2 თვის წინ, ოზურგეთის მუნიციპალიტეტის სოფელ ასკანაში მცხოვრებლებმა, დაახლოებით 120 მეტრი სიგრძის წყლის მილები ამოთხარეს. აქედან, რამდენიმე მეტრი მილი ჯართში ჩააბარეს, რამდენიმე _ გაყიდეს, ზოგიც კი საკუთარ სახლში მიიტანეს _ საქმე ეხება მიწაში წლების წინ ჩაფლულ წყალგამტარ მილებს.
აღნიშნულ ფაქტთან დაკავშირებით ასკანაში მცხოვრებმა კუკური დოლიძემ პოლიციას საჩივრით მიმართა და შსს-მ გამოძიებაც დაიწყო. პირი, ვისაც კუკური დოლიძე ბრალს დებდა, მეზობლად მცხოვრები კობა ქურასბედიანია _ მას რაიონულმა სასამართლომ 1-წლიანი პირობითი სასჯელი მისცა, ქურასბედიანმა კი დანაშაულში სხვა პირებიც ამხილა, მათ შორის, ასკანაში მცხოვრები ზაურ ჩხაიძეც.
ქურასბედიანი “გურია ნიუსთან” ამბობს, რომ მილების მოხმარებით მთელმა სოფელმა ისარგებლა, მათ შორის, ზაურ ჩხაიძემაც, რომელსაც, ქურასბედიანის თქმით, მილები კუთვნილ სახერხზე ღობეებში აქვს ჩარჭობილი.
ასკანაში აღნიშნულ ფაქტს ადასტურებენ და ამ საქმეში მონაწილე სხვადასხვა პიროვნებებსაც ასახელებენ.
ჩვენ ჩავწერეთ ყველა ის პირი ვისი სახელიც და გვარიც, რომლებიც, მოსახლეობის თქმით, აღნიშნულ საქმეში ფიგურირებს.
კუკური დოლიძე “გურია ნიუსთან” ამბობს, რომ მას მოპარეს მილები, რის გამოც, ჩაენგრა ეზო და ღობე. რადგან არ გაუკეთეს დაზიანებული, პოლიციაში იჩივლა:
_ კობა ქურასბედიანმა ამოთხარა მილები და წაიღო. ეს მთავრობის მილები კი არ არის _ ჩემი დედმამის და ხალხის ნაყიდი იყო. პოლიციაში დავწერე საჩივარი. ცოტა ხანში მაგ პოლიციასაც ვუჩივლებ, თუ არ გამოიძიებენ მაგ საქმეს _ მინისტრს გავუგზავნი წერილს. დამიშალეს ღობე და დამტოვეს ასე _ ეს ღობე ასე დაშლილი ივარგებს? ისეც არ მაქცევს ყურადღებას არავინ, მარტოხელა ვარ. როგორი სახლიც მაქვს, ხედავთ _ ჭერიდან წყალი ჩამომდის. ვიჩივლე იმიტომ, რომ ღობე გამიკეთონ. კარგი ქენით, რომ ამობრძანდით _ მინდოდა, ჟურნალისტების ენახათ ჩემი მდგომარეობა. აქვე, ცოტა ზევით, წყლის რეზერვუარები იდგა და ისიც მოიპარეს.
იქვე მცხოვრები გურამ დოლიძე, აღნიშნულ ფაქტს ადასტურებს: _ კი, ამოთხარეს. ერთი არ გავატანე. კობა ქურასბედიანმა მოჭრა ეს მილები. მეტის სხვა მაგ საქმეში არაა. ჩხაიძეებს კი არ მოუპარავთ _. ახალი ჩააკერეს და ძველში გადაცვალეს.
კობა ქურასბედიანი: _ მოვიხადე სასჯელი _ მომისაჯეს 1-წლიანი პირობითი. ვინც მომცა ეს მილები, ისევ იმან მიჩივლა. მარტო ჩემზე არაფერს არ დავიწერ _ მთელი სოფელი “გაძღა” და ჩემზე უნდოდათ ჯოხის გადატეხვა. მე ვარ უდანაშაულო. მე ეზოშიც არ მაქვს მილები ჩატანილი.
ჯერ ერთი, ამ კაცმა გაყიდა და ზაურ ჩხაიძეს მიყიდა. რატომ არ ამბობენ სიმართლეს? მე არ ამომითხრია _ ვის ღობესთანაც იყო, ვთხოვე იმას, ბუხრისთვის მინდა,-მეთქი და კიო. მითხრა, გადავჭარი 5 მეტრი, დანარჩენი წაიღო მან.
