შპს „პირამიდა ფ.რ.“-ს, რომლის ტექნიკური მენეჯერისგან ქრთამის აღების ფაქტზე ოზურგეთის მუნიციპალიტეტის საკრებულოს თავმჯდომარე გელა კობალაძე დააკავეს, 2015-2016 წლებში, ოზურგეთის და ქალაქ ოზურგეთის მუნიციპალიტეტეტების მიერ გამოცხადებული 5 ტენდერი აქვს მოგებული, ხოლო წაგებული- 1.
ჯამში, შესასრულებელი სამუშაოების საერთო ღირებულება კი, 7 433 302 მილიონი ლარია, თუმცა, რამდენი მილიონის ვალდებულება ჰქონდა შპს-ს შესრულებული, ჯერჯერობით უცნობია.
“საერთაშორიო გამჭირვალობა _ საქართველოს” მიერ შექმნილი ტენდერების მონიტორის ვებ-გვერდზე განთავსებული ინფორმაციით, შპს „პირამიდა – ფ.რ“-გამარჯვებულია 9 ტენდერში, წაგებული აქვს -12, ხოლო მიმდინარე ორ ტენდერში მონაწილეობს.
კერძოდ, ოზურგეთის მუნიციპალიტეტის გამგეობის მიერ გამოცხადებულ ტენდერში, რითაც სამშენებლო სამუშაოები უნდა განხორციელებულიყო, 2015 წლის 13 თებერვალს, შპს „პირამიდა – ფ.რ“-მ გაიმარჯვა. სამუშაოების შესრულების სავარაუდო ღირებულება 1555541 ლარი იყო.
ამავე წლის ნოემბერში აქვს მოგებული კიდევ ერთი გამარტივებული ტენდერი, რომელიც ქალაქ ოზურგეთის მუნიციპალიტეტს სამშენებლო-სარემონტო სამუშაოებისთვის ჰქონდა გამოცხადებული და მისი სავარაუდო ღირებულება 3 მილიონ ლარს ცდებოდა. ტენდერის საბოლოო ღირებულებად 2508400 ლარი განისაზღვრა.
რაც შეეხება 2016 წელს, ტენდერების მონიტორის გვერდზე განთავსებული ინფორმაციით, შპს „პირამიდა ფ.რ.“-მ ორი ტენდერი მოიგო – 11 თებერვალს ოზურგეტის მუნიციპალიტეტის მიერ გამოცხადებული, ხოლო 19 თებერვალს ქალაქ ოზურგეთის მუნიციპალიტეტის მიერ გამოცხადებული.
სატენდერო დოკუმენტაციიდან ირკვევა, რომ 11 თებერვლის ტენდერის საბოლოო ღირებულებად 939209 ლარით განისაზღვრა, ხოლო 19 თებერვლის ტენდერის საბოლოო ღირებულება 1175000 ლარი იყო.
ცნობისთვის, სახელმწიფო უსაფრთხოების სამსახურის ანტიკორუფციული სააგენტოს და სახელმწიფო უსაფრთხოების დეპარტამენტის თანამშრომლებმა ერთობლივად ჩატარებული ოპერატიულ-სამძებრო და საგამოძიებო მოქმედებების შედეგად ქრთამის აღების ფაქტზე ქალაქ ოზურგეთის მუნიციპალიტეტის საკრებულოს თავმჯდომარე გელა კობალაძე დღეს დააკავეს.
გამოძიებამ დაადგინა, რომ 2015-2016 წლებში ქალაქ ოზურგეთის მერიამ შპს „პირამიდას“ საქართველოს ფილიალთან გააფორმა ხელშეკრულებები ქალაქ ოზურგეთის დაზიანებული ქუჩების რეაბილიტაციისა და მდინარე ,,ბჟუჟი“-ს ნაპირსამაგრი სამუშაოების ჩატარებასთან დაკავშირებით.
სუს-ის ინფორმაციით, აღნიშნულმა კომპანიამ ვერ შეძლო ხელშეკრულებებით გათვალისწინებულ ვადაში სამუშაოების დასრულება, რის გამოც დღის წესრიგში დადგა მასთან ხელშეკრულებების შეწყვეტის საკითხი.
ქალაქ ოზურგეთის საკრებულოს თავმჯდომარე გელა კობალაძე შეხვდა შპს „პირამიდას“ საქართველოს ფილიალის ტექნიკურ მენეჯერს და თავისი თანამდებობის გამოყენებით დაჰპირდა ზემოხსენებული ხელშეკრულებების ვადების გაგრძელებას და უკვე შესრულებულ სამუშაოებზე მისაღები დაახლოებით 150 000 ლარის ჩარიცხვას, რის სანაცვლოდაც ქრთამის სახით მოსთხოვა და აიღო ფულადი თანხა 50 000 ლარის ოდენობით, რა დროსაც იგი სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა დააკავეს.
გამოძიებას სახელმწიფო უსაფრთხოების სამსახურის ანტიკორუფციული სააგენტო საქართველოს სისხლის სამართლის კოდექსის 338-ე მუხლის მე-3 ნაწილით აწარმოებს, რაც სასჯელის სახით თავისუფლების აღკვეთას ვადით 11 – დან 15 წლამდე ითვალისწინებს.
ამავე თემაზე:
ის, რაც კობალაძის დაკავების ფაქტზე სუს-ს არ უთქვამს _ რა ჩანაწერები აქვს გამოძიებას
შპს “პირამიდასგან” აღებული 50 000 ლარი _ გელა კობალაძეს 11-დან 15 წლამდე პატიმრობა ემუქრება
გურიის გუბერნატორი საკრებულოს თავმჯდომარის დაკავების შესახებ
“მოგებული ტენდერი წაართვეს სხვა კომპანიას და მისცეს შპს “პირამიდას“
