“ოზურგეთი ფოლკლორის ქალაქია და ხელისუფლება ფოლკლორის სფეროს მოღვაწეებს ყოველთვის დააფასებს. ამის ერთ-ერთი დასტურია ის ფაქტიც, რომ ქალაქის მერიამ ფოლკლორის ცენტრს უსასყიდლოდ გადასცა შენობა ქალაქის ცენტრში და 37 000 ლარითაც დაეხმარა. ასე გაგრძელდება მომავალშიც” _ ეს განცხადება ქალაქ ოზურგეთის მერმა ბეგლარ სიორიძემ 2015 წელს გააკეთა.
ბეგლარ სიორიძე, რომელიც დღეს “ქართული ოცნების” ოზურგეთის მერობის კანდიდატია, არაერთ ინტერვიუში აღნიშნავდა, რომ ოზურგეთი ყველაზე მეტად იყო ამ წოდების ღირსი და მისი ხელისუფლებაში ყოფნის დროს ამ მიმართულებით ბევრი რამ გაკეთდებოდა.
ასეც მოხდა _ რამდენიმე თვეში ქალაქ ოზურგეთში ფოლკლორის ცენტრის სარეაბილიტაციო სამუშაოები დასრულდება და ასეთ სახეს მიიღებს.
ოზურგეთის ცენტრის მეშვეობით, საქართველოს ფოლკლორის სახელმწიფო ცენტრი საკუთარ საქმიანობას მთელ დასავლეთ საქართველოში წარმართავს. ოზურგეთის ფოლკლორის ცენტრის ადმინისტრაციული შენობა, რომელიც ჭანტურიას ქუჩის პირველ ნომერში მდებარეობს, საგამოფენო სივრცეს, ხმის ჩამწერ სტუდიას, 300 ადამიანზე გათვლილ თანამედროვე სტანდარტების საკონცერტო დარბაზს, არქივსა და სხვადასხვა ტიპის საზოგადოებრივ სივრცეს აერთიანებს.
ოზურგეთის ფოლკლორის ცენტრის საგამოფენო სივრცეში პერიოდულად თავს მოიყრის უნიკალური ტრადიციული ხელოვნების საგამოფენო ნიმუშები. ხმის ჩამწერ სტუდიაში მთელ დასავლეთ საქართველოში არსებულ შემოქმედებით ჯგუფებს, ანსამბლებს, საოჯახო თუ ინდივიდუალურ შემსრულებლებს საკუთარი შემოქმედების ჩაწერა და დაფიქსირება შეეძლებათ.
ოზურგეთის ფოლკლორის ცენტრის საკონცერტო დარბაზში კონცერტები და მუსიკალური საღამოები გაიმართება, რაც ქალაქში შემოქმედებით აქტივობას მნიშვნელოვნად გაზრდის და საზოგადოებრივ-კულტურული ცხოვრების დონის ამაღლებას შეუწყობს ხელს.
ოზურგეთის ფოლკლორის ცენტრს სხვა ფუნქციებთან ერთად, რეგიონში სამეცნიერო შემოქმედებითი მუშაობის ფუნქციაც ექნება _ აქ სხვადასხვა ექსპედიციები, კვლევები და მნიშვნელოვანი სამუშაოები ჩატარდება.
ცენტრის რეაბილიტაცია საქართველოს მუნიციპალური განვითარების ფონდის დაფინანსებით მიმდინარეობს. პროექტის ჯამური ღირებულება 1 490 898 ლარია.
შენობის რეაბილიტაცია გასული წლის ბოლოდან დაიწყო და მიმდინარე წლის ბოლოს დასრულდება. პროექტით გათვალისწინებულია შიდა ინტერიერისა და გარე ფასადის სრულად რეაბილიტაცია. შენობა ადაპტირებული იქნება შეზღუდული შესაძლებლობების მქონე პირთათვის.
ხაზგასასმელია ისიც, რომ მალე დაიწყება ისტორიული მუზეუმის რეაბილიტაციაც:
_ ეს საკითხი წლების მანძილზე გადაუჭრელ პრობლემას წარმოადგენდა და ახლა, რეგიონული განვითარებისა და ინფრასტრუქტურის სამინისტროს ხელშეწყობით, პრობლემა საბოლოოდ გადაიჭრება. აღნიშნული პროექტების გახორციელება, ჩვენს ქალაქში, მნიშვნელოვნად გაზრდის ტურისტულ პოტენციალს და ქალაქს უფრო მიმზიდველს გახდის. პირადად ჩემთვის მინისტრის ეს გადაწყვეტილება ორმაგად სასიხარულოა, რადგან ისტორიული მუზეუმი, ჩვენი წარსულის უმნიშვნელოვანესი საგანძურის მცველია”, _ განაცხადა ბეგლარ სიორიძემ, როცა მუზეუმის და ფოლკლორის ცენტრის შენობა რეგიონული განვითარებისა და ინფრასტრუქტურის მინისტრ ზურაბ ალავიძესთან ერთად მოინახულა.
