ლანჩხუთის მთავარ საფინანსო დოკუმენტში ერთ-ერთ მთავარ პრიორიტეტად მოქალაქეთა ჯანმრთელობის დაცვა და სოციალური უზრუნველყოფაა წარმოჩენილი და მერიის მიერ წარმოდგენილი პროექტის მიხედვით, ამ კუთხით ბიუჯეტი 2020 წლისთვის 723 800 ლარის დახარჯვას გეგმავს. აქედან, 147 ათასი ლარი ჯანმრთელობის დაცვის კუთხით გაიხარჯება, ხოლო სხვადასხვა სოციალური პროგრამების დასაფინანსებლად წლის მთავარ საფინანსო დოკუმენტში 567 800 ლარია გათვალისწინებული.
მერიის სოციალური და ჯანდაცვის სამსახურის უფროსის, თამარ ფირცხალაიშვილის მიერ გაკეთებული განმარტებით, მომავალი წლისთვის გახორციელებულია არაერთი ცვლილება, ზოგიერთ პროგრამაში გაზრდილია, როგორც ბენეფიციარების რაოდენობა, ისე დაფინანსებაც და დოკუმენტი, შეძლებისდაგვარად, მაქსიმალურად მორგებულია მუნიციპალიტეტის მოსახლეობის მოთხოვნებზე.
ფირცხალაიშვილისვე თქმით, 2020 წლისთვის მუნიციპალიტეტში, ჯამში, განსაზღვრულია 17 სოციალური პროგრამა. აქედან, მზრუნველობამოკლებულთა უფასო კვებით უზრუნველყოფის პროგრამის ბიუჯეტი 90 ათასი ლარითაა განსაზღვრული; მრავალშვილიანი ოჯახების დახმარების პროგრამისთვის 36 ათასი ლარი დაიხარჯება; მძიმე საცხოვრებელ პირობებში მყოფი ოჯახების დროებითი თავშესაფრით უზრუნველყოფის პროგრამა კი 67 ათასი ლარით დაფინანსდება. რაც შეეხება ომის მონაწილე ვეტერანებისა და მათი ოჯახების დახმარების პროგრამას, ამ კუთხით, ბიუჯეტი განისაზღვრა 56 ათასი ლარით. მოსწავლეთა ტრანსპორტირების პროგრამისთვის ადგილობრივი ბიუჯეტი 7 600 ლარს გაიღებს; ცენტრ “იავნანას” თანადაფინანსების პროგრამა კი 13 ათას ლარს შეადგენს; ბიკარბონატული ჰემოდიალეზით _ თირკმლის ქრონიკული უკმარისობით დაავადებულთა სამედიცინო დაწესებულებაში ტრანსპორტირების პროგრამის ბიუჯეტი 38 800 ლარითაა განსაზღვრული’ იძულებით გადაადგილებულ პირთა დახმარების პროგრამის დასაფინანსებლად 15 300 ლარია გათვალისწინებული.
92 ათასი ლარი მოხმარდება სამკურნალო და საოპერაციო ხარჯებით დახმარების პროგრამას; 19 500 ლარითაა განსაზღვრული ერთჯერადი სოციალური დახმარების პროგრამის ბიუჯეტი.
მძიმე საცხოვრებელ პირობებში უბედური შემთხვევისა და სტიქიური მოვლენების შედეგად დაზარალებული ოჯახების ერთჯერადი დახმარების პროგრამის ბიუჯეტი 50 ათას ლარს შეადგენს; 2 500 ლარია უპატრონო მიცვალებულთა სარიტუალო მომსახურების პროგრამის ბიუჯეტი.
37 200 ლარამდეა გაზრდილი “გამარჯვებულ ქალთა კლუბის” სარეაბილიტაციო პროგრამა ძუძუს კიბოს დიაგნოზით ნაოპერაციები ქალებისათვის. ხანდაზმულ (100 და მეტი წლის ასაკის) პირთა დახმარების პროგრამა 1 500 ლარით განისაზღვრა.
15 ათასი ლარია გათვალისწინებული მედიკამენტების შეძენის დახმარების პროგრამაზე. შშმ პირის სტატუსის მქონე ბენეფიციართა სარეაბილიტაციო კურსის დაფინანსების პროგრამის დაფინანსებისთვის კი 9 800 ლარია განსაზღვრული სოციალურ პაკეტში.
25 000 ლარით დააფინანსებს ლანჩხუთის ბიუჯეტი ბავშვთა ადრეული განვითარების ხელშეწყობისა და ბავშვთა რეაბილიტაცია-აბილიტაციის ქვეპროგრამით მოსარგებლე შშმ ბავშვების და მათი თანმხლები პირების ტრანსპორტირების დაფინანსების პროგრამას.
