“სირცხვილია, ასეთი მდგომარეობა იყოს სოფლის ცენტრში”

სოფლის ცენტრში არსებული პრობლემის მოგვარებას სოფელ ქვიანის მოსახლეობა უკვე კარგა ხანია ელოდება, თუმცა, ჯერჯერობით უშედეგოდ.

საქმე ისაა, რომ ლანჩხუთის მუნიციპალიტეტის სოფელ ქვიანის ცენტრში მდებარე წყაროდან გამომავალი წყალი, თავის დროზე, საკმაოდ დიდი დიამეტრის მქონე მილით ახლოს მდებარე ღელეში ჩაედინებოდა, თუმცა, კარგა ხანია, ეს მილი მწყობრიდანაა გამოსული, წყალს აღარ ატარებს, რის გამოც სოფლის ცენტრი, ზაფხულის ცხელ დღეებშიც კი, ატალახებული და დაჭაობებულია.

ამ თემაზე, ადგილობრივთა თხოვნით, წერდა კიდეც “გურია ნიუსი” რამდენიმე თვის წინ. მაშინ საკითხთან დაკავშირებით მერის წარმომადგენელს გიგა დოლიძეს გავესაუბრეთ, რომელიც გვიდასტურებდა, რომ პრობლემა მართლაც დროულ მოგვარებას საჭიროებს.

“უკვე მიდის პროექტზე მუშაობა, რომ კაპიტალურად გაკეთდეს ყველაფერი და წყაროდან გამოსული ნარეცხი წყალი ღელეში ჩავიდეს. აქ მილი იყო, რომელიც პერიოდულად იჭედებოდა და მე, პირადად, არაერთხელ მომიხდა მისი გაწმენდა, თუმცა, ბოლოს ისეთი მდგომარეობა შეიქმნა, რომ შეუძლებელი გახდა მისი გაწმენდა. ამიტომ მიდის ახლა პროექტზე მუშაობა, რამდენიმე თვე დააგვიანდა სამუშაოების დაწყებას“, _ გვითხრა თვეების წინ სოფელში მერის წარმომადგენელმა.

პრობლემის მოგვარების აუცილებლობაზე საუბრობდა ქვიანის მკვიდრი, საკრებულოს ოპოზიციონერი დეპუტატი გოჩა ჯანაშიაც _ მისი თქმით, “აუცილებლობას წარმოადგენს ახალი, ღია კაპიტალური საწრეტი არხის მშენებლობა, რომელიც წყაროდან წამოსულ წყალს იქვე არსებულ სოფლის ღელეში ჩაიტანს“.

იყო დრო, სანამ ავტობანის ჯაპანა-ლანჩხუთის მონაკვეთი გაიხსნებოდა, სოფელ ქვიანის ცენტრს დიდი დატვირთვა გააჩნდა. აქ მდებარე წყაროს წყალი გამვლელ-გამომვლელთა ყურადღებას იქცევდა, საკმაოდ ბევრი ადამიანი ჩერდებოდა წყლის დასალევად და არსებულ ბაზარზე გამოტანილი ხილის დასაგემოვნებლად. თუმცა, ეს ბოლო წლებია, სოფლის ცენტრი უყურადღებოდ აღმოჩნდა _ წყაროდან გამომავალი წყლის გამტარი დიდი მილიც მწყობრიდან ხშირად გამოდის და იქვე მდებარე ამბულატორიის შესასვლელს აჭაობებს.

ფაქტია, რომ მისი გაწმენდა უკვე შეუძლებელია და აუცილებლობას წარმოადგენს ახალი, ღია კაპიტალური საწრეტი არხის მშენებლობა, რომელიც წყაროდან წამოსულ წყალს სოფლის ღელეში ჩაიტანს. საუბარია, დაახლოებით, 50 მეტრის არხზე, რომლის გარეშე პრობლემა ვერ გადაწყდება. ისტორიული წყაროს მიმდებარე ტერიტორიის კეთილმოწყობით, სოფლის ცენტრსაც მიეხედება და ანტისანიტარიის კერაც აღმოიფხვრება”.

როგორც ფაქტები აჩვენებს, ქვიანის ცენტრი ამ დრომდე მიუხედავია და ანტისანიტარიის კერა ისევ აღმოუფხვრელია. აქაურთა თქმით, მეორე ასეთი მოუწესრიგებელი და დაბინძურებული სოფლის ცენტრი ნაკლებად თუ იქნება სადმე.

“ახლა ხომ პაპანაქება ზაფხულია, სიცხისგან ალმური ასდის ყველაფერს, გამომშრალი და გახრიოკებულია მიწა, მაგრამ, მიუხედავად ამისა, ქვიანის ცენტრში მაინც ტალახი და “ლოფოა.” რომ გაწვიმდება მაშინ ხომ მთლად ჭაობადაა აქაურობა ქცეული, ვერც წყაროსთან მიხვალ და ვერც საექიმო უბნის ეზოში შეხვალ, რადგან ტალახი და წყალია ყველგან. ადრე წყაროდან გამოსული წყალი მილით ღელეში ჩადიოდა, ახლა კი დაძველდა და მწყობრიდან გამოვიდა, რის გამოც უკვე კარგა ხანია, წყალი პირდაპირ ქუჩაში იღვრება. ჰოდა, ვითხოვთ, ვისაც ევალება, მიაქციონ ყურადღება ამ საკითხს და მოაგვარონ ეს პრობლემა. სირცხვილია, ასეთი მდგომარეობა იყოს სოფლის ცენტრში“, _ ამბობენ ადგილობრივები.

“გურია ნიუსი” ამჯერადაც შეეცადა ადგილობრივი ხელისუფლებისგან მიეღო ინფორმაცია თემასთან დაკავშირებით _ მერის წარმომადგენლისგან მიღებული ინფორმაციით, პროექტი უკვე მზადაა, თუმცა, სამუშაოების დასაწყებად ტენდერი, ჯერჯერობით, არ გამოცხადებულა.