სახელმწიფო უსაფრთხოების სამსახურის მიერ, ქრთამის აღების ფაქტზე დაკავებულ ქალაქ ოზურგეთის საკრებულოს თავმჯდომარეს გელა კობალაძეს ბრალს დღეს წაუყენებენ.
მისი უფლებადამცველის, ხათუნა კეჭაყმაძის თქმით, კობალაძე, სავარაუდოდ, დღესვე მისცემს ჩვენებას:
_ ბრალი დღეს უნდა წარუდგინოთ და სავარაუდოდ, დღეს ჩვენებასაც მისცემს. თუმცა, დაზუსტებით ამის თქმაც არ შემიძლია. არ არის გამორიცხული, რომ დუმილის უფლებაც გამოიყენოს. ამ ეტაპზე, ერთადერთი, რაც დაზუსტებით ვიცი, ის არის, რომ დანაშაულს არ აღიარებს და ამბობს, რომ ჰყავს მოწმეები, რომლებიც დაადასტურებენ, რომ იმ ადამიანს, რომელმაც ფული მისცა მისი ვალი ჰქონდა, _ აღნიშნა ჩვენთან საუბრისას ადვოკატმა.
კეჭაყმაძე ყურადღებას ამახვილებს იმ ფაქტზე, რომ სახელმწიფო უსაფრთხოების სამსახურს მტკიცებულების სრული ვერსია არ გამოუქვეყნებია:
_ იქ არის კონტექსტიდან ამოგლეჯილი ფრაზები, რომელზეც კითხვები ჩნდება. როგორც მითხრეს, არსებობს სხვა ჩანაწერებიც, თუმცა, მე საქმის მასალები არ გადმომცემია და არ ვიცი რა აქვს გამოძიებას, _ ამბობს ადვოკატი.
ჩვენს მიერ მოპოვებულ ინფორმაციაზე, რომლის თანახმადაც გამოძიება კობალაძეს თანამშრომლობას და თანამონაწილეების დასახელებას სთავაზობს საპროცესო გარიგების სანაცვლოდ, ადვოკატი ამბობს, რომ ამაზე საუბარი ჯერ არ ყოფილა:
_ კანონი ითვალისწინებს შეღავათებს თანამშრომლობის შემთხვევაში, თუმცა, ჩემი დაცვის ქვეშ მყოფთან ჯერ ამაზე საუბარი არ ყოფილა. როგორც გითხარით, დღეს უნდა მოხდეს ბრალის წარდგენა და ამის შემდეგ შემეძლება უფრო მეტი დეტალის თქმა, _ გვითხრა ხათუნა კეჭაყმაძემ.
„გურია ნიუსის“ მიერ ექსკლუზიურად მოპოვებული ინფორმაციის თანახმად, გამოძიებას საქმეში არაერთი ჩანაწერი აქვს _ როგორც აუდიო, ასევე ვიდეო. ჩვენი წყაროს თქმით, ჰყავთ მოწმეებიც, რომლებიც ამბობენ, რომ კობალაძე მათგან თანხას ითხოვდა:
„კომპანია „პირამიდაში“ ცოტა ხნის წინ მენეჯმენტი შეიცვალა. ისინი იყვნენ კობალაძესთან მისულები და უთხრეს, რომ ძველი სისტემით მუშაობა არ გაგრძელდებოდა. თუმცა, საკრებულოს თავმჯდომარემ მათ უთხრა, რომ მათ დამთავრებული საქმისთვის, რომელიც ქალაქის მერიის მიერ კომპანიასთან გაგრძელებულ ხელშეკრულებას გულისხმობდა, კუთვნილი და დაპირებული თანხა უნდა მიეღო. ეს ყველაფერი როგორც ჩანაწერებით, ასევე მოწმეების საშუალებითაც დასტურდება“, _ ამბობს ჩვენი წყარო.
მისივე თქმით, კობალაძის ერთადერთი გამოსავალი გამოძიებასთან თანამშრომლობაა:
„იმ შემთხვევაში თუკი იგი აღიარებს დანაშაულს, იტყვის, როგორ მოახერხა სამუშაო ვადის გაგრძელება კომპანიისთვიის, რომლის შავ სიაში ჩასმას, შეუსრულებელი ვალდებულებების გამო, რამდენიმე მუნიციპალიტეტი, მათ შორის ოზურგეთის თემთა მუნიციპალიტეტი, ოფიციალურად ითხოვს სახელმწიფო შესყიდვების სააგენტოდან, აქვს შანსი, რომ საპროცესო გარიგებით გამოვიდეს. გამოძიებას აქვს ვარაუდი და მუშაოებენ იმ მიმართულებით, რომ იგი მარტო არ მოქმედებდა. ეს ვარაუდი ფაქტებს იმყარება იმ ფონზე, რომ საკრებულოს თავმჯდომარეს ხელშეკრულებებთან სამსახურეობრივი შემხებლობა არ ჰქონდა. შესაბამისად, ერთი გზა გადაწყვეტილების მიმღებ პირთან შეთანხმება და მასთან ურთიერთობის გამოყენება უნდა ყოფილიყო. სწორედ ამის გათვალისწინებით აქვთ ეჭვი, რომ კობალაძე მარტო არ მოქმედება,“ _ გვიყვება წყარო.
