აშშ-ს წარმომადგენელთა პალატამ უკრაინის დასახმარებლად ლენდ-ლიზის კანონპროექტი დაამტკიცა, ახლა მხოლოდ პრეზიდენტმა ჯო ბაიდენმა უნდა მოაწეროს ხელი კანონს.
ამერიკის შეერთებული შტატების პრეზიდენტმა, ჯონ ბაიდენმა კონგრესს უკრაინისთვის ახალი 33-მილიარდიანი დახმარების პაკეტის დამტკიცება სთხოვა, საიდანაც 20 მილიარდი სამხედრო შეიარაღებაა.
ლენდ-ლიზის პროგრამის ფარგლებში, 20 მილიარდი დოლარის დახმარების შედეგად უკრაინას შეუძლია მიიღოს:
მესამე თაობის ტანკები M1A2 Abrams;
ქვეითთა საბრძოლო მანქანები M2A3 Bradley;
ზალპური ცეცხლის რეაქტიული სისტემები HIMARS;
თვითმავალი საარტილერიო დანადგარები M109A6 Paladin;
ზალპური ცეცხლის რეაქტიული სისტემები უნივერსალური გამშვები დანადგარი M270 MLRS;
გადასატანი რეაქტიული კომპლექსები NASAMS 2;
საზენიტო რეაქტიული კომპლექსი Patriot;
მეოთხე თაობის მრავალფუნქციური მსუბუქი გამანადგურებელი F-16 C/D.
ე.წ. ლენდ ლიზის პროგრამა აშშ-მა ბოლოს მეორე მსოფლიო ომის დროს აამოქმედა. გადაწყვეტილებით შემცირდება ბიუროკრატიული ბარიერები. ამერიკა უკრაინას შეიარაღებას და აღჭურვილობას გადასცემს, გადახდა კი, კიევს მოგვიანებით მოუწევს.
ლენდ-ლიზი, სახელმწიფო პროგრამაა, რომელიც მეორე მსოფლიო ომის დროს დაეხმარა აშშ-ს მოკავშირეებს ადოლფ ჰიტლერის ნაცისტურ გერმანიასთან გამკლავებაში, რადგან ამერიკას მიეცა შესაძლებლობა, დამატებითი პროცედურების გარეშე პარტნიორები სწრაფად მოემარაგებინა.
პროგრამის ფარგლებში ამერიკის შეერთებული შტატები ამარაგებდა გაერთიანებულ სამეფოს, საბჭოთა კავშირს, ჩინეთს, საფრანგეთსა და სხვა მოკავშირე სახელმწიფოებს დიდი რაოდენობით საბრძოლო მასალით, იარაღით, სურსათით და სტრატეგიული ნედლეულით, რომელმაც გადამწყვეტი როლი შეასრულა მოკავშირეების მეორე მსოფლიო ომში გამარჯვებაში.
სანაცვლოდ, ბრიტანეთისაგან შტატებმა მიიღო სამხედრო ბაზები ნიუფაუნდლენდში, ბერმუდის კუნძულებსა და კარიბის ზღვაში. პროგრამა დაიწყო 1941 წლის მარტში, ომის დაწყებიდან 18 თვის შემდეგ.
პროგრამის ფარგლებში ამერიკამ გასცა 50.1 მილიარდი დოლარის (2022 წლის ფასებით, დაახლოებით 700 მილიარდის ეკვივალენტი) ღირებულების დახმარება: 31.4 მილიარდი ბრიტანეთს, 11.3 მილიარდი საბჭოთა კავშირს, 3.2 მილიარდი საფრანგეთს და 1.6 მილიარდი ჩინეთს. საპირისპიროდ ლენდ–ლიზმა (მოკავშირეთა მიერ აშშ–სთვის გაწეული დახმარება) შეადგინა 7.8 მილიარდი დოლარი, აქედან 6.8 მილიარდი მოდის ბრიტანეთსა და თანამეგობრობის ქვეყნებზე.
