2020-2025 წლების ახალი სტრატეგია „საყოველთაო ინტერნეტიზაციის შესახებ, 2020 წელს დამტკიცდა საქართველოს პარლამენტის მიერ, რასაც დაემატა მსოფლიო ბანკის 40 მილიონ დოლარად შემუშავებული პროექტი, რომელიც 2025 წელს უნდა დასრულებულიყო.
„გურია ნიუსი“ 2020 წელს, ივნისში, ოზურგეთის კულტურის და დასვენების პარკში, მიწვეული იყო და დაესწრო საზოგადოებისთვის „პარვუს ჯგუფის “ მიერ პროექტის წარდგენას, რომელსაც ყველა სოფლის ცენტრამდე უნდა უზრუნველეყო ფართოზოლოვანი ბოჭკოვანი კაბელის მიყვანა და ინფრასტრუქტურული მოწყობა.
„ინფორმაციის ეპოქაში, ადამიანი უძლურია სწრაფი ინტერნეტის გარეშე! გპირდებით, მალე აქ, ნებისმიერ ადამიანს ექნება უსწრაფესი ინტერნეტით სარგებლობის უფლება და საშუალება. ისე, რომ მსოფლიოს ყველა წერტილს სწრაფად და უპრობლემოდ მიწვდეთ“, _ განაცხადეს მაშინ პროექტის წარმდგენმა პირებმა.
მაშინ ფირმა „პარვუს ნეტის“ ხელმძღვანელმა ზურაბ ბესელიამ განაცხადა, რომ პროექტის ფარგლებში , გურიის სოფლების ყველა ცენტრში, სკოლებთან მიიყვანდნენ ბოჭკოვან კაბელს, შემდეგ კი კერძო სატელეკომუნიკაციო ოპერატორების მხრიდან , “Open Net”- ის ქსელის გამოყენებით მოსახლეობა ქსელში ჩაერთვებოდა.
„ფრენია ინტერნეტი გვექნება“ – ხუმრობდნენ მაშინ გურულები.
პარვუ ჯგუფმა პროექტი დროულად და დათქმისამებრ დაასრულა- ყველა სოფლის ცენტრამდე მოეწყო ინფრასტრუქტურა. თუმცა მოსახლეობა დიდხანს ბუზღუნებდა, ეს ყუთები რომ დაგვიდგეს სოფლების ცენტრებში, რა და როდის “გამოფრინდება” მაქედანო?
„გურია ნიუსი“ ამის შესახებ არაერთხელ წერდა.
ახლახან ცნობილი გახდა, რომ კერძო სატელეკომუნიკაციო კომპანია „ეარნეტი“ ახდენს სოფლების დაქსელვას.
როგორც ცნობილია, დიდხანს ვერ შეთანხმდნენ „ენერგო-პრო ჯორჯია“ და კომპანია „ეარნეტი“, რომ ხაზების განლაგება ელექტრობოძებზე მომხდარიყო.
„გურია ნიუსი“ დაუკავშირდა ინტერნეტ პროვაიდერ კომპანიას, „ეარნეტს“ და თხოვა, დეტალური ინფორმაცია მოეწოდებინა მიმდინარე სამუშაოების შესახებ.
_ მთლად კარგ პირობებში ვერ ვართ, თუმცა შეთანხმება შედგა „ენერგო-პრო“-სა და „ეარნეტს“ შორის. ახლა რამდენიმე სოფელში უკვე დასრულებულია სამუშაოები. დარჩა მხოლოდ პერიფერიული ნაწილი, რაც ჩიხებში ხაზის შეყვანას გულისხმობს. წლის ბოლომდე, ვფიქრობთ, ყველა სოფელში დასრულდება ეს პროცესი და მოსახლეობა საუკეთესო ოპტიკური ინტერნეტით ისარგებლებს, _ გვითხრა „ეარნეტის“ დირექტომა შოთა მიქაძემ.
სულ მალე აღნიშნული მაღალი სტანდარტის ინტერნეტ-ქსელში ჩაერთვება „პირველი მერცხლები“, _ სოფლები: ჭანიეთი, ბაილეთი და ძიმითი.
„გურია ნიუსი“ ვრცლად ამის შესახებ, მალე გიამბობთ.