კიდევ ერთი წყარო, გუშინ „გურია ნიუსს“ უყვებოდა, რომ ამ საკითხზე ანტიკორუფციული და სახელმწიფო უსაფრთხოების სამსახური გამოძიებას რამდენიმე თვეა აწარმოებენ და ეს ერთ დღეში დაგეგმილი და გახორციელებული სპეცოპერაცია არ არის. ჩვენი წყაროს თქმით, გამოძიების სხვადასხვა ეტაპზე მოპოვებულია რამდენიმე აუდიო და ვიდეო ჩანაწერი. ორ მათგანში ნახსენებია ქალაქ ოზურგეთის მერის, ბეგლარ სიორიძის სახელი. დაახლოებით 2 თვის წინ გაკეთებულ ერთ-ერთ ვიდეო ჩანაწერში, „პირამიდას“ წარმომადგენელს გელა კობალაძე ეუბნება, რომ ქალაქის მერთან ის გაარკვევდა ურთიერთობას და ხელშეკრულებას ვადა გაუგრძელდებოდა. აქედან ერთ თვეში გაკეთებულ ჩანაწერში კი, კობალაძე საკუთარი სიტყვის შესრულებაზე საუბარობს და ამბობს, რომ ყველაფერი მოგვარებული და ხელშეკრულება გაფორმებულია. შესაბამისად, მას კუთვნილი წილი ერგება.
ეს “წილი“ კი, როგორც სუს-ის მიერ გამოქვეყნებული ვიდეოჩანაწერი მოწმობს, კობალაძემ 7 მარტს მიიღო.
გამოძიება გრძელდება და როგორც გვეუბნებიან, კითხვები ქალაქის მერთან, ბეგლარ სიორიძესთანაც ექნებათ, რომელმაც „პირამიდასთან“ გაგრძელებულ ხელშეკრულებას მოაწერა ხელი.
ქალაქის მერიიდან ამ საქმესთან დაკავშირებული ყველა დოკემენტი უკვე ამოღებულია და როგორც ჩვენი წყარო ამბობს, ბეგლარ სიორიძის დაკითხვა უახლოეს დღეებში იგეგმება. თუმცა მანამდე, გელა კობალაძის ჩვენება ელოდებიან. გამომძიებლებს იმედი აქვთ, რომ კობალაძე თანამონაწილეს ან თანამონაწილეებს დაასახელებს. კითხვაზე, არსებობს თუ არა ეჭვები ქალაქის მერთან დაკავშირებით, სუს-ში არ გვპასუხობენ და გამოძიების დასრულებისთვის დალოდებას გვირჩევენ.
გამოძიების დასრულებას ელოდება ქალაქ ოზურგეთის მერიც. ბეგლარ სიორიძე „გურია ნიუსთან“ საუბრისას ამბობს, რომ დაინტერესების შემთხვევში, მზად არის გამოძიების ნებისმიერ შეკითხვას უპასუხოს:
_არც მე და არც ჩემს არცერთ სამსახურს კანონის მიღმა არაფერი გაგვიკეთებია. შპს „პირამიდას“ ხელშეკრულება გაუგრძელდა კანონის შესაბამისად. არ ვიცი ვინ რას ამბობს, მაგრამ ის დანამდვილებით ვიცი, რომ უკანონოდ არაფერი გამიკეთებია. არ გამოვრიცხავ, რომ ეს ყველაფერი უშუალოდ „პირამიდასგან“ მოდიოდეს, რომელსაც კანონის შესაბამისად 300 000 ლარამდე ჯარიმა დავაკისრეთ, _ გვითხრა სიორიძემ.
_ბატონო ბეგლარ, ფაქტია, რომ კომპანიას ვადა გაუგრძელდა. ფაქტია ისიც, რომ გელა კობალაძემ, როგორც სუს-ის მიერ გამოქვეყნებული ვიდეოჩანაწერი მოწმობს, ამაში 50 000 ლარი აიღო.
_ რაც მოხდა, ჩემთვის ძალიან სამწუხარო და მტკივნეული ფაქტია და იმედია, გამოძიება ყველაფერს გაარკვევს. ამ ეტაპზე მხოლოდ იმის თქმა შემიძლია, რომ მერიის მხრიდან კანონდარღვევას ადგილი არ ჰქონია, _ გვითხრა ბეგლარ სიორიძემ.
ჩვენ შევეცადეთ წყაროს მიერ მოწოდებული ინფორმაცია კომპანია ‘პირამიდაშიც“ გადაგვემოწმებინა, თუმცა, იქ ჩვენს ზარებს არ პასუხობენ.
ამავე თემაზე იხილეთ: ის, რაც კობალაძის დაკავების ფაქტზე არ უთქვამთ _ რა ჩანაწერები აქვს გამოძიებას
შპს “პირამიდასგან” აღებული 50 000 ლარი _ გელა კობალაძეს 11-დან 15 წლამდე პატიმრობა ემუქრება
საკრებულოს თავმჯდომარის ქრთამის აღების ფაქტზე დაკავების პირველი ვიდეოკადრები
