ყოფილი “ნაცები” “ოცნების” კანდიდატებად _ ვის გამო დაუპირისპირდნენ ერთმანეთს დავით დარჩია და გია სალუქვაძე

ოზურგეთში თვითმმართველობის არჩევნებისთვის მზადება უკვე დაიწყო. ცოტა ხნის წინ გამართულ შეხვედრაზე, რომელსაც მაჟორიტარი დეპუტატი არჩილ თალაკვაძე, გურიის გუბერნატორი გია სალუქვაძე, პარტია „ქართული ოცნების“ ოზურგეთის ორგანიზაციის თავმჯდომარე დავით დარჩია, პარტიის  გურიის კოორდინატორი კობა დუნდუა, პარტიის ცენტრალური ოფისის წარმომადგენელი და „ქართული ოცნების“ რეგიონების უფროსის დიტო სამხარაძის და სუს-ის უფროსის მოადგილის სოსო გოგაშვილის საერთო მეგობარი სოსო ერქომაიშვილი ესწრებოდა, მაჟორიტარი დეპუტატების კანდიდატურებზე იმსჯელეს.

როგორც გვითხრეს, შეხვედრა რამდენიმე საათი საკმაოდ დაძაბულ ვითარებაში გაგრძელდა. შეხვედრის ყველა მონაწილეს საკუთარი კანდიდატურა ჰყავდა და იმის დასაბუთებას ცდილობდა, თუ რატომ უნდა ყოფილიყო ესა თუ ის კადრი მაჟორიტარობის კანდიდატი.

ჩვენი წყაროს ინფორმაციით, ყველაზე მეტი კითხვები ლიხაურის მაჟორიტარი დეპუტატობის კანდიდატად ოზურგეთის ყოფილი გამგებლის, თამაზ სალუქვაძის წარდგენამ გამოიწვია. როგორც გვითხრეს, სალუქვაძეს გურიის გუბერნატორი ლობირებს, რომელმაც შეხვედრაზე იმის დამტკიცება სცადა, რომ თამაზ სალუქვაძეს ალტერნატივა არ ჰყავს. მის ამ პოზიციას პარტიის ხელმძღვანელი დავით დარჩია შეეწინააღმდეგა:

_ მე ჩემი პოზიცია დავაფიქსირე მხოლოდ და აღვნიშნე, რომ კანდიდატად არ უნდა დააყენონ პირი, რომელიც 2014 წლის არჩევნებზე ჩვენი მოწინააღმდეგე იყო, _ აღნიშნა „გურია ნიუსთან“ საუბრისას დარჩიამ, რომელიც სალუქვაძის წარსულზეც აკეთებს აქცენტს:

_ მასთან პიროვნული არაფერი მაქვს, თუმცა, მისი პოლიტიკური წარსული „ქართული ოცნების“ პოლიტიკისგან შორსაა, _ ამბობს დარჩია.

ამ თემაზე საუბარი არ სურს გურიის გუბერნატორს, რომელიც აღნიშნავს, რომ ჯერ გადაწყვეტილი არაფერია:

_ მაჟორიტარების კანდიდატებზე გადაწყვეტილება მიღებული არ არის, _ ამბობს სალუქვაძე.

_ გასაგებია, თუმცა არსებობს სავარაუდო სია, რომელიც ჩვენც გვაქვს და ვიცით, ვინ ვის უჭერს მხარს.  ისიც ვიცით, რომ თქვენ ლობირებთ თამაზ სალუქვაძეს, რომლის პოლიტიკურ წარსულზე ბევრი შეკითხვაა….

_ თუ არ ვცდები 2014 წელს დამოუკიდებელად იყარა კენჭი.

_ ამის გარდა ბევრი დეტალია. „გურია ნიუსის“ არქივში ბევრი მასალაა, ბევრი ინტერვიუ, სადაც თამაზ სალუქვაძე ამტკიცებს, რომ „ნაციონალური მოძრაობა“  აუცილებლად გაიმარჯვებს, რომ ის შეძლებს ლიხაურის ხმების მობილიზებას…

_ არ ვიცი, ჯერჯერობით განხილვები მიმდინარეობს და ვერაფერს დაგიდასტურებთ. მაგის გარდა სხვა კანდიდატებიცაა და ერთად მოხდება განხილვა.

_ ჩვენ გვითხრეს, შეხვედრაზე, სადაც კანდიდატების განხილვა ხდებოდა, პარტიის თავმჯდომარესთან სალუქვაძის კანდიდატურის გამო დაძაბული საუბარი გქონდათ…

_ უკაცრავად,  ვინ არის პარტიის თავმჯდომარე?

_ არ იცით, რომ „ქართული ოცნების“ ოზურგეთის ორგანიზაციის ხელმძღვანელი დავით დარჩიაა?

