საქართველოს რკინიგზის გენერალურ დირექტორს, მამუკა ბახტაძეს, 2017 წლის 30 მარტს შევსებული ქონებრივი დეკლარაციის მიხედვით, 2016 წლის განმავლობაში, 284 688 ლარი აქვს მიღებული, რაც საშუალოდ თვეში 23 724 ლარია.
როგორც ბახტაძის ქონებრივი დეკლარაციიდან ირკვევა, მისი წლიური შემოსავალი მხოლოდ საქართველოს რკინიგზიდან მიღებული 220 474,00 ლარი არ არის. გარდა ამისა, ის კიდევ ორ თანამდებობას იკავებს, საიდანაც შემოსავლის სახით ჯამში 64 214 ლარი აქვს მიღებული.
კერძოდ, მამუკა ბახტაძე შპს „ჯორჯია ტრანზიტის“ სამეთვალყურეო საბჭოს წევრია და მან გასული წლის განმავლობაში აქედან – 45 662,00 ლარი აიღო; ასევე, ის არის შპს „ჯრ ტრანზიტ ლაინი“-ს სამეთვალყურეო საბჭოს წევრიც და 2016 წელს შემოსავლის სახით 18552,00 ლარი აქვს აღებული.
აქვე უნდა აღინიშნოს ისიც, რომ 2015 წელს, მამუკა ბახტაძის შემოსავალი ჯამში 289 591 ლარი იყო (თვეში, დაახლოებით, 24 132 ლარი); 2014 წელს – მისმა შემოსავალმა 248 652 ლარი შეადგინა (20721 ლარი თვეში); 2013 წელს კი, ბახტაძემ 241 334.93 ლარის შემოსავალი მიიღო (თვეში, დაახლოებით, 20 111 ლარი).
ამ შემოსავლებიდან ირკვევა, რომ 2013-2016 წლებში მამუკა ბახტაძემ შემოსავლის სახით, საქართველოს რკინიგზიდან და რკინიგზის დაფუძნებული კომპანიებიდან ჯამში, 1 მილიონ 064 265,93 ლარის შემოსავალი აქვს მიღებული.
ცნობისთვის, საქართველოს რკინიგზის 100% მფლობელი სახელმწიფოა, ზემოთ აღნიშნული ორი შპს-ც საქართველოს რკინიგზას ეკუთვნის – საქართველოს საკანონმდებლო მაცნეში განთავსებული ინფორმაციის თანახმად, შპს “ჯორჯია ტრანზიტი” და შპს “ჯრ ტრანზიტ ლაინი” საქართველოს რკინიგზის მიერ დაფუძნებული კომპანიებია.
შარშან, მამუკა ბახტაძის ქონებრივ დეკლარაციაზე მუშაობისას, „გურია ნიუსმა“ საქართველოს რკინიგზის პრესსამსახურს კითხვებით მიმართა. როგორც უწყებიდან მიღებულ წერილშია აღნიშნული, რკინიგზის დირექტორს სრული კანონიერი უფლება აქვს ხელფასის სახით მიიღოს გასამრჯელო სხვა საწარმოდან, რომელშიც იგი გარკვეულ ფუნქციებს ასრულებს.
გარდა ამისა, “ინფორმაციის თავისუფლების განვითარების ინსტიტუტის” იურისტი ნინო მერებაშვილი “გურია ნიუსთან” საუბრისას განმარტავდა, რომ “ინტერესთა შეუთავსებლობისა და კორუფციის შესახებ” კანონის დათქმა, რომელიც ინტერესთა კონფლიქტს განსაზღვრავს, საქართველოს რკინიგზის დირექტორზე არ ვრცელდება.
მერებაშვილი ამბობდა, რომ ბახტაძე საჯარო მოსამსახურე არ არის, თუმცა, მიიჩნევდა, რომ ეს კანონის ხარვეზია და სახელმწიფო საკუთრებაში არსებული კერძო სამართლის იურიდიული პირების ხელმძღვანელებზე, “ინტერესთა შეუთავსებლობისა და კორუფციის შესახებ” კანონი უნდა გავრცელდეს, რათა ინტერესთა კონფლიქტი ამ შემთხვევაშიც ავიცილოთ თავიდან.
რაც შეეხება მამუკა ბახტაძის ფინანსურ მდგომარეობას, 2017 წლის 30 მარტს, დეკლარაციის შევსების მომენტში, მას საქართველოს ბანკის მიმდინარე ანგარიშზე 25637,93 დოლარი, ხოლო სახელფასო ანგარიშზე _6840,23 ლარი. “ვი–თი–ბი ბანკის” მიმდინარე ანგარიშზე კი, 22543,86 ლარი ერიცხებოდა. გასულ წელს, სესხის (საკრედიტო ხაზის გახსნა) პროცენტის დასაფარად 1361,30 ლარის გასავალი ჰქონია.
რაც შეეხება ბახტაძის საკუთრებაში არსებულ ქონებას, როგორც დეკლარაციაშია აღნიშნული, მამუკა ბახტაძის 100,00%-იან მფლობელობაშია 2016 წელს ნაჩუქარი 355,05 კვ.მ -ის ფართობის საცხოვრებელი სახლი მცხეთაში, კოსმონავტების ქუჩაზე და ამავე მისამართზე არსებული 670,00 კვ.მ-ის ფართობის მიწის ნაკვეთი.
ცნობისთვის, სს „საქართველოს რკინიგზის“ სამეთვალყურეო საბჭოს გადაწყვეტილებით, გენერალური დირექტორის თანამდებობაზე, მამუკა ბახტაძე 2013 წლის მარტში დაინიშნა.
სს „საქართველოს რკინიგზის“ ვებ-გვერდზე განთავსებული ინფორმაციიდან ირკვევა, რომ მამუკა ბახტაძე 1982 წელს თბილისში დაიბადა. დაამთავრა ივანე ჯავახიშვილის სახელობის თბილისის სახელმწიფო და საქართველოს ტექნიკური უნივერსიტეტები; ფლობს მ.ვ. ლომონოსოვის სახელობის მოსკოვის სახელმწიფო უნივერსიტეტის მაგისტრის ხარისხს. 2010 წელს, INSEAD-ის ბიზნეს სკოლაში მიენიჭა MBA-ს კვალიფიკაცია. 2013 წლამდე მუშაობდა საქართველოს საერთაშორისო ენერგეტიკულ კორპორაციაში, გენერალური დირექტორის თანამდებობაზე.
ამავე თემაზე:
საქართველოს რკინიგზის უფროსის ქონება და ექვსნიშნა შემოსავალი
მოწმდება თუ არა თანამდებობის პირების ქონებრივი დეკლარაციის სიზუსტე
იყო თუ არა “საქართველოს რკინიგზის” გენერალური დირექტორი “ნაცმოძრაობის” შემწირველი
თანამდებობის პირთა ქონებრივი დეკლარაციების წარდგენასთან დაკავშირებული დარღვევები
.jpg)
