საქართველოს სახალხო დამცველის მივლინებებზე, 2016 წელს, საერთო ჯამში, 22 362.96 ლარი დაიხარჯა.
აღნიშნულის შესახებ „გურია ნიუსს“ ჩვენს მიერ მოთხოვნილი საჯარო ინფორმაციის პასუხად ომბუდსმენის აპარატიდან აცნობეს.
მოწოდებული დოკუმენტაციიდან ირკვევა, რომ უჩა ნანუაშვილის მივლინებებზე ქვეყნის შიგნით, ჯამში 2576,57 ლარია დახარჯული, აქედან აპარატის ბიუჯეტიდან 295 ლარი, ხოლო დაფინანსებული მიზნობრივი გრანტებიდან – 2281,57 ლარი.
რაც შეეხება ქვეყნის გარეთ მივლინებებს, როგორც გამოთხოვილი ინფორმაციიდან ირკვევა, ნანუაშვილს მივლინებებში ჯამში, 19 786,39 ლარი დაუხარჯავს, აქედან 5787,40 ლარი აპარატის ბიუჯეტიდან, ხოლო 13 998,99 ლარი დაფინანსებული მიზნობრივი გრანტებიდან.
ცნობისთვის, მოწოდებული დოკუმენტაციის თანახმად, 2017 წლის იანვარ-თებერვლში, სახალხო დამცველი არც ქვეყნის შიგნით და არც ქვეყნის გარეთ მივლინებაში არ ყოფილა, თუმცა, მარტში უჩა ნანუაშვილის ვიზიტი ჟენევაშია დაგეგმილი.
აქვე უნდა აღინიშნოს, რომ „გურია ნიუსმა“ ვერ მიიღო გამოთხოვილ ინფორმაციაზე პასუხი, კონკრეტულად რამდენი დაიხარჯა უჩა ნანუაშვილის მივლინებებზე სხვადასხვა ქვეყანაში, ყველა ეს ინფორმაცია ომბუდსმენის აპარატიდან გადმოგზავნილ ბრძანებებში დაშტრიხულია.
მოწოდებული დოკუმენტაციიდან ირკვევა, რომ უჩა ნანუაშვილი 2016 წლის 12-13 აპრილს, იმყოფებოდა ავსტრიაში, ვენაში მშვიდობის საერთაშორისო ინსტიტუტის ორგანიზებით გამართულ კონფერენციაზე სახელწოდებით „კონფლიქტის ფასი“. მივლინების ხარჯებს აფინანსებდა ორგანიზატორი. გარდა ამისა, ბრძანებაში აღნიშნულია, რომ სამდღიანი მივლინება ასევე დაფინანსდა საქართველოს პრეზიდენტის #231-ე ბრძანებულების თანახმად გათვალისწინებული „მაღალი რანგის თანამდებობის პირთათვის ქვეყნის ფარგლებს გარეთ სამსახურებრივი მივლინებისას სადღეღამისო ნორმის დანამატის“ ფარგლებში 80%-ის ოდენობით.
2016 წლის 28 ივნისიდან 2 ივლისის ჩათვლით, სახალხო დამცველი, მისი მოადგილე, აპარატის პრევენციისა და მონიტორინგის დეპარტამენტის უფროსი; სამართლებრივი ექსპერტი კონფლიქტით დაზარალებულ პირთა უფლებების დაცვის სფეროში და სახალხო დამცველთან არსებული ეროვნულ უმცირესობათა საბჭოს კოორდინატორი იმყოფებოდნენ უნგრეთში, ბუდაპეშტში ევროპის საბჭოს ორგანიზებით დაგეგმილ ადამიანის უფლებათა ინსტიტუტების და თბილისისა და სოხუმის სამოქალაქო საზოგადოების წარმომადგენლების რიგით მესამე შეხვედრაზე, სადაც წინა წლის შეხვედრის შედეგები შეფასდა.
მგზავრობის, საცხოვრებელი ფართის დაქირავების (სასტუმროს) და კვების ხარჯები სრულად დაფარა პროგრამის ორგანიზატორმა.
ამ ბრძანებაშიც აღნიშნულია, რომ უჩა ნანუაშვილისთვის გამოიყო დამატებით თანხა საქართველოს პრეზიდენტის #231-ე ბრძანებულებით გათვალისწინებული „მაღალი რანგის თანამდებობის პირთათვის ქვეყნის ფარგლებს გარეთ სამსახურებრივი მივლინებისას სადღეღამისო ნორმის დანამატის“ ფარგლებში 80%-ის ოდენობით.
