29 წლის ნათია “გურია ნიუსის” ჟურნალისტია. მან ახალი საქმიანობა, რომელიც მისთვის ახლა უკვე შემოსავლის წყაროა, კორონავირუსით ინფიცირების დროს დაიწყო.
_ “ჩანთების შექმნა მაშინ დავიწყე როცა მთელს ოჯახს კოვიდის გვქონდა. გარკვეული პერიოდი იზოლაციაში ვიყავი და მაშინ გაჩნდა იდეა! 2-ჯერ გავიკეთე PCR ტესტი, თუმცა ორივე შემთხვევაში პასუხი უარყოფითი იყო. სამი დღის განმავლობაში მქონდა მაღალი სიცხეები, ყელი მტკიოდა, მაგრამ ფსიქოლოგიურად ბევრად უფრო ცუდად ვიყავი ვიდრე ფიზიკურად.
ჩაკეტილობისგან იმდენად ცუდათ ვიყავი, რომ მაშინ გადავწყვიტე, მომეძებნა რამე ალტერნატივა და ხელში ავიღე ყაისნაღი. მქონდა მოქსოვილი ჩანთა, რომელსაც ვერ ვიყენებდი და გადავწყვიტე გამეკეთებინა ტილოს ჩანთის ალტერნატივა, ოღონდ უფრო ტევადი და ზამთრის ამინდებზე მორგებული. და აი ასე შევქმენი პირველი ჩანთა. მასალების შეძენაში მეგობარი დამეხმარა და აქედან დაიწყო ყველაფერი. მოვქსოვე რამდენიმე ჩანთა და თმის სამაგრი. ამის შემდეგ გაჩნდა იდეა, რომ ეს ჩანთები ონლაინ ბაზარზე გამეტანა.
ახლა რა ეტაპზე ხართ?
_ ონლაინ გაყიდვების გვერდი “მაისუმ”, რომელიც აწარმოებს ხელნაკეთ აქსესუარებს
და სამოსს, შემომთავაზა თანამშრომლობა. ჩემმა ჩანთებმა პირველად მზის შუქი სწორედ “მაისუს” გვერდზე ნახა. ამ ყველაფერს დაემატა ჩანთები ქართული ელემენტებით და შეიქმნა ჩვენი ოფიციალური ფეისბუქ გვერდი ,,სკანო”. ახალ წამოწყებაში დედაც ჩავრთე და ახლა ერთად ვქმნით ახალ სილამაზეებს.
_ რატომ “სკანო“?
_ თემატურად ჩემთან ძალიან ახლოსაა. სკანო მეგრულია სიტყვა და ნიშნავს “შენთვის!”
ნათია იხსენებს თუ რამდენად დადებითი შეფასება მოჰყვა მის შექმნილ ჩანთებს მეგობრებისა და გარშემომყოფებისაგან. მისი თქმით, სწორედ ამგვარმა შეფასებებმა დაარწმუნა, რომ ეს არის საქმე, რომელიც უნდა აკეთოს და რომლის კეთებაც სიამოვნებას ანიჭებს.
_ ქსოვა პროფესიონალურად გაქვთ შესწავლილი?
_ თამამად შემიძლია ვთქვა, რომ ის, რასაც ახლა ვაკეთებ, არც პროფესიონალურ დონეზე და არც ვიდეო რგოლებში არ მისწავლია. ჩხირებით ქსოვა დედამ მასწავლა, მაგრამ ყაისნაღით ქსოვა არსად არ მისწავლია.
_ რას იტყვით ამ ჩანთების დიზაინზე? რა არის თქვენი ინსპირაცია?
_ თითოეული ჩანთის დიზაინი ჩემი მოფიქრებულია, რითაც ძალიან ვამაყობ. როგორც კი ძაფს დავინახავ, უკვე ვიცი, როგორი ჩანთა უნდა მოვქსოვო. როცა ვიღებ ყაისნაღს, ძაფს და ვიწყებ ქსოვას, ზუსტად ვიცი, როგორი იქნება საბოლოოდ. საერთოდ, ბოლო დროს დარწმუნებული ვარ, რომ თუ რამე მოვინდომე, ზუსტად ისე გამომივა, როგორც ჩავიფიქრებ.
_ სამომავლოდ რას აპირებთ?
_ ძალიან მინდა, საახალწლოდ გამოფენაში მივიღო მონაწილეობა. გამოფენაზე არ იქნება მხოლოდ ჩანთები. იქნება ასევე ქუდები, კაშნეები, ხელნაკეთი თმისსამაგრები და წელის ჩანთები.
ნათია აპირებს, სამომავლოდ პროფესიულ დონეზე დაეუფლოს ამ საქმეს.
„გურია ნიუსი“ წარმატებას უსურვებს ნათიას თავის ახალ ნაბიჯებში.
[sexy_author_bio]
