ლანჩხუთის საკრებულომ მუნიციპალიტეტის ტერიტორიაზე „ავტომანქანების პარკირების ადგილების განსაზღვრისად და პარკირების წესების დადგენის შესახებ“ დადგენილება მიიღო, რომელიც მანამდე ფრაქციებსა თუ კომისიებში განიხილეს და გარკვეული შესწორებებიც შეიტანეს.
ის, რომ პარკირების მოწყობა საჭიროა ამაზე ერთსულოვანია საკრებულო, თუმცა, სხდომაზე არ დაკონკრეტებულა, რა თანხას გაიღებს მუნიციპალიტეტი საამისოდ და ოპოზიციაც სწორედ ამაზე აპელირებდა. მათი თქმით, საკითხს ფინანსური უზრუნველყოფაც უნდა მოჰყოლოდა დასამტკიცებლად.
თანხებზე საუბრისას დეპუტატმა კახა ასკურავამ, რომელიც საკრებულოში „ნაციონალურ მოძრაობას“ წარმოადგენს, აქცენტი ჯარიმების თემაზე გააკეთა.
„ბოლო რამდენიმე დღეა, რაც ქალაქის ცენტრი ერთ დიდ საჯარიმო ადგილად იქცა. რამდენი წელია, რაც „მეტროს“ ავტობუსი ქალაქის ცენტრში აჩერებს და აქამდე არავის დაუჯარიმებია, ახლა კი ჯარიმა გამოუწერეს იქ გაჩერებისთვის. კაცი ლარიანი ნაყინის საყიდლად შევიდა მაღაზიაში, უკან დაბრუნებულს კი მანქანაში 20-ლარიანი ჯარიმა დახვდა. როცა პარკირება მოწესრიგდება, ამის შემდეგ თუ ვინმე დაარღვევს, ეს უკვე მისი პრობლემა იქნება, მანამდე კი თქვენ აქტიურად ცდილობთ, ჯარიმებით შეავსოთ ბიუჯეტი. ხალხს პირდაპირ ჯიბიდან აცლით ფულს, რომ მერე იმით პრემიები დაირიგოთ. ყველა ქალაქში მოწესრიგებულია პარკირების საკითხი და ამდენი ხანი რა ვერ მოაგვარეთ ლანჩხუთში?!“, _ თქვა ასკურავამ.
გამგებლის, ზაზა ურუშაძის თქმით, უკანონო არაფერი არ ხდება და პატრული მხოლოდ წესის დამრღვევებს აჯარიმებს.
„პატრული აჩერებს იმას, ვინც წესს არღვევს. რა ვქნათ, არ დავიცვათ წესრიგი?! რამდენიმე დღის წინ ლესის გადასასვლელზე მეც დავარღვიე მოძრაობის წესი და პატრულმა დამაჯარიმა. ვინც არღვევს, ის უნდა დაჯარიმდეს.
ისე, როცა თქვენ იყავით გამგებელი, მაშინ რატომ არ მოაწესრიგეთ პარკირება, დრო არ გქონდათ?! პარკირების მოწყობა დიდ თანხებთან არაა დაკავშირებული. საღებავები და სპეციალური ნიშნებია საჭირო. ამისთვის იმდენი თანხა არაა საჭირო, რომ ვერ გამოინახოს“, _ განმარტება გააკეთა გამგებელმა.
