4 სექტემბერს, ოზურგეთის მუნიციპალიტეტის სოფელ ნაღობილევში (მერიის თემი) ადგილობრივი მოსახლეობის წარმომადგენლებმა აქცია გამართეს წყალგაყვანილობის გაკეთების მოთხოვნით. მათ ურეკი-ოზურგეთის ცენტრალური მაგისტრალი გადაკეტეს და კატეგორიულად ითხოვდნენ ადგილობრივი ხელისუფლების წარმომადგენელთა მისვლას.
_ მოვიდნენ პირველი პირები სასწრაფოდ. მერი, კოტე შარაშენიძე რომ შეგვპირდა, 23 აგვისტოსთვის ჭაბურღილი გექნებათო, სადაა? რამდენჯერ უნდა მოგვატყუონ? რა გახდა ჩვენთან წყლის პროექტის გახორციელება? გზას მანამ არ გავხსნით, სანამ არ მოვლენ, _ ბრაზობდნენ აქციის მონაწილეები და პოლიციის არა ერთგზის თხოვნის მიუხედავად, გზიდან არ გადადიოდნენ.
აქციის მიმდინარეობისას, ხშირად ისმოდა ნიშნისმოგებით და მუქარით ნათქვამი სიტყვები: “არჩევნებზე არ მოვიდნენ აქ!” “მალე იქნება არჩევნები და ვაჩვენებთ, როგორ უნდა მოტყუება!” “არჩევნებამდე არ მივუშვათ. წავიდეთ მერიაში და ავჭედოთ კარი!” “ვიხრჩობით, ღელის წყალი არაა, რომ ხელი დაისველო!” “ოზურგეთის საკრებულოში კი გვყავს დეპუტატი, მაგრამ მას აქვს წყალი, იქით უბანში კი არის და რატომ მოვა აქ?! რა გახდა ამ ჭაბურღილის გაკეთება, სამი წელია, ტყუილებით რომ გვბერავენ?” _ ყვიროდნენ აქციის მონაწილეები.
კითხვაზე, თუ რატომ ახსენებდნენ ხშირად არჩევნებს წყალგაყვანილობის მოთხოვნით გამართულ აქციაზე და ეს ხმაური საპარლამენტო არჩევნების მოახლოების გამო ხომ არ იყო დაგეგმილი, აქციის მონაწილეებმა თქვეს:
ნელი დოლიძე, ადგილობრივი მკვიდრი: “რა გასაკვირია?! არჩევნები რომ მოვა, ჩვენც მასე მოვატყუებთ. 23 აგვისტოს უნდა ყოფილიყო ჭაბურღილი გაკეთებული. წავიდნენ ახალგაზრდები, იშრომეს და გაკაფეს ადგილი, სადაც ეს ჭაბურღილი უნდა დაიდგას, მაგრამ მაინც არ გააკეთეს. არადა, ოზურგეთის მუნიციპალიტეტის მერი შეგვპირდა, რომ აუცილებლად გააკეთებდა ამ დროისთვის. ესაა სიტყვის შესრულება?!”
არიადნა გოგიტიძე, ხვარბეთის მცხოვრები: “არ დავინახო აქ არჩევნებზე არავინ! უწყლოდაა მთელი სოფელი. ჭები დაშრა. შავ დღეში ვართ…”
მერი კვირკველია, ადგილობრივი მკვიდრი: “გამოდგებიან და ყვირიან, ხელი დაიბანე, ეს ქენი, ის ქენი, კორონააო… რით დავიბანო ხელი?! რა დავლიოთ?! არჩევნებზე ხომ მოირბენენ?! სამი წელია, ვიხრჩობით. ყველგან გაკეთდა. ჩვენ მარტო დაპირებით გვატყუებენ”.