ჩაყევით, ნახეთ _ სახერხია ცენტრში და ამ მილები აქვს ღობე გაკეთებული _ ყველამ იცის ამ სოფელში ეს. მე ვუთხარი სოფლის გამგებელს და ჩავაყენე საქმის კურსში. მე 5 მეტრი მილი მოვჭერი დას სხვამ 40 მეტრი გაყიდა. სხვის საქმეს რომ არკვევენ, საკუთარი საქმეები გაარკვიონ. მე ვარ უბრალო ადამიანი და ჩხაიძე ვინ არის? მაგისთვის შეიძლება სოფელში ყველაფერი და ჩემთვის _ არა?! მთელმა სოფელმა დაინაწილა ეს მილები.
ხელოსანი ვარ, ორი შვილი მყავს, შვილიშვილი და უკანონოდ არაფერს ვიზამდი.
40 მეტრი მილი რომ გაყიდეს, იმ საქმეს მიხედონ _ ეს მილები ჩხაიძეებს აქვთ. კითხეთ კუკურის ,ვის მისცა და იმან ვის მიყიდა. ჩემგან გინდათ ყველა ინფორმაციის მიღება?
ავთო აბულაძე: _ მე მინდოდა ჩემ ეზოსთან მაგ მილების ჩაწყობა _ნიაღვარი ჩამომდიოდა ეზოსთან, თუმცა, ამოღებით არ ამომიღია. ერთხელ ვიყავი პოლიციაში. სასამართლო ჯერ არ ყოფილა.
მიხეილ დოლიძე: _ დაკითხვაზე ვიყავი, მიცემული მაქვს ჩვენება. აქ ეგდო მილები, სახლის წინ _ გზის თუ წყლის ხალხმა მოჭრა. მოვკიდე ხელი და ჩავიტანე ეზოში.
ჯუმბერ ვაშალომიძე: _ აგერ იყო დაყრილი, გარეთ. გზის მშენებლობას უშლიდა ხელს და შემოვიტანე ეზოში. ეს მილები კუკური დოლიძესთან არაფერ შუაში არაა _ არხი უნდა გაეჭრათ.
“გურია ნიუსი” ინფორმაციის გადასამოწომებლად ზაურ ჩხაიძეს დაუკავშირდა, რომელიც ჩვენმა კითხვებმა ძალიან გააღიზიანა:
_ ბატონო ზაურ, კუკური დოლიძეს იცნობთ?
_ კი, მერე?!
_ ფლობთ თუ არა ინფორმაციას ასკანაში მილების ამოთხრასთან დაკავშირებით? საქმე პოლიციაშია…
_ გეტყვით ყველაფერს _ პირადად მე გავაკეთე პროექტი, რომ ასკანა ყოფილიყო წყლით უზრუნველყოფილი. მე ჩამოვიყვანე ხალხი _ 1 300 000 დაჯდა პროექტი. გავიყვანეთ წყალი მთელ სოფელში.
წყლის მილი მე არ მჭირდებოდა და არც მითხოვია ვინმესთვის, მილი მოეცა, თორემ რამდენიც შემეძლო, იმდენი მექნებოდა. ერთ-ორ ადგილზე იყო ძველი მილი ამოწეული. გზას ვინც აკეთებდა, იმათ უთხრეს მოსახლეობას, გაასუფთავეთო ტერიტორია ამ მილებისგანო. დაახლოებით იქნებოდა 100-120 მეტრი.
იმ კუკურის ეზოში რა ხდებოდა, არ ვიცი. ჩაჭრეს მილი და ეგდო ქუჩაში, რომელიც გზის მშენებლობის დროს, როცა იქ ვიყავი, არავის არ წაუღია. მერე იქნებ კიდეც წაიღო ვინმემ. შემდეგ გავიგე, რომ სოფელში ამ მილების გამო ჩხუბი მოსვლიათ. ერთ-ერთს, რომელიც წაიყვანეს პოლიციაში, სიტყვის მასალის მიზნით ჩამოუსახელებია უდანაშაულო ხალხი, რომლებსაც ეს მილები არსად არ წაუღიათ.
_ ბატონო ზაურ, როგორც კობა ქურასბედიანი ამბობს, მილებით თქვენც ისარგებლეთ და თქვენ სახერხზე ღობე გააკეთეთ.