2016 წლის 13-19 ნოემბერს, სახალხო დამცველი ტაილანდის სამეფოში, ქალაქ ბანგკოკში იმყოფებოდა. აღნიშნული მივლინების ბრძანება ამავე წლის 4 ივლისსაა გამოცემული, მივლინებაში წასვლამდე 4 თვით ადრე.
როგორც ბრძანებაშია აღნიშნული, სახალხო დამცველი ომბდსმენთა საერთაშორისო ინსტიტუტის რიგით მე-11 საერთაშორისო კონფერენციას პირველ მოადგილესთან და საერთაშორისო ურთიერთობების დეპარტამენტის მთავარ სპეციალისტთან ერთად დაესწრო. ბრზანებაში აღნიშნულია, რომ კონფერენციის ორგანიზატორთა მხრიდან დაფინანსება გათვალისწინებული არ ყოფილა. ამიტომ მივლინების ხარჯი მთლიანად სახალხო დამცველის აპარატის ბიუჯეტიდან და ევროკავშირის პროექტის „სახალხო დამცველის აპარატის მხარდაჭერა II” დაიფარა. ვიზიტი 12-დან 20 ნოემბრამდე გაგრძელდა. მივლინების ხარჯის შესახებ ინფორმაცია ბრძანებაში დაფარულია.
ასევე, 2016 წლის 12-14 ოქტომბერს, გერმანიაში, ქალაქ ბერლინში განხორციელდა სახალხო დამცველის ვიზიტი, რომელიც ადამიანის უფლებათა ეროვნული ინსტიტუტების გლობალური ალიანსის ბიუროს (GANHRI) შეხვედრას დაესწრო. ამ ვიზიტის დაფინანსება ორგანიზატორთა მხრიდან გათვალისწინებული არ ყოფილა და მივლინების ხარჯი სახალხო დამცველის აპარატის ბიუჯეტიდან და ევროკავშირის პროექტის „სახალხო დამცველის აპარატის მხარდაჭერა II” დაიფარა.
გარდა ამისა, 2016 წლის 29 ნოემბრიდან 3 დეკემბრის ჩათვლით, სახალხო დამცველი, მისი პირველი მოადგილე და ევროკავშირის გუნდის ხელმძღვანელი იმყოფებოდნენ საფრანგეთში, სტრასბურგში. ვიზიტთან დაკავშირებული ხარჯები დაფინანსდა ევროკავშირის მიერ დაფინანსებული პროექტის „ბრძოლა დისკრიმინაციის ყველა ფორმის წინააღმდეგ საქართველოში“ ბიუჯეტიდან. მივლინებისთვის გადახდილი თანხა არც ამ შემთხვევაშია მითითებული.
2017 წლის 5-11 მარტს სახალხო დამცველი მიემგზავრება შვეიცარიაში, ჟენევაში საერთაშორისო ურთიერთობების და კომუნიკაციის დეპარტამენტის მთავარ სპეციალისტთან ერთად (ბრძანება გამოცემულია 31 იანვარს). ხარჯებს აპარატი და ევროკავშირის პროექტის „სახალხო დამცველის აპარატის მხარდაჭერა II” დაფარავს.
სახალხო დამცველის ოფისიდან მოგვაწოდეს ზოგადი ინფორმაცია, თვის განმავლობაში რამდენი დაიხარჯა როგორც ბიუჯეტიდან და მიზნობრივი გრანტებიდან სახალხო დამცველის მივლინებებისთვის, რაც, ვიმეორებთ, კონკრეტული მივლინებისას დახარჯული თანხის შესახებ ინფორმაციას არ იძლევა. ყველა ბრძანებაში, რაც სახალხო დამცველის ოფისიდან გადმოგვიგზავნეს მივლინებისთვის დახარჯული თანხები დაფარულია.
ასევე დაფარულია ინფორმაცია ომბუდსმენის მოადგილეების და სხვა თანამშრომლების მივლინებებთან დაკავშირებით (თანამშრომლების ვინაობა და გადახდილი თანხები დაშტრიხულია) როგორც ქვეყნის შიგნით, ასევე ქვეყნის გარეთ.
რა თანხები დაიხარჯა ზოგადად სახალხო დამცველის მოადგილეების და აპარატის თანამშრომლების მივლინებებზე, „გურია ნიუსი“ ამის შესახებ ინფორმაციას მოგვიანებით შემოგთავაზებთ.
ამავე თემაზე:
რამდენი ათასი ლარის პრემია-დანამატი მიიღო სახალხო დამცველმა
რა ოდენობის პრემია-დანამატები მიიღეს სახალხო დამცველის მოადგილეებმა