“კი, კი, საარჩევნო აქციაა… მე კომენტარს ვერ გაგიკეთებთ… აქაური არ ვარ, უბრალოდ, მომეწონა აქცია და ვესწრები…” _ ირონიულად გვითხრა მამაკაცმა, რომელმაც ვინაობა არ გაგვიმხილა.
აქციის მსვლელობისას, პოლიციის წარმომადგენლები გამუდმებით მიმართავდნენ მოქალაქეებს: “თქვენ საავტომობილო გზის პიკეტირებით არღვევთ კანონს. გადადით გზიდან და ჩაატარეთ აქცია, ხელს არავინ შეგიშლით… გავატაროთ მანქანები…” თუმცა, მათ არ ემორჩილებოდნენ.
აქციაზე განსაკუთრებით აგრესიულად იქცეოდა რამდენიმე მამაკაცი, რომლებიც მძიმე ტვირთმზიდ მანქანებს პირდაპირ წინ უდგებოდნენ და მათ მძღოლებს მიმართავდნენ, რომ გასვლა არ “გაებედათ!”
თუმცა, მამაკაცებს არც ქალბატონები ჩამორჩებოდნენ და პოლიციის წარმომადგენელთა მითითებაზე, გზიდან გადასულიყვნენ, მანქანები გაეტარებინათ და მშვიდობიანად ჩაეტარებინათ აქცია, იქით ეურჩებოდნენ:
_ რას მოეთრიეთ აქ? ქურდია დასაჭერი თუ რაიმე დააშავა ვინმემ? ვინც თქვენ გამოგგზავნათ, ის თვითონ არის დასაჭერი… წყალი გვინდა ჩვენ… _ უკან არ იხევდნენ პროტესტის გამოსახატავად მოსულნი.
მაგისტრალზე სწრაფად წარმოიშვა საცობი _ გზის ორივე მხრიდან მომავალი მძიმე ტვირთმზიდი მანქანები, მიკროავტობუსები თუ მსუბუქი ავტომობილები შეჩერდნენ და თითოეულის მძღოლი თუ მგზავრი კატეგორიულად ითხოვდა გზის გათავისუფლებას.
პოლიციამ კორდონი გააკეთა. მოულოდნელად შუა გზაზე მდგომი ერთი ქალბატონი ცუდად გახდა. ის მალევე მოასულიერეს, სასწრაფო დახმარების ეკიპაჟი ჟურნალისტმა გამოიძახა, რადგან თავად აქციის მონაწილეები 112-ში დარეკვის წინააღმდეგი იყვნენ…
მალე მოხერხდა სიტუაციის განმუხტვა.
პოლიციამ კორდონი კვლავ გააკეთა და მოძრაობაც აღდგა.
“მოიცათ, პარასკევს ისევ გადავკეტავთ გზას. არ გავჩერდებით! დღეს ასე იყოს! ჯობს, დაპირება შეასრულონ _ ასე გადაეცით მთავრობის წარმომადგენლებს, თორემ არჩევნებზე არ მოვიდნენ აქ!” _ ყვიროდნენ ადგილობრივები.
აქციის შემდეგ “გურია ნიუსი” ოზურგეთის მუნიციპალიტეტის მერიის ინფრასტრუქტურის სამსახურის უფროსს, თემურ გიორგაძეს ესაუბრა:
_ ამ პრობლემის შესახებ ვიცით. აღნიშნულ სოფელში წყალგაყვანილობა მალე გაკეთდება _ პროექტი მომზადებულია. უცებ არ კეთდება ყველაფერი. გამოთქვამენ საყვედურებს, რომ სხვაგან გაკეთდა და თითქოს მათთან არ კეთდება. იმ “სხვაგან” რომ არ გაკეთებულიყო და ხვარბეთში გახორციელებულიყო უფრო ადრე პროექტი, მაშინ სხვებიც იმავეს იტყოდნენ. ჭაბურღილის დადგმა, უფრო რთული პროცესია, _ გვითხრა გიორგაძემ.
