პრობლემის თაობაზე, რომელიც ლანჩხუთში ჟორდანიას #114-ში მდებარე მრავალბინიანი საცხოვრებელი სახლის მობინადრეებს აწუხებთ, “გურია ნიუსი” უკვე არაერთხელ წერდა, თუმცა, სამწუხაროდ, საკითხი მაინც მოუგვარებელი რჩება და აქ მცხოვრებთა სიცოცხლეს საფრთხე ისევ ექმნება.
მოქალაქეთა მომართვის საფუძველზე საკითხით ჯერ კიდევ 2021 წლის ნოემბერში დავინტერესდით, რის შემდეგაც ადგილზე ქალაქის ადმინისტრაციულ ერთეულში მერის წარმომადგენლის თანაშემწეც მოვიდა, შექმნილი ვითარება საკუთარი თვალით იხილა და შესაბამისი რეაგირების პირობაც მოგვცა.
რამდენიმე თვის შემდეგ, ადგილზე მუნიციპალიტეტის პირველი პირი ალექსანდრე სარიშვილიც იმყოფებოდა მერიის შესაბამისი სამსახურების წარმომადგენლებთან ერთად ნახა, თუ რა სავალალო მდგომარეობაშია აღნიშნული მრავალბინიანი საცხოვრებელი სახლი. მერმა მაშინ იქვე მისცა მითითება ინფრასტრუქტურის სამსახურის წარმომადგენელს, რომ საკითხი შეესწავლა და შესაბამისი პროექტიც მოემზადებინა. თუმცა, ხანი გავიდა და ჟორდანიას 114-ში სასიკეთოდ არაფერი შეცვლილა და ადგილობრივ მოსახლეობასა და “გურია ნიუსს” 2022 წლის სექტემბერშიც მოუხდათ ადგილობრივი ხელისუფლებისთვის შეხსენება, რომ ამ სახლის საყრდენი ბოძები ავარიულ მდგომარეობაშია და დროულ მიხედვას საჭიროებს, რაზეც მერიისგან პასუხად მივიღეთ, რომ პრობლემის მოგვარების მიზნით, უახლოეს პერიოდში გახორციელდებოდა სათანადო სამუშაოები.
“პრობლემის თაობაზე კარგად ვართ ინფორმირებულები, უკვე გამოცხადდა ტენდერი და სარეაბილიტაციო სამუშაოებიც მალე დაიწყება”, _ გვითხრა მერიის პიარმა მაკა სულაბერიძემ გასული წლის სექტემბერში ჩვენი კითხვის პასუხად. თუმცა, ფაქტად რჩება, რომ ამ დრომდე საქმე წინ არ წასულა. არადა, როგორც აქაურები ამბობენ, საქმე არ ითმენს და შენობის უკანა ფასადის ჩამონგრევის საფრთხე რეალურია. საგულისხმოა, რომ რამდენიმე დღის წინ შენობიდან ჩამოვარდნილი ბათქაში თავში დაეცა მოქალაქეს, რომელიც გარეთ, სადარბაზოსთან იმყოფებოდა.
საგულისხმოა, რომ ჟორდანიას 114-ში მდებარე მრავალბინიანი საცხოვრებელი სახლი ერთ-ერთია, რომლის იერსახეც, სახელმწიფო პროგრამის “განახლებული რეგიონები” ფარგლებში, 2021 წელს ცენტრალური ქუჩის მხრიდან გაალამაზეს და მოაწესრიგეს, სამწუხაროდ, მაშინ არავინ დაინტერესებულა შიდა ეზოს მხრიდან კორპუსის მდგომარეობით. არადა, სამსართულიანი სახლის საყრდენი ბოძები დაზიანებულია, კოსმეტიკური სილამაზის უკან პრობლემები მძლავრობს და დროულ მიხედვას საჭიროებს.
“კარგია გარე ფასადი, ტროტუარები, მოწესრიგებულ-გალამაზებული სკვერი, ცივილური სახე მიიღო ყველაფერმა, მაგრამ რად გინდა ეს ყველაფერი, თუ სახლის ერთი ნაწილი ჩამოგვენგრა?! ფაქტია, რომ ბოძები ავარიულ მდგომარეობაშია და მიხედვას საჭიროებს, თორემ ერთ დღეს არაა გამორიცხული გალამაზებული ფასადის ფონზე ეს სახლი შიდა ეზოს მხრიდან ჩამოინგრეს და ბათუმში მომხდარი ტრაგედიის მსგავსი დატრიალდეს”, _ ამბობდნენ “გურია ნიუსთან” საუბარში ჯერ კიდევ 2021 წელს ამ მრავალბინიანი სახლის ის მობინადრეები, რომელთაც დახმარების თხოვნით მოგვმართეს.
ეს ადამიანები ახლაც იმავეს იმეორებენ და მუნიციპალიტეტის ხელმძღვანელობას კიდევ ერთხელ შეახსენებენ, რომ პრობლემა დროულ მიხედვას საჭიროებს.
მათი თქმით, არავინ იცის, როდის გამოინგრევა კორპუსის საყრდენი ბოძები.
“შესწავლა და შემოწმება კი არა, ერთი თვალის შევლებითაც კარგად ჩანს, რა მდგომარეობაცაა. გაზეთშიც დავწერეთ, მერიაშიც ბევრჯერ ვიყავით, რამდენჯერმე მოვიდნენ, ნახეს, არის დაპირებები, თუმცა, კონკრეტული, ამდენი ხანი გავიდა და მაინც არაფერია. მაინცდამაინც უნდა ჩამოინგრეს შენობა და ტრაგედია დატრიალდეს, რომ მერე გააკეთონ?! გალამაზებული წინა ფასადის ფონზე ავარიული უკანა მხარეც სასწრაფოდაა მოსაწესრიგებელი, რომელიც საფრთხეს უქმნის აქ მცხოვრებ ადამიანებს, მათ შორის, ბავშვებს”, _ ასეთია კორპუსის მცხოვრებთა გზავნილი ადგილობრივი ხელისუფლების მისამართით, სადაც კვლავინდებურად გვპირდებიან, რომ პრობლემაზე, რომლის თაობაზეც საკმაოდ არიან ინფორმირებულები, სათანადო რეაგირება აუცილებლად მოხდება, თუმცა, კონკრეტულად როდის და რამდენ ხანში, ჯერჯერობით, მაინც უცნობია.
ავტორი
