დღეს ოზურგეთის მუნიციპალიტეტის საკრებულომ მოისმინა და ცნობად მიიღო ინფორმაცია მუნიციპალიტეტის მერის უფლებამოსილების შეწყვეტის, მერის მოვალეობის შემსრულებლად გია ანთაძის დანიშვნისა და საკრებულოს წევრის, ტატა ბარამიძის უფლებამოსილების ვადამდე შეწყვეტის შესახებ.
აღნიშნულ საკითხებზე საკრებულოს სხდომაზე საკრებულოს წევრმა, მარი ჩხიკვიშვილმა ისაუბრა.
„წარმოგიდგენთ დღის წესრიგით გათვალისწინებულ პირველ საკითხს, რომელიც ეხება ოზურგეთის მუნიციპალიტეტის მერის უფლებამოსილების შეწყვეტას, ოზურგეთის მუნიციპალიტეტის საკრებულოს მიერ ცნობად მიღების თაობაზე. როგორც მოგეხსენებათ, ბატონმა პაატა კუნჭულიამ პირადი განცხადების საფუძველზე მომართა საკრებულოს თავმჯდომარეს უფლებამოსილების ვადამდე შეწყვეტის შესახებ. ახლა წარმოგიდგენთ საკითხს ცნობად მიღების თაობაზე“, — განაცხადა მარი ჩხიკვიშვილმა.
მან დააზუსტა, რომ სამანდატო, საპროცედურო, იურიდიულ საკითხთა და ეთიკის კომისიამ იხელმძღვანელა ადგილობრივი თვითმმართველობის კოდექსის 56-ე მუხლით და შესაბამისი დასკვნა წარადგინა. პაატა კუნჭულიამ საკრებულოს თავმჯდომარეს გადადგომის შესახებ წერილობით 2026 წლის 14 აგვისტოს მიმართა. ჩხიკვიშვილმა ყოფილ მერს მომავალ საქმიანობაში წარმატებები უსურვა.
მარი ჩხიკვიშვილმა ასევე ისაუბრა მერის მოვალეობის შემსრულებლად გია ანთაძის დანიშვნის საკითხზეც:
„ბატონი გია ანთაძე არის კარგი ოზურგეთელი, წარმატებული ადამიანი. მისი გამოცდილება, განათლება და კვალიფიკაცია, დარწმუნებული ვარ, სასიკეთოდ წაადგება ჩვენს ოზურგეთს. წარმატებებს ვუსურვებ ბატონ პაატა კუნჭულიას მის საქმიანობაში, რომელიც ეხება სამეცნიერო სფეროს, და დარწმუნებული ვარ, რომ ბატონი გია ანთაძე კარგად გააგრძელებს მუშაობას. აღნიშნული საკითხი უნდა მივიღოთ ცნობად“, — აღნიშნა ჩხიკვიშვილმა.
საკრებულოს წევრებმა მერის მოვალეობის შემსრულებლის დანიშვნას მხარი ხელის აწევით დაუჭირეს.
მესამე საკითხთან დაკავშირებით ჩხიკვიშვილმა აღნიშნა, რომ უფლებამოსილება შეუწყდა საკრებულოს წევრს, ტატა ბარამიძეს, რომელსაც სხდომაზე წარმატებული კარიერა უსურვეს.
მიმდინარე საკადრო ცვლილებებს ოზურგეთის მუნიციპალიტეტის საკრებულოს თავმჯდომარე, დავით დარჩიაც გამოეხმაურა:
„ჩვენ ყველამ ვიცით, რომ ეს გადაწყვეტილება თავად მიიღო პაატა კუნჭულიამ და ეს მისი ნებაა. წარმატებები ვუსურვოთ პაატა კუნჭულიას იქ, სადაც გააგრძელებს კარიერას. კოლეგებო, ასევე ჩვენ ყველა ვიცნობთ გია ანთაძეს. ის ერთ-ერთი საუკეთესო კადრია და ნამდვილად მინდა ვუსურვო წარმატება. მჯერა, იქნება კიდეც ერთ-ერთი საუკეთესო მერი. ის სირთულეები, რაც არის ახლა, დარწმუნებული ვარ, გამოსწორდება და აღმასრულებელი ხელისუფლება გვეყოლება კარგი“, — განაცხადა დავით დარჩიამ.
ავტორი
