ, სხვადასხვა დროს, განკარგულებით განსაზღვრული და გადაცემული თანხების ჩამონათვალი.
პავლე ჭყონიამ, ასევე, ისაუბრა საქართველოს მთავრობის და საერთაშორისო ორგანიზაციებიდან შემოსული დახმარებების შესახებ. კერძოდ იმაზე, რომ საქართველოს მთავრობის განკარგულებით გამოყოფილი თანხები ჯამურად შეადგენს 37 მილიონ 165 ათას ლარს, ხოლო საერთაშორისო ორგანიზაციებისგან და სხვა დონორებისგან _ 161 ათას ლარზე მეტს. რაც შეეხება საკუთარი შემოსავლების პარამეტრების მხრივ, ეს 133 207 ლარს შეადგენს. შემოსავლების ნაწილში, ასევე, სხვა შემოსავლები (ჯარიმები, სანქციები, საურავები) გაიზარდა 1 მილიონ 5 00 000 ლარით.
შესაბამისად, მიზნობრივი ტრანსფერით ა(ა)იპ ოზურგეთის მუნიციპალიტეტის საზოგადოებრივი ჯანდაცვის ცენტრის სუბსიდია 26 706,82 ლარით გაიზარდა. მიზნობრივი ტრანსფერის ნაშთიდან კი გენდერულ საკითხთა, ძალადობის მსხვერპლის ან დაზარალებულის სტატუსის მქონე პირთა ერთჯერადი ფინანსური მხარდაჭერა, 18 წლამდე ასაკის ბავშვთა უფლებების დაცვისა და მხარდაჭერის პროგრამა კი 32 109,25 ლარით.
გზების მშენებლობა და რეაბილიტაცია 102 798,12 ლარით გაიზარდა.
აქვე აღვნიშნავთ, რომ გზების მშენებლობა-რეაბილიტაციის, ასევე, საზოგადოებრივ დანიშნულების შენობების რეაბილიტაციის ფინანსური ზრდა, საქართველოს მთავრობის მიერ, 2023-2024 წლებში არაერთხელ გამოცემული განკარგულებების მიხედვით გაიზარდა და არა მხოლოდ ერთხელ! განსაკუთრებით, ეს ეხება სოფლის მხარდამჭერ პროგრამას და სტიქიის შედეგების ლიკვიდაციას…
რაც შეეხება შემცირებას, ბიუჯეტი შემოსავლების და გადასახდელების ნაწილში 133 216,07 ლარით შემცირდა.
კერძოდ, ფინანსთა სამინისტროს და სსიპ “ლ. საყვარელიძის სახელობის დაავადებათა კონტროლისა და საზოგადოებრივი ჯანმრთელობის ეროვნული ცენტრის” მიერ მოწოდებული ინფორმაციის შესაბამისად, მიზნობრივი ტრანსფერი 133 216,07 ლარით შემცირდა.
მათ შორის: ა(ა)იპ ოზურგეთის მუნიციპალიტეტის ჯანდაცვის ცენტრის სუბსიდია 101 106,82 ლარით; გენდერულ საკითხთა , ძალადობის მსხვერპლთა და დაზარალებულის სტატუსის მქონე პირთა დახმარება 32109,25 ლარით: ოზურგეთის მერიის დაფინანსება 218236,57 ლარით; მუნიციპალური ინსპექციის სუბსიდია 100 000 ლარით. შესაბამისად გაიზარდა ა(ა)იპ სკოლამდელი აღზრდის ცენტრის სუბსიდია 318 236, 57 ლარით.
დადგენილების პროექტის არსი, როგორც განმარტებით ბარათშია ნათქვამი, მდგომარეობს ძირითად მაკროეკონომკურ მაჩვენებლებში. კერძოდ: ოზურგეთის ბიუჯეტის მაჩვენებლები დამოკიდებულია საქართველოში არსებულ მაკროეკონომიკურ მაჩვენებლებზე და საქართველოს კანონმდებლობით დადგენილ მაკროეკონომიკური პარამეტრების ზღვრების დასაცავად გასახორციელებელ ღონისძიებებსა და შეზღუდვებზე. საქართველოს ცენტრალური ხელისუფლების მიერ 2025-2028 წლების ძირითადი ეკონომიკური და ფინანსური ინდიკატორების საბაზო სცენარის მიხედვით, 2025 წლისთვის ნომინალური მშპ-ს ზრდის ტემპი განსაზღვრულია 8,4 პროცენტით. აღნიშნულიდან გამომდინარე, მუნიციპალიტეტის 2025 წლის ბიუჯეტის დამტკიცების შესახებ დადგენილების პროექტში, ხარჯების ეკონომიკური კლასიფიკაციის მუხლით განსაზღვრული ასიგნებების ზრდა, შეესაბამება საქართველოს ადგილობრივი თვითმმართველობის კოდექსის 155-ე მუხლის მე-2 პუნქტის მოთხოვნებს.
სხდომაზე, ასევე საფინანსო-საბიუჯეტო კომისიის თავმჯდომარემ გელა ჩავლეშვილმა ისაუბრა და თქვა, რომ მერიის მიერ წარმოდგენილი პროექტით, 2025 წლის დამტკიცებული ბიუჯეტი განსაზღვრულ მაჩვენებელთან შედარებით 109,1%-ით იზრდება. პროექტის თანახმად, ბიუჯეტი 47 366,5 ათასი ლარით იზრდება, რის შედეგადაც 90 766,5 ათასი ლარით განისაზღვრება.
საბოლოოდ, საკრებულოს სხდომაზე, რომელსაც საკრებულოს თავმჯდომარე დავით დარჩია უძღვებოდა, 2025 წლის ბიუჯეტში ცვლილება დაამტკიცეს.
მერიის მიერ წარმოდგენილი პროექტით, 2025 წლის დამტკიცებული ბიუჯეტი, განსაზღვრულ მაჩვენებელთან შედარებით 109,1%-ით გაიზარდა და 43 400,0 ათასი ლარის ნაცვლად, 90 766,5 ათასი ლარით განისაზღვრა.
პროექტის თანახმად, ბიუჯეტი 47 366,5 ათასი ლარით გაიზარდა, რაც პრიორიტეტებზე გადანაწილდა.
ასევე, ცვლილება შევიდა მუნიციპალიტეტის 2025 წლის ბიუჯეტით გათვალისწინებული ჯანმრთელობის დაცვისა და სოციალური დახმარების გაცემისა და მიღების წესის დამტკიცების შესახებ დადგენილების პროექტში.
საკრებულომ, ასევე, დაამტკიცა განკარგულების პროექტები, რომელთა თანახმად, მუნიციპალიტეტის ადმინისტრაციულ ტერიტორიაზე მდებარე უსახელო მწვერვალს საქართველოს ეროვნული გმირის _ ზაზა დამენიას სახელი მიენიჭება, ხოლო სოფელ მერიაში მდებარე #2 ქუჩა “ასი ათასი მოწამის” სახელობის გახდება.
ავტორი
