საქართველოს სახალხო დამცველმა უჩა ნანუაშვილმა 2016 წლის განმავლობაში ჯამში, 11 800 ლარის პრემია დანამატი მიიღო, აქედან 7000 ლარის პრემია ერთჯერადად მხოლოდ 2016 წლის დეკემბერში აქვს მიღებული. იმის გათვალისწინებით, რომ სახალხო დამცველის ხელფასი 7000 ლარია, ჯამში, ამ დეკემბრის შემოსავალი 14 000 ლარი იქნებოდა.
როგორც “გურია ნიუსის” მიერ ოფიციალურად გამოთხოვილი დოკუმენტაციიდან ირკვევა, უჩა ნანუაშვილს 2016 წლის განმავლობაში 3500 ლარის დანამატი ერთჯერადად, მარტში აქვს მიღებული. ხოლო პრემია წლის განმავლობაში სამჯერ – აპრილში – 500 ლარი, აგვისტოში – 300, ხოლო დეკემბერში 7000 ლარის ოდენობით აქვს მიღებული.
ამავე დოკუმენტაციიდან ირკვევა, რომ სახალხო დამცველის თვიური ხელფასი 7000 ლარია. ანუ მას წლის განმავლობაში ჯამში 84 000 ლარი ხელფასის სახით აქვს მიღებული. ამ პოსტიდან მისმა შემოსავალმა კი გასულ წელს, პრემია დანამატებით და ხელფასით, ჯამში 95 800 ლარი შეადგინა.
აღსანიშნავია ისიც, რომ უჩა ნანუაშვილს 2017 წლის იანვარში პრემია-დანამატი მიღებული არ აქვს.
“გურია ნიუსი” სახალხო დამცველის ოფისის სხვა ხარჯებთან დაკავშირებით ინფორმაციას ეტაპობრივად გამოაქვეყნებს.