აღსანიშნავია კიდევ ერთი ფაქტი: 2016 წელს “გოსფილმოფონდი”-სა და საქართველოს კინოცენტრს შორის გაფორმდა ხელშეკრულება, რომლის თანახმადაც, საბჭოთა პერიოდში (1921-91 წლები) შექმნილი ქართული ფილმების საწყისი მასალების მომზადება და საქართველოსთვის მათი ეტაპობრივად გადმოცემა უნდა გახორციელდეს. პირველი ეტაპის ს შემდეგ, როდესაც სამშობლოში 4 ქართული ფილმი ჩამოვიდა, პროექტის პრეზენტაციაზე საქართველოში ვიზიტით ფილმსაცავის გენერალური დირექტორი ნიკოლაი ბოროდაჩევი იმყოფებოდა, რომელმაც გამოთქვა სურვილი “გოსფილმოფონდს” თავისი რესურსით აღედგინა რომელიმე რეგიონული კინოთეატრი. არჩევანი ოზურგეთის კინოთეატრზე გაკეთდა, რაშიც დიდი წვლილი სწორედ ბეგლარ სიორიძეს მიუძღვის, რადგან ქალაქის პირველ პირს კულტურის სამინისტროში ეს საკითხი არაერთხელ ჰქონდა დასმული.
ბოროდაჩევის ვიზიტიდან ერთი წლის შემდეგ, 2017 წლის აპრილში ოზურგეთში “გოსფილმოფონდის” წარმომადგენლობის დელეგაცია ჩამოვიდა და ბეგლარ სიორიძეს შეხვდა.
ვიზიტის მიზანს ქალაქ ოზურგეთში კინოთეატრში ჩასატარებელი სარეაბილიტაციო სამუშაოების მოცულობის განსაზღვრა წარმოადგენდა.
სამუშაოების მოცულობა კი საკმაოდ დიდია და ოზურგეთის კინოთეატრის რეაბილიტაციისთვის 3 მილიონი ლარი დაიხარჯება:
_ პროექტი უკვე დასრულების სტადიაში და პრეზენტაცია მალე მოეწყობა. ძალიან მახარებს ის ფაქტი, რომ ოზურგეთს თანამედროვე სტანდარტების შესაბამისი კინოთეატრი ექნება. წარმოდგენილი იქნება არა ერთი, არამედ სამი კინოდარბაზი, ასევე, სივრცე პატარებისათვის მულტიპლიკაციური ფილმების სანახავად. 2014 წელს, ჩემი წინასაარჩევნო კამპანიის დროს, ახალგაზრდების ერთ-ერთი ძირითადი სურვილი კინოთეატრის აღდგენა გახლდათ. გამომდინარე აქედან, განსაკუთრებით მეამაყება, რომ მათი ეს სურვილი მალე რეალობად იქცევა.
ასევე ხაზგასასმელია სახელმწიფო თეატრის რეაბილიტაცია, რომელსაც “ქართუ ფონდი” ახორციელებს.
მოკლედ რომ ვთქვა _ ფოლკლორის ცენტრის, მუზეუმის, კინოთეატრის, სახელმწიფო თეატრის რეაბილიტაციის პროექტებით ჩვენ, ფაქტობრივად, ისტორიულ პროცესს ვახორციელებთ. აქვე იმასაც გეტყვით, ჩემი მერად არჩევის შემდეგ, დიდ ყურადღებას მივაქცევთ სოფლებში არსებული კულტურის სახლების რეაბილიტაციას, რომლის პროცესი უკვე დაწყებულია. რამდენიმე სოფელში უკვე აღდგა საზოგადოების სრულფასოვანი ცხოვრებისთვის მნიშვნელოვანი კერა და ასე გაგრძელდება მომავალშიც, _ ამბობს “ქართული ოცნების” ოზურგეთის მერობის კანდიდატი ბეგლარ სიორიძე.
(R)