_ დათო თუ ამას ადასტურებს არ ვიცი. მე ვერ დავადასტურებ. პარტიის გადასაწყვეტია ვის დაასახელებს  მაჟორიტარად.  მე შეიძლება ჩემი მოსაზრებები  მქონდეს, მაგრამ გადაწყვეტილებას მიიღებს პარტია, _ ამბობს სალუქვაძე, რომელსაც მისი მოსაზრებების გამხელა არც მერობის სავარაუდო კანდიდატებზე სურს.

გია სალუქვაძე არ აკონკრეტებს ვის სასარგებლოდ მისცემს ხმას _ ქალაქის მერის ბეგლარ სიორიძის თუ მუნიციპალიტეტის გამგებლის მერაბ ჭანუყვაძის.

_ ჯერ არ არის ამის დრო და მორალური უფლებაც არ მაქვს ამაზე ვისაუბრო…

_ ბატონო გია, ჩვენ გვითხრეს, რომ მერაბ ჭანუყვაძე არ არის ის კადრი, რომელსაც მხარს დაუჭერთ…

_ ამ შემთხვევაში არცერთ ერთს და არც მეორეს არ ვასახელებ, რადგან ამის დროს არ არის. საერთოდ, ასეთ თემებზე არ მიყვარს საუბარი.

_ ჩვენი ინფორმაციით, კანდიდატად არა, თუმცა, ე.წ. გამსვლელ სიაში თქვენი მოადგილე სოსო ერქომაიშვილიც იქნება, რომელსაც, როგორც ამბობენ გუბერნატორობაც სურდა… ერქომაიშვილს აქვს თქვენი მხარდაჭერა?

_ კიდევ ერთხელ გეუბნებით, რომ ვერც მაჟორიტარებზე, ვერც მერობის კანდიდატებზე და ვერც სიაზე ვერ ვისაუბრებ. რაც შეეხება უშუალოდ სოსო, ის არის ბიუროს წევრი და ცუდს ვერ დავინახავ თუ ის სიაში ყოფნას მოისურვებს. ის ერთ-ერთი დამფუძნებელია „ქართული ოცნების“ და რატომაც არა, _ გვითხრა გია სალუქვაძემ.

ჩვენ შევეცადეთ დეტალები სოსო ერქომაიშვილთან დაგვეზუსტებინა და ისიც გაგვეგო, რა სტატუსით იმყოფებოდა შეხვედრაზე, თუმცა მან ჩვენ სატელეფონო ზარებს არ უპასუხა.

კომენტარების გაკეთებისგან თავი შეხვედრის სხვა მონაწილეებმაც შეიკავეს და ჩვენს მიერ მოპოვებულ სავარაუდო მაჟორიტარობის კანდიდატებზე საუბარი არ ისურვეს.

არადა, კითხვები, სალუქვაძის მსგავსად ბევრ მათგანზეა. მაგალითად გია ჩაგანავაზე, რომელსაც „ქართული ოცნება“ ლაითურში წარადგენს. ჩაგანავა „ნაციონალური მოძრაობის“ დროს გამგეობის მაღალჩინოსანი იყო და იგი ე.წ. „ბახმაროს მიწების სკანდალის“ ერთ-ერთი მონაწილეა.

კითხვები ისმის ჭანიეთის სავარაუდო კანდიდატზე _ აქ მმართველი გუნდი ვლადიმერ სურგულაძის კანდიდატურას განიხილავს, რომელიც „ნაციონალური მოძრაობის“ დროს საკრებულოს თავმჯდომარის პოსტს იკავებდა.

რაც შეეხება დანარჩენ სოფელს. ჩვენს მიერ მოპოვებული სიის თანახმად, ნატანებში თამაზ ტუღუში განიხილება, სოფელ ოზურგეთში _ ირაკლი ჩხაიძე, ურეკში _ ბიძინა იმნაიშვილი, შრომაში _ დავით ჭაკნელიძე,  გურიანთაში _ ბონდო ღლონტი, ანასეულში _ ლავრენტი ბიგვავა, ქალაქში _ ვასილ ჩიგოგიძე, ზვანში _ ნუგზარ ურუშაძე, შემოქმედში _ თამაზ ბურჭულაძე, სილაური _ გოჩა კილაძე, ბოხვაურში _ გელა ჩავლეიშვილი. ცხემლისხიდში _ ლალი სიჭინავა, მელექედურში _ ლევან კილაძე, ნაგომარში _ ალეკო გოგოძე, ძიმითში _ ტიტე მგელაძე, ასკანაში _ ლევან ნინიძე, ბახვში _ ეროდი გორდელაძე, მერიაში _ ალექსანდრე ღლონტი, ბაილეთში _ პაატა კიღურაძე, ჯუმათში _ მერაბ ბერიძე (ამ ადამიანების პოლიტიკური წარსულის შესახებ “გურია ნიუსი” მოგვაინებით გიამბობთ).

ამ ეტაპისთვის გაურკვეველია ვინ იქნება კანდიდატი მოიდანახის, ნარუჯის და ნასაკირალის საარჩევნო უბნებზე.