_ დაბალი მილები რომაა? ის არის სულ ახალი მილები, რომელიც ორგანიზაციამ შეისყიდა. ჩემთან რა საქმე აქვს კობა ქურასბედიანს? თქვენ ახლა ბოდიშს გიხდით _ ვის ელაპარაკებით, ჯერ არ იცით! მაგის დედა ვატირე, როგორ კადრულობთ და ასე უცოდინრად როგორ მესაუბრებით. მე ქურდებს იქით დავდევ _ სახლი გამიტეხეს და შენ მოდიხარ და ღობეში რომ მილებია, საიდან გაქვთო, მეკითხებით? ის შეიძინა ორგანიზაციამ. ახლა ზედა მხარეც გასაკეთებელია.
მე არავისზე საჩივარს არ ვწერ და თქვენ როგორ დაწერეთ, ძმები ასკანელების სახლი გაქურდესო? ჯერ ერთი, ძმები ასკანელები მაქ არ ცხოვრობენ _ ვცხოვრობ მე. თქვენ უცოდინარობას ამჟღავნებთ. უნდა დაგეწერათ ზაურის სახლი გატეხესო! ან სოფელს რომ ხელმძღვანელი ჰყავს, არ უნდა კითხოთ იმას? მე არ ვიცი ვინ ხართ თქვენ, თქვენ ხომ არ გგონიათ, რაიმე გამართლება გაქვთ თქვენი მოქმედებით?
_ ბატონო ზაურ, შეურაცხყოფას გვაყენებთ…
_ თქვენ სილამაზის და სიმართლის წინააღმდეგ მიდიხართ? აი, რაფერია ბიძია? ჟანგიანი მილები ამოყარეს. ამან ადგა და თავის დანაშაული სხვას გადაბრალა _ იქით ჩააგდო შარში ლევანი ნაცვალაძე და მიხეილ დოლიძე. როგორ შეიძლება ეგენი დასაჯო? იმას ძალიან მაგარი მოუწვეს იმას, ვინც მაგენს მიუსაჯა. გავიგო ერთი ვინაა!
სოფელს ჰყავს პატრონი, ხომ უნდა კითხოთ მას, რა ხდება? შეურაცხყოფას აყენებთ ხალხს მაგის კითხვებით და დაჯლიგინობთ უნებართვოთ! ეს როგორ შეიძლება?!
_ ვის უნდა ვკითხოთ, სოფელში ამოვიდეთ თუ არა?
_ ვის უნდა შეეკითხოთ და გამგებელს. მისია ის ტერიტორია. ქურდია თუ მამაძაღლი, მას უნდა შეუთანხმო. წესი ასეა და ის გეტყვის სიმართლეს.
კიდევ კარგი, რომ შეიკავეს თავი იმათ, ვისთანაც იყავით. რას ჰქვია დარბიხართ ისე აქეთ იქეთ! მე ვყოფილიყავი, გაიქცეოდით ოზურგეთს იქეთ. ხომ არ გონიათ ვინმეს მეშინია! მე ვარ კაცი, ვიღაცა კი არა!
მთელმა საქართველომ გაიგო, სახლი რომ გამიტეხეს _ მაშინ რატომ არ ამოდით? თქვენ დაწერეთ ტყუილი, ჩემი შვილები კი არიან ძმები ასკანელები, მაგრამ ის სახლი ჩემია. ზემდგომმა პირებმა კი იციან ვინ გატეხა ის სახლი, ჩვენ გვაინტერებს ახლა, რომ აქ ადგილზე გახსნან ეს ამბავი, თორემ წააკვდებიან ზედ. მე რომ მაქ ვიყო, სამსახურში მოგაკითხავდით!
შსს აღნიშნულ ფაქტს ადასტურებს და განმარტავს: “გამოძიება დაწყებულია სსკ 177 მუხლით, რაც ქურდობას გულისხმობს. ჩატარდა სასამართლო პროცესი ორი პირის მიმართ. გრძელდება გამოძიება სხვა პირების მხილების მიზნით”.
სოფელ ასკანაში ოზურგეთის მერის წარმომადგენელის მოვალეობის შემსრულებელი პავლე მესხიშვილი აღნიშნულ ფაქტთან დაკავშირებით კომენტარს არ აკეთებს: _ მე იანვარში დავინიშნე, ამიტომ კომენტარს ვერ გავაკეთებ, _ ამბობს ის.
