საქართველოს სახალხო დამცველის პრევენციის ეროვნული მექანიზმის წლიური ანგარიშის თანახმად, 2016 წელს, პენიტენციურ დაწესებულებეში პატიმართა სხეულის დაზიანების 3853 შემთხვევა გამოვლინდა, აქედან თვითდაზიანების 1892, სხვა პირის მიერ დაზიანების – 189, საყოფაცხოვრებო დაზიანების – 1482, ხოლო დაუზუსტებელი დაზიანების 293 შემთხვევაა გამოვლენილი (იხ. ცხრილი ქვემოთ).
როგორც ანგარიშიდან ირკვევა, ეს მაჩვენებლები მკვეთრად არ განსხვავდება წინა წლის მაჩვენებლისგან. ამავე ანგარიშის თანახმად, 2015 წელს სულ გამოვლინდა 3892 შემთხვევა, აქედან, თვითდაზიანების 2120, სხვა პირის მიერ დაზიანების -198; საყოფაცხოვრებო დაზიანების -1490, ხოლო დაუზუსტებელი დაზიანების 84 შემთხვევა იყო გამოვლენილი.
„აღსანიშნავია, რომ N8 და N15 პენიტენციურ დაწესებულებებში შემცირებულია პატიმრების სხეულის დაზიანების შემთხვევები, რაც დადებითად უნდა შეფასდეს, თუმცა საგულისხმოა, რომ N2 დაწესებულებაში დაზიანებების რაოდენობა გაზრდილია, მათ შორის, სხვა პირის მიერ მიყენებული დაზიანებების რაოდენობა. ასევე, აღსანიშნავია, რომ N6 პენიტენციურ დაწესებულებაში, 2016 წელს, 246 შემთხვევაში ვერ მოხერხდა დაზიანების წარმომავლობის დადგენა, 2015 წელს ასეთი ფაქტი არ დაფიქსირებულა. მსგავსი ტენდენცია შეინიშნება N18 ბრალდებულთა და მსჯავრდებულთა სამკურნალო დაწესებულებაშიც (28 შემთხვევა).
ისევე, როგორც გასულ წლებში, პენიტენციურ დაწესებულებებში, პატიმრების სხეულზე არსებული დაზიანებების დოკუმენტირება პრობლემას წარმოადგენდა 2016 წელსაც. საქართველოს სახალხო დამცველმა არაერთხელ მიმართა რეკომენდაციით საქართველოს სასჯელაღსრულებისა და პრობაციის მინისტს, „სტამბოლის პროტოკოლის“ შესაბამისად შემუშავებულიყო და დანერგილიყო დაზიანებების აღრიცხვის ახალი ფორმა, რომელშიც შესაძლებელი გახდებოდა სხეულის დაზიანების შესახებ უფრო დეტალური ინფორმაციის შეტანა“, _ ვკითხულობთ ანგარიშში.
გარდა ზემოაღნიშნულისა, სახალხო დამცველი წერს, რომ 2016 წელს კვლავ პრობლემად რჩება ექიმის დამოუკიდებლობასა და კომპეტენციასთან დაკავშირებული პრობლემები. სპეციალური პრევენციული ჯგუფის მიერ ჩატარებული მონიტორინგების შედეგების მიხედვით შეინიშნება სამედიცინო პერსონალის გარკვეული დამოკიდებულება დაწესებულების ადმინისტრაციის მიმართ, რაც ეჭვქვეშ აყენებს პატიმრების მიმართ სავარაუდო არასათანადო მოპყრობის შემთხვევაში, ექიმის მიერ დაზიანებების დოკუმენტირებისა და საგამოძიებო ორგანოსთვის შეტყობინების დროს, მის მიუკერძოებლობას.
სახალხო დამცველს მიაჩნია, რომ საქართველოს სასჯელაღსრულებისა და პრობაციის სამინისტრომ უნდა გადადგას შესაბამისი ნაბიჯები, რათა უზრუნველყოს ექიმების სათანადო დამოუკიდებლობა. ექიმის პროფესიული დამოუკიდებლობის კონტექსტში მნიშვნელოვანია პენიტენციური ჯანდაცვის სამოქალაქო ჯანდაცვის სექტორში ინტეგრაცია.
ცნობისთვის, დღეს, საქართველოს სახალხო დამცველმა საქართველოს მთავრობის, არასამთავრობო და საერთაშორისო ორგანიზაციების, ასევე უცხო ქვეყნების დიპლომატიური კორპუსის წარმომადგენლებს პრევენციის ეროვნული მექანიზმის წლიური ანგარიში წარუდგინა. ღონისძიება წამების მსხვერპლთა მხარდაჭერის საერთაშორისო დღესთან დაკავშირებით გაიმართა, რომელიც მსოფლიოს მასშტაბით ყოველი წლის 26 ივნისს აღინიშნება.
ამავე თემაზე:
პატიმართა გაშიშვლების შემთხვევები ციხეებში
ხელბორკილის გამოყენების შემთხვევები ციხეებში
